Kwalula 2 - MUKANDA USANDU WA ZAMBI 1975

¹ Yehova yamba kuli Mose ni Arone ngwenyi,

² A-Izalele, mutu ni mutu, akajikile mbalaka yenyi ku mbandeira yenyi mwene, hamwe ni yinyingi ya ku majiko ja atato; hatalanganyi ni mbalaka ya chikungulwila akayijikile kwa kujingilika.

³ Ku sali lia ku Chivumbuko kutalikisa ku utuhukilo wa tangwa kukapwe mbandeira ya chilombo cha Yunda, nikulita ni yizavu yo. Nasone mwana Aminandambe akapwe mwata wa A-Yunda.

⁴ Chizavu chenyi a kwalula yapwa makumi shimbiali a tununu ni tununu awana ni kulakaji asambano.

⁵ Kusulangana nenyi munyachi wa Isaka akajikile mbalaka jo. Netanele mwana Zuare akapwe mwata wa A-Isaka.

⁶ Chizavu chenyi a kwalula yapwa makumi atano a tununu ni tununu awana ni kulakaji awana.

⁷ Mba munyachi wa Zapulone. Eliape mwana Helone akapwe mwata wa A-Zapulone.

⁸ Chizavu chenyi a kwalula yapwa makumi atano a tununu ni tununu shimbiali ni kulakaji awana.

⁹ A kwalula eswe a ku chilombo cha Yunda yapwa kulakaji lia tununu ni makumi nake a tununu ni tununu asambano ni kulakaji awana, nikulita ni yizavu yo. Wano akatetekele mu wenyi.

¹⁰ Ku sali lia ku Sule kukapwe mbandeira ya chilombo cha Rupene, nikulita ni yizavu yo. Elizure mwana Sedure akapwe mwata wa A-Rupene.

¹¹ Chizavu chenyi a kwalula yapwa makumi awana a tununu ni tununu asambano ni kulakaji atano.

¹² Kusulangana nenyi munyachi wa Simeone akajikile mbalaka jo. Selumiele mwana Zurisadai akapwe mwata wa A-Simeone.

¹³ Chizavu chenyi a kwalula yapwa makumi atano a tununu ni tununu livwa ni kulakaji atatu.

¹⁴ Mba munyachi wa Ngate. Eliasafe mwana Duele akapwe mwata wa A-Ngate.

¹⁵ Chizavu chenyi a kwalula yapwa makumi awana a tununu ni tununu atano ni kulakaji asambano ni makumi atano.

¹⁶ A kwalula eswe a ku chilombo cha Rupene yapwa kulakaji lia tununu ni makumi atano a tununu ni kanunu umuwika ni kulakaji awana ni makumi atano, nikulita ni yizavu yo. Wano mu wenyi mahatako.

¹⁷ Hohene ye mbalaka ya chikungulwila hikukatuka; chilombo cha A-Levi hakachi ka yilombo yikwo. O akaye mu wenyi chizechene ngwe akujika mbalaka jo, mutu mweswe mu chihela chenyi, kwe ku mbandeira jo.

¹⁸ Ku sali lia ku Chitokelo kukapwe mbandeira ya chilombo cha Eframe, nikulita ni yizavu yo. Elisama mwana Amihude akapwe mwata wa A-Eframe.

¹⁹ Chizavu chenyi a kwalula yapwa makumi awana a tununu ni kulakaji atano.

²⁰ Kusulangana nenyi munyachi wa Manase akapweko. Ngamaliele mwana Pedazure akapwe mwata wa A-Manase.

²¹ Chizavu chenyi a kwalula yapwa makumi atatu a tununu ni tununu aali ni kulakaji aali.

²² Mba munyachi wa Mbenjamine. Abidane mwana Ngideonyi akapwe mwata wa A-Mbenjamine.

²³ Chizavu chenyi a kwalula yapwa makumi atatu a tununu ni tununu atano ni kulakaji awana.

²⁴ A kwalula eswe a ku Chilombo cha Eframe yapwa kulakaji lia tununu ni tununu nake ni kulakaji umuwika, nikulita ni yizavu yo. Wano akaye mu wenyi nikuhatako.

²⁵ Ku sali lia ku Norte kukapwe mbandeira ya chilombo cha Ndane, nikulita ni yizavu yo. Aizere mwana Amisadai akapwe mwata wa A-Ndane.

²⁶ Chizavu chenyi a kwalula yapwa makumi asambano a tununu ni tununu aali ni kulakaji shimbiali.

²⁷ Kusulangana nenyi munyachi wa Ashe akajikile mbalaka jo. Pagiele mwana Okra akapwe mwata wa A-Ashe.

²⁸ Chizavu chenyi a kwalula yapwa makumi awana a tununu ni kanunu umuwika ni kulakaji atano.

²⁹ Mba munyachi wa Napatali. Aira mwana Ena akapwe mwata wa A-Napatali.

³⁰ Chizavu chenyi a kwalula yapwa makumi atano a tununu ni tununu atatu ni kulakaji awana.

³¹ A kwalula eswe a ku chilombo cha Ndane yapwa kulakaji lia tununu ni makumi atano a tununu ni tununu shimbiali ni kulakaji asambano. Wano akaye mu wenyi hanyima kwe ku mbandeira jo.

³² Wano ene a kwalula a kuli A-Izalele ku majiko ja atato. Eswe a kwalula a ku yilombo, nikulita ni yizavu yo, yapwa kulakaji asambano a tununu ni tununu atatu ni kulakaji atano ni makumi atano.

³³ Hindu A-Levi kaalwileko hakachi ka A-Izalele chizechene ngwe Yehova ambile Mose.

³⁴ Chocho chialingile A-Izalele nikulita ni yeswe Yehova ambile Mose. Chocho kwe ku mbandeira jo yajikilako mbalaka jo. Chocho ayile mu wenyi, mutu mweswe mu munyachi wenyi, nikulita ni majiko ja atato.