Kwalula 19 - MUKANDA USANDU WA ZAMBI 1975

¹ Yehova yamba kuli Mose ni kuli Arone ngwenyi,

² Achi chiyulo cha shimbi Yehova hanambe, chino, ngwenyi, Ambulwila A-Izalele anunehene chimbembe wa chihwo muchila mungunu, keshi chipa, kanda achimulemena kanga nilimwe tangwa.

³ Nukamuhane kuli sasendote Eleazare, iye akamutwale haze lia chilombo, mba akamushihe kumeso jenyi.

⁴ Mwe sasendote Eleazare akande amwe manyinga jenyi ha munwe, hikusapwila e manyinga jenyi yisuho shimbiali kulutwe lia mbalaka ya chikungulwila.

⁵ Mba akoche mwe chimbembe kumeso jenyi; ni kupu lienyi, ni yifwo yenyi, ni manyinga jenyi, hamwe ni ufwachi wenyi akamwoche.

⁶ Sasendote akande mutondo wa sedru, ni hisope, ni hina lia ngengu, hikuyimbila mukachi ka mutende wa kahia ka mwe chimbembe.

⁷ Mba sasendote akakose mazalo jenyi, akasane meya ku mujimba wenyi, mba manjila mu chilombo, mapwa wa luchisa ndo ha chingoloshi.

⁸ Mukwa kumwocha akakose mazalo jenyi ni meya, akasane meya ku mujimba wenyi, iye akapwe wa luchisa ndo ha chingoloshi.

⁹ Mutu umwe unapeme akakunge uto wa mwe chimbembe hikuutulika haze lia chilombo homa hapema, akaufungile chikungulwila cha A-Izalele mukulinga nawo meya a kupemesa no luchisa. Kuwapwa wa kupemesa nawo luchisa wa shili.

¹⁰ Mukwa kukunga we uto wa chimbembe akakose mazalo jenyi, iye akapwe wa luchisa ndo ha chingoloshi. Chikapwe chiyulo cha mutolo ni kuli A-Izalele ni kuli njize watwama hakachi ko.

¹¹ Mweswawo makwata ku mujimba wa mufu, akapwe wa luchisa matangwa shimbiali.

¹² Iye akalipemese ni e meya ha tangwa liamuchitatu, mba ha tangwa liamuchishimbiali iye makapema. Hindu nyi kechi kalipemesa ha tangwa liamuchitatu, mba ha tangwa liamuchishimbiali kechi kapema.

¹³ Mweswawo makwata ku mufu, te ku mujimba wa mutu wa kufwa, kalipemesene, iye kumakachisa tabernakulu ya Yehova. Mwe mutu akamutete kuli A-Izalele; mumu te kamusapwilile e meya a kupemesa no luchisa. Iye kumakapwa wa luchisa. Luchisa wenyi uchili hali iye.

¹⁴ Shimbi muze mutu mafwila mu mbalaka, yino: eswo manjila mu ye mbalaka ni eswo aawanyine mu mbalaka akapwe a luchisa matangwa shimbiali.

¹⁵ Yikwachilo yeswe ya washi, kaseleho yifuko, yikapwe ya luchisa.

¹⁶ Mweswawo mapwa mu yambu, mba makwata kuli umwe wa kushiha ni katana, hanji ku mujimba wa mufu, hanji ku chifwaha cha mutu, hanji ku fuka limwe, iye akapwe wa luchisa matangwa shimbiali.

¹⁷ Hali akwa luchisa, akande uto umwe wa ku mulambu wa kupemesa luchisa, yoze ochele, hikuwezaho meya enda mu chikwachilo.

¹⁸ Mukwa kupema akande hisope hikuyichupika mu e meya, akaasapwile ha mbalaka ni ha yikashi yeswe, ni hali atu apwangamo, ni hali mutu wakwatanga ku chifwaha, hanji kuli mutu wa kushiha ni katana, hanji kuli mufu, hanji ku fuka limwe.

¹⁹ Mukwa kupema akasapwile mukwa luchisa ha tangwa liamuchitatu ni ha tangwa liamuchishimbiali. Mba ha tangwa liamuchishimbiali akamupemese. Akakose mazalo jenyi. Akasane meya mba ha chingoloshi kumakapema.

²⁰ Alioze mukwa luchisa, nyi kasolo kulipemesa, akamutete hakachi ka chikungulwila; mumu iye hanachishi muma musandu mwa Yehova. E meya a kupemesa no kamusapwililo; iye wa luchisa.

²¹ Chikapwe chiyulo cha mutolo kuli ayo. Mukwa kusapwila e meya a kupemesa no akakose mazalo jenyi. Mweswawo makwata ku meya a kupemesa no akapwe wa luchisa ndo ha chingoloshi.

²² Cheswacho mukwa luchisa makwata chikapwe cha luchisa. Mweswawo machikwata akapwe wa luchisa ndo ha chingoloshi.