Kwalula 18 - MUKANDA USANDU WA ZAMBI 1975

¹ Yehova yamba kuli Arone ngwenyi, Ni yena ni ana je a malunga ni akwa jiko lia tatenu hamwe ni yena kumunukambata uhenge wa muma musandu. Ni yena ni ana je a malunga hamwe ni yena kumunukambata uhenge wa usasendote wenu.

² Ni akwenu nawa, akwa munyachi wa Levi, we munyachi wa kalamba ke, ukaakundamise hamwe ni yena, hanga akalinunge hamwe ni yena akakuvumbike; alioze yena ni ana je a malunga hamwe ni yena nukapwe kulutwe lia mbalaka ya Shindakenyo.

³ O akafunge ulayilo we, akalayile mu mbalaka yeswe; chino wika, o kanda akakundama ku yikashi ya muma musandu, ni ku chilumbilo, kuchina mafwa, chipwe ayo, chipwe yenu.

⁴ O akalinunge ni yena, akalayile mbalaka ya chikungulwila, mukulinga uvumbiko weswe wa mu mbalaka. Niumwe mukwo kanda akakundama kuli yena.

⁵ Yenu nukalayile muma musandu, nukalayile chilumbilo; kuchina utenu muukapwa nawa hali A-Izalele.

⁶ Yami hinachiza akwenu A-Levi hakachi ka A-Izalele. O kapwa chawana kuli yenu, haahana kuli Yehova, mukulinga uvumbiko wa mu mbalaka ya chikungulwila.

⁷ Yena ni ana je a malunga nukalayile usasendote wenu, ku yuma yeswe ya ku chilumbilo ni ya muchima lia chikalakala cha hina. Nukavumbike nawa. Ngunanwehe usasendote ukapwe milimo ya chawana. Nyi mukukundama umwe mukwo akamushihe.

⁸ Yehova yamba kuli Arone ngwenyi, Kutala! Hingunakwehe ulayilo wa milambu yami ya kuzundula, ewa yuma yeswe yisandu ya A-Izalele; kuli yena hingunayihana, mumu ha mukunda wa kuwayisa cha maji, ni kuli yena ni kuli ana je a malunga, yikapwe chiyulo cha mutolo.

⁹ Yino yikapwe ya yena ya ku yuma yisandu yahiana ya kwocha ku kahia, ngwami: milambu yo yeswe, te milambu yo yeswe ya wunga, ni milambu yo yeswe ha shili, ni milambu yo yeswe ya uhie, o mangulambulayo, yikapwe yisandu yahiana kuli yena ni kuli ana je a malunga.

¹⁰ Ukayilie ngwe yuma yisandu yahiana. Malunga eswe akayilie. Yikapwe yisandu kuli yena.

¹¹ Niye yino: mulambu wa kuzundula wa yawana yo, te milambu yeswe ya kuhungisa ya A-Izalele. Hingunakweheyo, ni kuli yena, ni kuli ana je a malunga, ni kuli ana je a mapwo hamwe ni yena, yikapwe chiyulo cha mutolo. Akwa jiko lie eswe anapeme akayilie.

¹² Maji eswe apema ahiana, ni vinyu yeswe yipema yahiana, ni ya mbuto, ye mihuko yitangu mayilambula kuli Yehova, hingunakweheyo yena.

¹³ Mihuko yitangu ya mu chifuchi cho cheswe mayineha kuli Yehova, yikapwe ya mbala ya yena. Akwa jiko lie eswe anapeme akayilie.

¹⁴ Yuma yeswe yajila ya mu Izalele yikapwe ya mbala ya yena.

¹⁵ Tupula-majimo eswe a kuli eswe malambula kuli Yehova, a kuli atu ni yimuna, akapwe a yena. Hindu tupula-majimo a atu ukaakule wate, ni tupula-majimo a yimuna a luchisa ukaakule.

¹⁶ Muze mapwa ni kakweji umuwika ukaakule. Ndando ya ukule wo Ukayisele shekele jitano ja prata, nikulita ni shekele ya muma musandu, yenayo kuyapwa makumi aali a ngera.

¹⁷ Kapula-jimo wa ngombe, hanji kapulajimo wa panga, hanji kapula-jimo wa pembe, kanda ukaakula; o kapwa asandu. Ukasapwile manyinga jo ha chilumbilo. Ukalumbe maji jo akapwe mulambu wa kahia, wa lupembo mupema kuli Yehova.

¹⁸ Yifwo yo yikapwe ya yena, ngwe pambo lia kuhungisa, ni ngwe chilama cha chindume, yikapwe ya yena.

¹⁹ Milambu yeswe ya kuzundula ya ku yuma yisandu A-Izalele matambula kuli Yehova, hingunakweheyo yena, ni kuli ana je a malunga, ni kuli ana je a mapwo hamwe ni yena, yikapwe chiyulo cha mutolo. Kuchapwa usendo wa mungwa wa mutolo kumeso ja Yehova kuli yena ni kuli ana je hamwe ni yena.

²⁰ Yehova yamba kuli Arone ngwenyi, Kanda ukapwa ni chihinga nichimwe mu chifuchi cho, chipwe kanda ukapwa ni chihanda hakachi ko. Chihanda che—yami. Chihinga che hakachi ka A-Izalele—yami.

²¹ Hingunahana kuli A-Levi yihanda yeswe ya ku kumi mu Izalele, yikapwe chihinga, mukwaononona ha uvumbiko o akuvumbika, te uvumbiko wa mu mbalaka ya chikungulwila.

²² Katuke musono A-Izalele kanda akakundama ku mbalaka ya chikungulwila, kuchina mambata mulonga, mba mafwa.

²³ A-Levi akalinge uvumbiko wa mu mbalaka ya chikungulwila; o akambate uhenge wo. Chikapwe chiyulo cha mutolo ndusu yisemuko yenu. Hakachi ka A-Izalele o kanda akapwa ni chihinga nichimwe.

²⁴ Mumu milambu ya A-Izalele ya yihanda ya ku kumi mayilambula kuli Yehova ngwe mulambu wa kuzundula, hingunayihana kuli A-Levi yikapwe chihinga cho. Kashika hinamba kuli ayo ngwami, Hakachi ka A-Izalele o kanda akapwa ni chihinga nichimwe.

²⁵ Yehova yamba kuli Mose ngwenyi,

²⁶ Chikwo nawa, amba kuli A-Levi ngwe, Muze munutambula kuli A-Izalele yihanda ya ku kumi hingunanwehe kuli ayo yikapwe chihinga chenu, nukalambule ku yenayo kuli Yehova mulambu wa kuzundula, chihanda cha ku kumi cha ku yihanda ya ku kumi.

²⁷ Mulambu wenu wa kuzundula makanwalwilawo ngwe mbuto ya ku chizungwilo, ngwe kwoka cha vinyu mu ukamino.

²⁸ Chocho nukalambule kuli Yehova mulambu wa kuzundula wa ku yihanda yenu yeswe ya ku kumi nwakutambula kuli A-Izalele. Ku yenayo nukahane kuli sasendote Arone mulambu wa kuzundula wa Yehova.

²⁹ Nukalambule milambu yeswe ya kuzundula ya Yehova ya ku yawana yenu yeswe, ya ku yuma yayo yipema yahiana, ndo yihanda yayo yisandu.

³⁰ Kashika amba kuli ayo ngwe, Muze munuzundula yihanda yayo yipema yahiana, nukalwileyo A-Levi, ngwe kwoka cha mbuto ya ku chizungwilo, ni ngwe kwoka cha vinyu mu ukamino.

³¹ Ni yenu ni akwa majiko jenu nukayilile mu yihela yeswayo; mumu kuyapwa kwononona chenu ha uvumbiko wenu wa mu mbalaka ya chikungulwila.

³² Mumu ha mukunda wayo kanda nukambata mutonga niumwe, muze munuzundula yipema yayo yahiana. Kanda nukapihisa yuma yisandu ya A-Izalele, kuchina munufwa.