Kwalula 17 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Hanjika ni A-Izalele, utambule milumbu kuli ayo, mulumbu kuli munyachi wa kalamba, mulumbu kuli munyachi wa kalamba, kuli miata jo eswe nikulita ni minyachi ya tulamba two, kumi lia milumbu ni milumbu yiali. Usoneke jina lia mutu mweswe ha mulumbu wenyi.

³ Usoneke jina lia Arone ha mulumbu wa Levi. Kuli mukwa lutwe mweswe wa minyachi ya tulamba two kukapwe mulumbu umuwika.

⁴ Ukayitulikile mu mbalaka ya chikungulwila, kwe kulutwe lia Shindakenyo muze nakulitakana ni yena.

⁵ Muchikapwa, mulumbu wa mwe mutu mungukatongola muusokoloka. Mba kulinyenyeta cha A-Izalele chize alinyenyeta hali yena mungukachiholesa kumeso jami.

⁶ Mose yahanjika ni A-Izalele; mba miata jo eswe yamwaha milumbu, mulumbu hali mwata, mulumbu hali mwata, nikulita ni minyachi ya tulamba two, te kumi lia milumbu ni milumbu yiali. Mulumbu wa Arone wapwile hamwe ni milumbu yo.

⁷ Mose yatulika ye milumbu kumeso ja Yehova mu mbalaka ya Shindakenyo.

⁸ Mukwachako, Mose wanjilile mu mbalaka ya Shindakenyo; kutala, mulumbu wa Arone wa ku munyachi wa Levi unasokoloka, unatemuna yitemo, unemi amendoa ja kuhia.

⁹ Mose yatuhwisa milumbu yeswe kumeso ja Yehova nikuyitwala kuli A-Izalele eswe. O yatala, mba mutu mweswe wanjile mulumbu wenyi.

¹⁰ Yehova yamba kuli Mose ngwenyi, Hilwisa mulumbu wa Arone kulutwe lia Shindakenyo, mukuufunga ukapwe chilayi cha akwa kukolema, hanga ukaholese kulinyenyeta cho hali yami, kuchina mafwa.

¹¹ Chocho alingile Mose, chizechene ngwe Yehova amwambile, chocho chialingile iye.

¹² A-Izalele yamba kuli Mose ngwo, Kutwafwa, kutwatoka, yetu eswe kutwatoka.

¹³ Eswe makundama, kukundama ku tabernakulu ya Yehova kumafwa; mba yetu eswe tukuwe nyi?