Kwalula 16 - MUKANDA USANDU WA ZAMBI 1975

¹ Mwe Kora, mwana wa Izehare, mwana wa Kohate, mwana wa Levi, hamwe ni Ndatane ni Apirame, ana a Eliape, ni One, mwana wa Pelete, ana a Rupene, atwalile malunga amwe.

² Yamana ha molu kumeso ja Mose, hamuwika ni A-Izalele amwe, ni kulakaji aali a miata ni makumi atano a miata a chikungulwila, te haatambika ku mbunga, malunga a lufuma.

³ Yalikungulula nikulimika ni Mose ni Arone, yamba kuli ayo ngwo, Hikwahwa ni yenu! Mumu akwa chikungulwila eswe asandu, mutu mweswe, Yehova hwali hakachi ko. Kuchi te nunalitangala helu lia mbunga ya Yehova?

⁴ Muze Mose achivwile, yafulamana hashi.

⁵ Yamba kuli Kora ni ku mbunga yenyi yeswe ngwenyi, Hamene Yehova makasolola yoze mapwa niwenyi, yoze mapwa musandu; makamukundamisa kuli iye. Yoze makamutongola, kumakamukundamisa kuli iye.

⁶ Lingenu chino: Enu Kora ni mbunga yenyi yeswe, andenu yikwachilo ya insensu.

⁷ Senumo kahia, senuho insensu nawa kumeso ja Yehova hamene; mba mweswawo Yehova mamutongola, iye akapwe musandu. Hikwahwa ni yenu, enu A-Levi.

⁸ Mose yamba kuli A-Kora ngwenyi, Enu A-Levi, panjikenu haliapwila.

⁹ Kumanyi chamokomoko kuli yenu nyi, se Zambi wa Izalele hananuhandununa ku chikungulwila cha A-Izalele, mukunukundamisa kuli iye mwene, nukalinge uvumbiko wa mu tabernakulu ya Yehova, nukamane kumeso ja chikungulwila, nukaavumbike?

¹⁰ Chamokomoko nyi, se hananukundamisa ni akwenu eswe A-Levi hamwe ni yenu nyi? Kumanyi nunafupu usasendote nawa nyi?

¹¹ Kashika ni yena ni mbunga ye yeswe nunakunguluka nikulimika ni Yehova. Arone kuchi apwa, nunalinyenyeta hali iye?

¹² Mose watumine akatambike Ndatane ni Apirame, ana a Eliape. O yamba ngwo, Kutwayileko.

¹³ Chamokomoko nyi, se watuchijile ku chifuchi kuze kunokela yamwa ni wuchi, ukatushihe mu puya, mba chatamba kulipwisa mwata wa yetu nawa nyi?

¹⁴ Chikwo nawa, yena kwatuhetesele ku chifuchi kuze kunokela yamwa ni wuchi, chipwe kutwaha chihinga cha minda ni minda ya uva kwatuheleyo; mba unazange kutuwa meso ja wano malunga nawa nyi? Kutwayileko.

¹⁵ Mose yatenuka chikolo, yamba kuli Yehova ngwenyi, Kanda ulemesa mulambu wo. Chatambwile kuli ayo chipwe chimbulu umuwika, chipwe kulinga chipi kuli umwe wa ayo, chamulingile chipi.

¹⁶ Mose yamba kuli Kora ngwenyi, Ni yena ni mbunga ye yeswe nukapwe hamene kumeso ja Yehova, ni yena, ni ayo, ni Arone.

¹⁷ Mutu mweswe akande chikwachilo chenyi, akasemo insensu, mutu mweswe akanehe chikwachilo chenyi kumeso ja Yehova, kulakaji aali a yikwachilo ni makumi atano a yikwachilo; ni yena nawa, ni Arone, mutu mweswe ni chikwachilo chenyi.

¹⁸ Mba mutu mweswe yanda chikwachilo chenyi, yasamo kahia, hikusaho insensu, yamana ku chikolo cha mbalaka ya chikungulwila hamwe ni Mose ni Arone.

¹⁹ Kora yakungulula chikungulwila cheswe nikulimika no kwe ku chikolo cha mbalaka ya chikungulwila. Ulemu wa Yehova yiusoloka ku chikungulwila cheswe.

²⁰ Yehova yamba kuli Mose ni Arone ngwenyi,

²¹ Lihandununenu ku chikungulwila chino, hanga ngwamanune mu kashimbu kakepekepe.

²² O yafulamana hashi, yamba ngwo, Zambi, mwe Zambi ya maspiritu a atu eswe, mutu umuwika mavulumuna mba mutenuka ni chikungulwila cheswe nyi?

²³ Yehova yamba kuli Mose ngwenyi,

²⁴ Amba ku chikungulwila ngwe, Katukenu ku mbalaka ya Kora, ni ya Ndatane, ni ya Apirame.

²⁵ Mose yakatuka, yaya kuli Ndatane ni Apirame. Makulwana a A-Izalele yamukaula.

²⁶ Yamba ku chikungulwila ngwenyi, Akwetu! Katukenu ku mbalaka ja wano yingulungulu, kanda nukwata yuma yo niyimwe, kuchina manumanuna mumu ha milonga yo yeswe.

²⁷ Chocho kweswe kwa kujingilika mbalaka ya Kora ni ya Ndatane ni ya Apirame o yakatuka. Ndatane ni Apirame yatuhuka, yamana ku yikolo ya mbalaka jo, ni mapwo jo, ni ana jo a malunga, ni twanuke two akepe.

²⁸ Mose yamba ngwenyi, Ku chino mununyingika ngwami, Yehova hanangutumu mukulinga yitanga yino yeswe; mumu chayitakile ku mbunge ya yami mwene.

²⁹ Nyi wano atu mafwa chizechene ngwe akufwa atu eswe, hanji nyi maatala nikulita ngwe matala atu eswe, mba Yehova kangutumine yami.

³⁰ Alioze nyi Yehova matanga chitanga chaha, hashi muhapakula kanwa liaho ni kwamina, hamwe ni yeswe ali nayo, nyi o mapalumuka a mwono ku Shiole, mba mununyingika ngwenu, Wano atu hanalelesa Yehova.

³¹ Muze iye machimana kuhanjika wano maliji, kumanyi hashi haze o te anamana hapulikile.

³² Hashi hapakwile kanwa liaho, hikwamina ni akwa mazuwo jo, ni malunga eswe a Kora ni yikwata yo yeswe.

³³ Chocho no ni yeswe ya ayo yapalumuka a mwono ku Shiole. Hashi yihaazemukina, o yakuwa hakachi ka mbunga.

³⁴ A-Izalele anaajingilika yachina ha kwivwa miteto yo; mumu ambile ngwo, Kuchina he hashi muhatumina yetu!

³⁵ Kahia yikatuhuka ka kuli Yehova, yikalalisa e kulakaji aali a atu ni makumi atano a atu waze machilambula insensu.

³⁶ Yehova yamba kuli Mose ngwenyi,

³⁷ Amba kuli Eleazare, mwana wa sasendote Arone, achange ye yikwachilo ya insensu ku mutende wa kahia mumu kuyapwa yisandu; usandwile kusuku ke kahia.

³⁸ Ye yikwachilo ya wano atu halivulumuna mwono woene, nukayifule yuma yasamana ya kutatula, yikapwe chifuko cha ha chilumbilo; mumu o yayilambula kumeso ja Yehova, kashika kuyapwa yisandu. Yikapwe chilayi kuli A-Izalele.

³⁹ Sasendote Eleazare yanda ye yikwachilo ya unengu, yize alambwile kuli waze awemene; yayitatula yikapwe chifuko cha ha chilumbilo.

⁴⁰ Chikapwe Chiwulwiso kuli A-Izalele, kuchina umwe mukwo, hi wa kuli ana a Arone ko, makundama, akoche insensu kumeso ja Yehova; hanga kechi kupwa ngwe Kora, ni ngwe mbunga yenyi; chizechene ngwe Yehova wambile kuli iye ku kanwa lia Mose.

⁴¹ Mukwachako chikungulwila cheswe cha A-Izalele yalinyenyeta hali Mose ni hali Arone ngwo, Hinwashiha atu a Yehova.

⁴² Muze te chikungulwila muchikunguluka nikulimika ni Mose ni Arone, yatala ku mbalaka ya chikungulwila; kutala, lie lelwa linayifuku, ulemu wa Yehova kuunasoloka.

⁴³ Mose ni Arone yaheta kulutwe lia mbalaka ya chikungulwila.

⁴⁴ Yehova yamba kuli Mose ngwenyi,

⁴⁵ Katukenu hakachi ka chikungulwila chino, hanga ngwamanune mu kashimbu kakepekepe. O yafulamana hashi.

⁴⁶ Mose yamba kuli Arone ngwenyi, Anda chikwachilo che, usemo kahia ka ku chilumbilo, useho insensu, uchitwale washi ku chikungulwila, uafukile shili yo; mumu utenu unatuhuka kuli Yehova, chilungo kuchinaputuka.

⁴⁷ Arone yanda ngwe ambile Mose, yazomboka ndo mukachi ka chikungulwila, kumanyi chilungo te hichaputuka mukachi ka atu. Yasaho ye insensu, yafukila shili e atu.

⁴⁸ Iye yamana mukachi ka afu ni a mwono. Che chilungo yichipatuka.

⁴⁹ Mba afu ku chilungo apwile kumi lia tununu ni tununu awana ni kulakaji shimbiali, mba kuwezaho waze afwile mumu ha chikuma cha Kora.

⁵⁰ Arone yahiluka kuli Mose ku chikolo cha mbalaka ya chikungulwila. Che chilungo yichipatuka.