Kwalula 15 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba kuli A-Izalele ngwe, Muze munukaheta ku chifuchi cha kutwama chenu, chize Yehova makanwaha,

³ nyi munukazanga kulambula kuli Yehova mulambu wa kahia, hanji mulambu wa kulumba, hanji chitapo, mukumanununa chilakenyo chimwe, hanji mulambu wa mbunge, hanji ha matangwa a yiwanyino yenu ya kutongola mukulambula kuli Yehova wa lupembo mupema, wa ku ngombe, hanji wa ku mapanga:

⁴ mba mukwa kulambula mulambu wenyi akalambule kuli Yehova mulambu wa wunga wa chihanda chimuwika cha ku kumi lia yihanda ya efa, wunga wafufunuka, wa kuchinga ni maji a chihanda chimuwika cha ku yihanda yiwana ya hine.

⁵ Ni vinyu ya mulambu wa kunwa, chihanda chimuwika cha ku yihanda yiwana ya hine, ukalulike hamwe ni mulambu wa kulumba, chipwe ha yitapo, hali mwana-panga mweswe.

⁶ Chipwe ha kuji ya panga ukalulike mulambu wa wunga wa yihanda yiali ya ku kumi lia yihanda ya efa, wunga wafufunuka, wa kuchinga ni chihanda chimuwika cha ku yihanda yitatu ya hine ya maji.

⁷ Mulambu wa kunwa ukaulambule wa chihanda chimuwika cha ku yihanda yitatu ya hine ya vinyu, wa lupembo mupema kuli Yehova.

⁸ Muze mululika kuji ya ngombe akapwe mulambu wa kulumba, hanji chitapo, mukumanununa chilakenyo chimwe, hanji milambu ya sambukila kuli Yehova,

⁹ ukalambule hamwe ni mwe kuji ya ngombe mulambu wa wunga wa yihanda yitatu ya ku kumi lia yihanda ya efa ya wunga wafufunuka, wa kuchinga ni chihanda cha hakachi cha hine ya maji.

¹⁰ Mulambu wa kunwa ukaulambule wa chihanda cha hakachi cha hine ya vinyu, chikapwe mulambu wa kahia, lupembo mupema kuli Yehova.

¹¹ Chocho nukalingile kuji mweswe wa ngombe, ni kuji mweswe wa panga, ni mwana-panga mweswe wa kuji, ni mwana-pembe mweswe.

¹² Nikulita ni eswe munukalula ni kwalulika, chocho nukalinge kuli eswe munukalula, umwe ni umwe.

¹³ Enyembo eswe akalinge yino yuma Chichize, ha kulambula mulambu wa kahia, wa lupembo mupema kuli Yehova.

¹⁴ Mba nyi njize yoze matwama hakachi kenu, hanji mweswawo hakachi kenu ku yisemuko yenu, matambula mulambu wa kahia, wa lupembo mupema kuli Yehova, chocho akalinge iye, chizechene ngwe yenu nwakulinga.

¹⁵ Ha kutwala ku chikungulwila, kukapwe chiyulo chimuwika ni cha yenu ni cha njize watwama hakachi kenu, chiyulo cha mutolo ndusu yisemuko yenu. Chize nwapwa yenu chocho apwe njize kumeso ja Yehova.

¹⁶ Shimbi yimuwika lume ni chiyulo chimuwika hali yenu ni hali njize watwama hakachi kenu.

¹⁷ Yehova yamba kuli Mose ngwenyi,

¹⁸ Amba kuli A-Izalele ngwe, Muze munukanjila mu chifuchi kuze mungukanuhetesa,

¹⁹ muze munukalia mbolo ya mu chifuchi, nukalambule kuli Yehova mulambu wa kuzundula.

²⁰ Nukalambule kuli Yehova chandanda cha ku mwaha wenu utangu, chikapwe mulambu wa kuzundula, ngwe mulambu wa kuzundula wa ku chizungwilo chocho munuulambula.

²¹ Cha ku mwaha wenu utangu nukahane kuli Yehova mulambu wa kuzundula ndusu yisemuko yenu.

²² Nyi munukapiasuka, kunwafungile maliji ano eswe a shimbi Yehova hanambe kuli Mose,

²³ ewa, yize yeswe anwambile kuli Yehova ku kanwa lia Mose, katuke ku lie tangwa Yehova wanwambile, ndo kulutwe, ndusu yisemuko yenu,

²⁴ nyi nwachilinga, kunwachinyingikine, te chikungulwila kachinyingikine, chikungulwila cheswe akalambule chimbembe wa kuji akapwe mulambu wa kulumba, wa lupembo mupema kuli Yehova, hamwe ni mulambu wawo wa wunga ni mulambu wawo wa kunwa, nikulita ni chiyulo, ni kuji ya pembe umuwika mulambu ha shili.

²⁵ Sasendote akatukile chikungulwila cheswe cha A-Izalele, mba makaakonekena; mumu te chapwa cha susumuku, o te haneha mulambu wo, mulambu wa kahia kuli Yehova, ni mulambu wo ha shili nawa kumeso ja Yehova, mumu ha kupiasuka cho.

²⁶ Chikungulwila cheswe cha A-Izalele makaakonekena hamwe ni njize watwama hakachi ko, mumu ha kutwala kuli atu eswe, te chapwa cha susumuku.

²⁷ Nyi mutu mavulumuna mulonga wa susumuku, henaho iye akalambule chihwo cha pembe wa mwaka umuwika, akapwe mulambu ha shili.

²⁸ Sasendote akatukile mukwa kupiasuka muze mavulumuna mulonga wa susumuku, akamufukile kumeso ja Yehova, mba kumakamukonekena.

²⁹ Nukapwe ni shimbi yimuwika lume hali mukwa kuvulumuna mulonga wa susumuku; ni hali mwenyembo hakachi ka A-Izalele, ni hali njize watwama hakachi kenu.

³⁰ Alioze nyi mutu malinga chuma cha kulengumuka, chipwe mwenyembo chipwe njize, makashililika Yehova, auze mutu akamutete hakachi ka atu jenyi.

³¹ Mumu te iye halelesa liji lia Yehova, hatangula liji lia shimbi yenyi, auze mutu akamutete liakulu; uhenge wenyi ukamushate.

³² Shimbu A-Izalele achili mu puya o yawana mutu kanamakuna tete ha tangwa lia Sambata.

³³ Waze amuwanyine nikumakuna tete yamutwala kuli Mose ni Arone ni ku chikungulwila cheswe.

³⁴ Yamufunga, mumu te kanda achipatula chize malinga kuli iye.

³⁵ Yehova yamba kuli Mose ngwenyi, Mwe mutu numushihe lume. Chikungulwila cheswe amwase mawe haze lia chilombo.

³⁶ Chikungulwila cheswe amutwalile haze lia chilombo yamwasa mawe, yafwa; chizechene ngwe Yehova ambile Mose.

³⁷ Yehova yamba kuli Mose ngwenyi,

³⁸ Amba kuli A-Izalele akalitungile sapo ku mapula ja mahina jo, ndusu yisemuko yo. Ku lusapo mweswe wa ku mapula akase wanda umwe ulauluka.

³⁹ Jikapwe sapo kuli yenu hanga ha kutalaho nukewuluke maliji eswe a shimbi ja Yehova, nukaalinge, kuchina munukaula mbunge ja yenwene ni meso ja yenwene, yenayo nwakukaula ni kulinga ukoi.

⁴⁰ Chocho nukewuluke kulinga maliji eswe a shimbi jami, nukapwe asandu kuli Zambi yenu.

⁴¹ Yami Yehova Zambi yenu, nanuchijile ku chifuchi cha Engitu ngukapwe Zambi yenu. Yami Yehova Zambi yenu.