Kwalula 14 - MUKANDA USANDU WA ZAMBI 1975

¹ Akwa chikungulwila eswe yahetula liji lio, yateta. Ufuku uze atu alilile.

² A-Izalele eswe yalinyenyeta hali Mose ni Arone, akwa chikungulwila eswe yamba kuli ayo ngwo, Mala, kachi twafwile mu chifuchi cha Engitu; chipwe kachi twafwile muno mu puya yino!

³ Kuchi te Yehova hatuhetesa ku chifuchi chino, hanga atushihe ni katana nyi? Ni mapwo jetu ni ana jetu makapwa funge; Shinaho tuhilukenu ku Engitu?

⁴ O yamba umwe kuli mukwo ni mukwo ngwo, Tutongolenu kasongo, tuhilukenu ku Engitu.

⁵ Hohene Mose ni Arone yafulamana kumeso ja mbunga yeswe ya chikungulwila cha A-Izalele.

⁶ Yoshua, mwana wa Nune, ni Kalemba, mwana wa Yefune, a kuli waze asembwile chifuchi, yasonya mazalo jo.

⁷ O yamba ku chikungulwila cheswe cha A-Izalele ngwo, Chifuchi chize twendesele nikuchisembula, kuchapwa chifuchi chipema chikolo.

⁸ Nyi Yehova wawahilila muli yetu, iye kumakatunjisa mu chino chifuchi, kumakatwahacho; chifuchi kuze kunokela yamwa ni wuchi.

⁹ Chuma chimuwika, kanda nukolema Yehova, chipwe kanda nuvwila woma atu atwama mu chifuchi, o kanapu kulia chetu; chize malikwasa nacho hichaachina. Yehova hwali hamwe ni yetu. Kanda nwavwila woma.

¹⁰ Alioze chikungulwila cheswe yamba ngwo, Twasenu mawe. Ulemu wa Yehova yiusoloka mu mbalaka ya chikungulwila kuli A-Izalele eswe.

¹¹ Yehova yamba kuli Mose ngwenyi, Ndo mwiji muka wano atu mapwa nikungunyehuna? Ndo mwiji muka keshi kungufuliela, chipwe o hanamono yilayi yeswe nalingile hakachi ko?

¹² Kumungwalamba ni chilungo, kumungwakundukila chifuchi, kumungupwisa yena vungu linene, liakangana, vungu lia ayo te likepe.

¹³ Mose yamba kuli Yehova ngwenyi, Nyi chocho, A-Engitu kumachivwa, mumu yena ni ndundo je wachijile wano atu hakachi ko.

¹⁴ O kumakachambulula kuli atu atwama mu chifuchi chino. O hevwa ngwo, Yehova hwali hakachi ka wano atu; mumu yena wakulimona no meso ni meso. Lelwa lie kuliakumana helu lio. Yena kuwakwatetekela, ha mwalwa mu nguji lia lelwa, ni ha ufuku mu nguji lia kahia.

¹⁵ Mba, nyi yena mushiha wano atu ngwe mushiha mutu umuwika, aho akwa mavungu waze evwile lufuma we kumakahanjika ngwo,

¹⁶ Mumu te Yehova kahashile kuhetesa wano atu ku chifuchi chize walakenyene ni shingo kwaahacho, kashika hanaashihi mu puya.

¹⁷ Haliapwila ngunaliumbu kuli yenu ngwami, Mwane, tachi ja Mwene jikapwe jinene, nikulita ngwe yenu nwambile ngwenu,

¹⁸ Yehova, iye makoke kutenuka, utu wa zango lienyi kuwalumbama, nikukonekena uhenge ni uvulumunyi, ngwenyi, kechi kuhasa kusambisa mukwa kuhia. Alioze kakufwetesa ana uhenge wa yisemi ku chisemuko chamuchitatu, ni ku chamuchiwana.

¹⁹ Mwane, nukonekene kama uhenge wa wano atu, nikulita ni unene wa utu wa zango lienu, nikulita ngwe yenu hinwakonekena wano atu, katuke ku Engitu ndo haliapwila.

²⁰ Yehova yamba ngwenyi, Hinakonekena nikulita ni liji lie.

²¹ Alioze, chamwenemwene, ni mwono wami, chizechene ngwe hashi heswe muhakatakana ni ulemu wa Yehova,

²² wano malunga eswe amwene ulemu wami ni yilayi yami yize nalingile mu Engitu ni mu puya, hanangweseka kumi lia yisuho, o kahalakanyine ku liji liami;

²³ o kechi kamona wate che chifuchi nalakenyene ni shingo kuhana kuli tulamba two, chipwe niumwe wa kuli ayo angunyehwine kechi kachimona.

²⁴ Alioze Kalemba, kavumbi kami, mumu iye kali ni Spiritu yeka, hanangukaula liakulu, kumungukamuhetesa iye ku chifuchi kuze ayile iye. Ana jenyi makachizuka.

²⁵ A-Amaleke ni A-Kanana kanatwama mu chikulo; hamene hilukenu nuye ku puya, ku jila ya kuya ku Kalunga-lwiji Muchila.

²⁶ Yehova yamba kuli Mose ni kuli Arone ngwenyi,

²⁷ Ndo mwiji muka mungulihumikiza ni chikungulwila chino chipi? Kakulinyenyeta ni yami. Kunevwa kulinyenyeta cha A-Izalele chize alinyenyeta ni yami.

²⁸ Ambenu kuli ayo ngwenu, Yehova ngwenyi, Ni mwono wami, chamwenemwene chizechene ngwe hinwamba ku matwi jami, chocho mungulinga kuli yenu.

²⁹ Mijimba yenu ya kufwa muyikalimbuka mu puya yino. Eswe a kwalula a kuli yenu, nikulita ni kwalula chenu cheswe, chize kuli akwa makumi aali a miaka ndo kuli makulwana waze halinyenyeta ni yami,

³⁰ chamwenemwene kunuchi kaheta ku che chifuchi, ha kutwala ku chenacho nalakenyene ni shingo ngwami, Mungukanutwamisamo, shina Kalemba, mwana wa Yefune, ni Yoshua, mwana wa Nune.

³¹ Alioze ana jenu, hali ayo yenu nwambile ngwenu, O kumapwa funge, mungukaahetesamo, mba o kumakanyingika che chifuchi hinwalitunacho yenu.

³² Alioze ha kutwala kuli yenu, mijimba yenu ya kufwa muyikalimbuka mu puya yino.

³³ Ana jenu makendangana mu puya makumi awana a miaka, makamona lamba mumu ha ukoi wenu, ndo mijimba yenu ya kufwa mayimanuna mu puya.

³⁴ Nikulita ni kwalula cha matangwa nwasembwile chifuchi, te makumi awana, ha tangwa mwaka, ha tangwa mwaka, munukambata uhenge wenu, makumi awana a miaka. Munukanyingika kulimuna chami.

³⁵ Yami Yehova hinahanjika, chamwenemwene chino cheswe kumungukachilinga ku chikungulwila chino cheswe chipi, analikungulula nikulimika ni yami. Muno mu puya makaamanuna lume, momwene makafwila.

³⁶ E malunga aatumine kuli Mose mukusembula chifuchi; waze ahilukile, anyenyetesele chikungulwila cheswe kuli iye ha kuhetesa lusango mupi ha kutwala ku chifuchi,

³⁷ malunga waze ahetesele lusango mupi wa chifuchi, yafwa ku chilungo kumeso ja Yehova.

³⁸ Alioze Yoshua, mwana wa Nune, ni Kalemba, mwana wa Yefune, a kuli malunga ayile mukusembula chifuchi, o wika atwamine ni mwono.

³⁹ Mose yambulwila A-Izalele eswe maliji ano. E atu yalishimwoka chikolo.

⁴⁰ O yalimeneka ha chimene, yaya ndo ku mbulwa mulundu, ngwo, Yetu ano, kumutukaya kuma Yehova hanalakenya, mumu hitwavulumuna.

⁴¹ Mose yamba ngwenyi, Kuchi te haliapwila nunatangula liji lia shimbi ya Yehova, se kuchichi kuwaha?

⁴² Kanda nukanduka mumu Yehova keshi hakachi kenu, kuchina munukalambama kuli akwa kole jenu.

⁴³ Mumu kokwene A-Amaleke ni A-Kanana kulutwe lienu ali, kumunukafwa ku katana; mumu hinwachina kukaula Yehova, kashika Yehova kechi kupwa hamwe ni yenu.

⁴⁴ Alioze o, ku tachi jo, yeseka kukanduka ndo ku mbulwa mulundu; alioze chipwe mushete wa usendo wa Yehova, chipwe Mose kakatukile ku chilombo.

⁴⁵ Haze hene hapalumukine A-Amaleke ni A-Kanana, aze atwamine ha we mulundu, yaalamba ni kwaonwona, ndo ku Horoma.