Kwalula 13 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Utume malunga akasembule chifuchi cha Kanana, chize ngunahana kuli A-Izalele. Mutu umuwika wa ku munyachi weswe wa atato utume, mutu mweswe mwata hakachi ko.

³ Mose yaakatwisa ku puya ya Parane nikulita ni liji lia shimbi ya Yehova, malunga eswe akwa lutwe a A-Izalele.

⁴ Majina jo wano: Shamua, mwana wa Zakure, wa ku munyachi wa Rupene;

⁵ Sefate, mwana wa Hore, wa ku munyachi wa Simeone;

⁶ Kalemba, mwana wa Yefune, wa ku munyachi wa Yunda;

⁷ Ingale, mwana wa José, wa ku munyachi wa Isaka;

⁸ Hosea, mwana wa Nune, wa ku munyachi wa Eframe;

⁹ Palite, mwana wa Rafu, wa ku munyachi wa Mbenjamine;

¹⁰ Ngadiele, mwana wa Sondi, wa ku munyachi wa Zapulone;

¹¹ Ngadi, mwana wa Susi, wa ku munyachi wa José (ngwami, wa ku munyachi wa Manase);

¹² Amiele, mwana wa Ngemali, wa ku munyachi wa Ndane;

¹³ Seture, mwana wa Mikele, wa ku munyachi wa Ashe;

¹⁴ Napi, mwana wa Vofshi, wa ku munyachi wa Napatali;

¹⁵ Ngewele, mwana wa Make, wa ku munyachi wa Ngate.

¹⁶ Wano e majina a malunga Mose watumine mukusembula chifuchi. Mose yaluka Hosea, mwana wa Nune, jina ngwenyi, Yoshua.

¹⁷ Mose yaatuma mukusembula chifuchi cha Kanana. Yamba kuli ayo ngwenyi, Kandukilenu ku jila yino ya ku Negeve, kandukenu ndo ku milundu.

¹⁸ Nutale chifuchi chize chipwa, ni atu atwamamo, kwatala shina yitakame, nyi shina alelu; shina o akehe, nyi shina anji.

¹⁹ Ni chize chipwa chifuchi, shina chipema nyi shina chipi. Ni membo muze atwama ayo, shina mu yilombo, nyi shina mu yihunda ya kukolesa.

²⁰ Ni chize chipwa chifuchi, nyi shina mavu jacho anawaha, nyi shina haseka; kutala nyi mitondo yilimo nyi ka. Hamukenu, nunehe mihuko yimwe ya mu chifuchi. Mwaka wacho te mwaka wa kuhela uva yitangu kuhia.

²¹ Chocho akandukile, yasembula chifuchi, katuke ku puya ya Zini ndo ku Rehobo, ndo ku unjililo wa ku Hamate.

²² O yakandukila ku Negeve, yaheta ku Heprone. Kwapwileko A-Ahimane, ni A-Sheshai, ni A-Talamai, eswe A-Anake. (Heprone te liatungiwile miaka shimbiali shimbu kanda achitunga Zoane mu Engitu.)

²³ Yaheta ku chikulo cha Esekole, yatetako mutango ni chichakata chimuwika cha uva, atu aali yachikulika ha mukambo. Yatwala nawa jimwe romana ni makuyu.

²⁴ Chihela chize yachiluka jina ngwo, Chikulo cha Esekole mumu ha chichakata chize A-Izalele ateteleko.

²⁵ Ha kuhwa cha makumi awana a matangwa o yahiluka ha kusembula chifuchi.

²⁶ Yaheta kuli Mose ni kuli Arone ni ku chikungulwila cheswe cha A-Izalele, ku puya ya Parane, ku Kandeshe. Yatwa lusango kuli ayo, ni ku chikungulwila cheswe, yaalweza ye mihuko ya mu chifuchi.

²⁷ Yaambulwila ngwo, Twahetele ku chifuchi kuze nwatutumine, kuze kunokela yamwa ni wuchi, mba ye mihuko yamo yino.

²⁸ Hindu e atu atwama mu chifuchi yitakame, membo jacho akolo, anene chikolo. Chikwo nawa yitumonako A-Anake.

²⁹ A-Amaleke katwama mu chifuchi cha Negeve; ni A-Hete, ni A-Yepushe, ni A-Amore katwama ku milundu; ni A-Kanana katwama ku mbaka ni mu chikulo cha Yordau.

³⁰ Kalemba yaholesa atu kumeso ja Mose ngwenyi, Tukandukenu haliapwila, tukachizuke; mumu tunahase kanawa kuchikumba.

³¹ Alioze e malunga waze akandukile hamwe nenyi yamba ngwo, Kutwahashile kukanduka nikulimika ni aze atu, mumu o katakama, yetu, ka.

³² O yahetesa kuli A-Izalele lusango mupi wa che chifuchi chize asembwile ngwo, Chifuchi chize twendesele nikuchisembula, kuchakumanuna atu aze atwamamo. Aze atu eswe twamwene kapwa asuku chikolo.

³³ Momwene twamwene yindululu, A-Anake, ana a yindululu; twalimwene yetwene ngwe mapasu, ni chocho twapwile kumeso jo.