Kwalula 12 - MUKANDA USANDU WA ZAMBI 1975

¹ Miriame ni Arone ahanjikile nikulimika ni Mose, mumu hali pwo Ka-Kushe amumbachile kuli Mose, se iye hambata pwo Ka-Kushe.

² Ngwo, Te Yehova hahanjika ni Mose wika nyi? Iye kahanjikile ni yetu nawa? Mba Yehova yachivwa.

³ Mwe lunga Mose wapwile mukwa kushimbika chikolo. Ha kushimbika iye wahianyine atu eswe apwile hashi.

⁴ Susumuku Yehova yamba kuli Mose, ni kuli Arone, ni kuli Miriame ngwenyi, Yenu atatu, tuhukenu, nwize ku mbalaka ya chikungulwila. O atatu yatuhuka.

⁵ Yehova yahulumuka mu nguji lia lelwa, yamana kwe ku chikolo cha mbalaka, yatambika kuli Arone ni Miriame. O aali yatuhuka.

⁶ Ngwenyi, Panjikenu maliji jami. Kachi profeta hwali hakachi kenu, yami Yehova kumungulisolola kuli iye mu usolwelo, kumunguhanjika nenyi mu chilota.

⁷ Kuchapwile chocho ni kavumbi kami Mose, iye mutu wa jika mu zuwo liami lieswe.

⁸ Nakuhanjika nenyi kanwa ni kanwa, zwa lume, hi ni yitaka ko, ka. Iye kumakamona kulifwa cha Yehova. Kuchi te kunwevwile woma kuhanjika nikulimika ni Mose kavumbi kami?

⁹ Utenu wa Yehova yiukasumuka hali ayo, iye yakatuka.

¹⁰ Lie lelwa yilikatuka helu lia mbalaka, kutala Miriame hapwa mukwa mbumba, mutoma ngwe neve. Arone yatala Miriame, kumanyi, hapwa mukwa mbumba.

¹¹ Arone yamba kuli Mose ngwenyi, Mwata wami, ngunakulembe, kanda utushata mutonga uno, mumu te twalinga ni uhepuke, mumu te hitwavulumuna.

¹² Mwane, Miriame kanda apwa ngwe mufu, ngwe umwe matuhuka mu jimo lia naye, chihanda cha musunya wenyi chaliwa kulu.

¹³ Mose yateta kuli Yehova ngwenyi, Zambi, ngunaliumbu kuli yena, umuhindwise kama.

¹⁴ Yehova yamba kuli Mose ngwenyi, Kachi tato wamufwilile mate ha meso te iye kechi kupwa ni sonyi matangwa shimbiali nyi? Amwajilile haze lia chilombo matangwa shimbiali mba kulutwe hikumuhilwisa nawa.

¹⁵ O yájilila Miriame haze lia chilombo matangwa shimbiali. E atu kendele ndo hahilwisa Miriame nawa.

¹⁶ Kulutwe e atu endele katuke ku Hazerote, mba ku puya ya Parane o yasa chilombo cho.