Kwalula 11 - MUKANDA USANDU WA ZAMBI 1975

¹ Atu alinyenyetene nikuhanjika yipi ku matwi ja Yehova. Muze Yehova achivwile, utenu wenyi wakasumukine, mba kahia ka kuli Yehova kalekwokele hakachi ko. Yikalalisa ku songo lia chilombo.

² E atu yateta kuli Mose. Mose yalemba kuli Yehova, mba ke kahia yikakeketela.

³ Yaluka chihela chize ngwo, Tabera, mumu kahia ka kuli Yehova kalekwokele hakachi ko.

⁴ Mbunga ya atu a kulichinga hakachi ko evwile usolo, ni A-Izalele nawa alilile cheka nawa ngwo, Iya matwaha yifwo tulie?

⁵ Tunewuluka yishi aze twalile chawana ku Engitu, ni tusakwa, ni ulenga, ni cebola jeka ni jeka, ni alho.

⁶ Alioze haliapwila hijatuhwa, nichimwe chiliko chakuhi. Kutushi chuma kumeso jetu shina yino maná lume.

⁷ Ye maná yapwile ngwe mbuto ya koentru. Kuyitala ngwe ndeliume.

⁸ E atu alimwangine nikuyikunga. Ayichekele ni mawe, hanji kuyitwa mu chinu. Ayitelekele mu ndeho. Alingile nayo tumbolo. Kuyipanjika ngwe tumbolo twa kulinga ni maji.

⁹ Muze mume wasulumiokene ha chilombo ha ufuku, ye maná yapwilileho.

¹⁰ Mose wevwile atu nikulila, akwa minyachi yo eswe ndusu lume, mutu mweswe ku chikolo cha mbalaka yenyi. Mba utenu wa Yehova yiukasumuka chikolo. Chapihilile Mose.

¹¹ Mose yamba kuli Yehova ngwenyi, Kuchi te hiwangulinga chipi? yami kavumbi ke? kuchi te chawanyine vumbi kumeso je, ukangutwike chiteli cha wano atu eswe?

¹² Te yami nasesekele ufumba wa wano atu nyi? Te yami naasemene? hanga ukambe kuli yami ngwe, Wambate mu kondo ye, ngwe chisemi mukwa kulela mambata mwana unamu, ndo ku chifuchi yena walakenyene ni shingo kuhana kuli tulamba two nyi?

¹³ Kulihi munguwana yifwo nguhane kuli wano atu eswe? Mumu kanalili kuli yami ngwo, Twehe yifwo tulie.

¹⁴ Chahashile ukawami kumbata wano atu eswe, mumu te chalema naye kuli yami.

¹⁵ Nyi mulinga chocho kuli yami ungushihe haliapwila, nyi nawana vumbi kumeso je. Kanda ngumona lamba lino lia yami.

¹⁶ Yehova yamba kuli Mose ngwenyi, Ukungulwile kuli yami makumi shimbiali a malunga a kuli makulwana a A-Izalele, unaanyingika ngwe kapwa makulwana ja e atu, ni tulayi two. Watwale ku mbalaka ya chikungulwila, hanga amanyineko hamwe ni yena.

¹⁷ Munguhulumuka nguhanjikeko ni yena. Munguchiza kuli Spiritu yoze uli hali yena, mungunwisa hali ayo, mba kumakambata chiteli cha atu hamwe ni yena hanga kuchi kachimbata yena mwene ukawe.

¹⁸ Ukambe kuli atu ngwe, Nulisele ku usandu mumu ha tangwa lia hamene kumunukalia yifwo se hinwalilila ku matwi ja Yehova ngwenu, Iya matwaha yifwo tulie? Mumu chapwile chipema kuli yetu mu Engitu. Kashika Yehova kumakanwaha yifwo. Kumunukalia.

¹⁹ Kunuchi kalia tangwa limuwika, chipwe matangwa aali, chipwe matangwa atano, chipwe kumi lia matangwa, chipwe makumi aali a matangwa, ka.

²⁰ Alioze kakweji mweswe, ndo ye yifwo muyikatuhuka ku mazulu jenu. Kumuyikanusekela, se hinwalituna Yehova yoze watwama hakachi kenu, se hinwalila kumeso jenyi ngwenu, Yika te twakatukile ku Engitu?

²¹ Mose yamba ngwenyi, E atu hakachi ko nguli, hapwa makumi asambano a tununu a malunga akwenda hashi. Yena hiwamba ngwe, Mungwaaha yifwo, hanga akalie kakweji mweswe.

²² Kumanyi maashihila mapanga ni ngombe, akaakuchise nyi? Hanji yishi eswe a mu kalunga-lwiji maswila hamuwika akaakuchise?

²³ Yehova yamba kuli Mose ngwenyi, Te kwoko lia Yehova hiliahiha nyi? Haliapwila munyingika shina mungumanununa liji liami, nyi shina ka.

²⁴ Mose yakatuka, yambulwila atu maliji a Yehova. Yakungulula makumi shimbiali a malunga a kuli makulwana ja e atu, yaasela kwa kujingilika mbalaka.

²⁵ Yehova yahulumuka mu lelwa, yahanjika nenyi, yachiza kuli Spiritu wapwile hali iye, yamusa hali e makumi shimbiali a makulwana. Mba muze te mwe Spiritu hapwila hali ayo, o yaprofeteza, hindu kalingile chocho nawa.

²⁶ Mwasalile mu chilombo malunga aali, jina lia mukwo Eldade ni jina lia mukwo Medade. Mwe Spiritu yapwila hali ayo, o te apwile a kuli waze asonewene, alioze kayile ku mbalaka. O yaprofeteza mu chilombo.

²⁷ Kwazombokele mukweze umwe, yambulwila Mose ngwenyi, Ni Eldade ni Medade kanaprofeteza mu chilombo.

²⁸ Yoshua, mwana wa Nune, kavumbi ka Mose, wa kuli malunga a kutongola, yakumbulula ngwenyi, Mwata Mose, wakanjise kama.

²⁹ Mose yamba kuli iye ngwenyi, Unaavwila ukwa mumu hali yami nyi? Ngunazange kachi atu eswe a Yehova kapwa aprofeta, hanga Yehova ase hali ayo Spiritu yenyi.

³⁰ Mose yanjila mu chilombo, iye ni makulwana a A-Izalele.

³¹ Kwakatukile fuji yimwe ya kuli Yehova, yiyineha ngwali a ku kalunga-lwiji ndo ku chilombo, ngwe mbandu jiali helu lia hashi, ku sali likwo ngwe wenyi wa tangwa, ni ku sali likwo ngwe wenyi wa tangwa, kwa kujingilika chilombo.

³² E atu akatukile tangwa lize lieswe, ni Ufuku weswe, ni mu kucha tangwa lieswe, yakunga e ngwali. Mukwa kukunga akehe yakunga kumi lia homere. O hikulianyikino hashi kwa kujingilika chilombo.

³³ Shimbu ye yifwo yichili ku mazo jo, te shimbu kanda ayinjakula, utenu wa Yehova yiukasumukina hali e atu. Yehova yalamba atu ni chilungo chinene.

³⁴ Yaluka chihela chize jina ngwo, Kibrote-Hatava, mumu kokwene afunjile atu aze evwile usolo.

³⁵ Katuke ku Kibrote-Hatava e atu endele ndo ku Hazerote, mba kwe ku Hazerote o yatwama.