Kwalula 10 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Ulifulile yitavwi yiali ya prata. Uyifule ku milimo ya kutatula. Yikapwe ya kutambika chikungulwila, ya kwakatwisa ku yilombo.

³ Muze mayimba yeswe ni yiali akwa chikungulwila eswe malikungulwila kuli yena ku chikolo cha mbalaka ya chikungulwila.

⁴ Nyi memba chitavwi chimuwika lume, haze hene miata, e akwa lutwe a tununu twa A-Izalele malikungulwila kuli yena.

⁵ Muze munwimba chitavwi cha kutoweza, mba akwa yilombo atwama ku sali lia ku Chivumbuko akaye kulutwe.

⁶ Muze munwimba kamuchiali che chitavwi cha kutoweza, akwa yilombo atwama ku sali lia ku Sule o makaula. Akembe chitavwi cha kutoweza cha kukatuka.

⁷ Alioze muze akwa chikungulwila malikungulula, munwimba chitavwi. Hindu kanda nukatoweza.

⁸ Asasendote, ana a malunga a Arone, o akembe yitavwi. Yikapwe chiyulo cha mutolo kuli yenu ndusu yisemuko yenu.

⁹ Mu chifuchi chenu muze munwasa jita ni mukwa kole wa kunumwesa lamba, nukembe yitavwi ya kutoweza, mba makanwiwuluka kumeso ja Yehova Zambi yenu. Makanulamwina kuli akwa kole jenu.

¹⁰ Chizechene nawa ha tangwa lia chiseke chenu, ni ha yiwanyino yenu ya kutongola, ni ha uputukilo wa tukweji twenu, yitavwi nukayimbile helu lia milambu yenu ya kulumba ni helu lia yitapo ya milambu yenu ya sambukila. Yikapwe Chiwulwiso kuli yenu kumeso ja Zambi yenu. Yami Yehova Zambi yenu.

¹¹ Ha mwaka wamuchiali, ha kakweji wamuchiali, ha tangwa makumi aali lia mwe kakweji, lelwa yilikatuka ha tabernakulu ya shindakenyo.

¹² A-Izalele yakatuka ku puya ya Sinai nikulita ni kwenda cho. Lie lelwa liamanyine ku puya ya Parane.

¹³ Endele chisuho chitangu nikulita ni shimbi ya Yehova mu kanwa lia Mose.

¹⁴ Hatangu mbandeira ya chilombo cha A-Yunda yiyikatuka nikulita ni yizavu yo. Kasongo ka chizavu cho iye Nasone, mwana wa Aminandambe.

¹⁵ Kasongo ka chizavu cha munyachi wa A-Isaka iye Netanele, mwana wa Zuare.

¹⁶ Kasongo ka chizavu cha munyachi wa A-Zapulone iye Eliape, mwana wa Helone.

¹⁷ Yazula ye tabernakulu. A-Ngeshone ni A-Merari yakatuka, o te akwa kumbata tabernakulu.

¹⁸ Mbandeira ya chilombo cha Rupene yiyikatuka nikulita ni yizavu yo. Kasongo ka chizavu cho iye Elizure, mwana wa Sedure.

¹⁹ Kasongo ka chizavu cha munyachi wa A-Simeone iye Selumiele, mwana wa Zurisadai.

²⁰ Kasongo ka chizavu cha munyachi wa A-Ngate iye Eliasafe, mwana wa Duele.

²¹ A-Kohate yakatuka nikumbata yuma ya muma musandu. Shimbu o kanda aheta, tabernakulu ya kumika kulu kuli akwo.

²² Mbandeira ya chilombo cha A-Eframe yiyikatuka nikulita ni yizavu yo. Kasongo ka chizavu cho iye Elisama, mwana wa Amihude.

²³ Kasongo ka chizavu cha munyachi wa A-Manase iye Ngamaliele, mwana wa Pedazure.

²⁴ Kasongo ka chizavu cha munyachi wa A-Mbenjamine iye Abidane, mwana wa Ngideonyi.

²⁵ Mbandeira ya chilombo cha A-Ndane te yapwile sali lia nyima ya yilombo yeswe, yiyikatuka nikulita ni yizavu yo. Kasongo ka chizavu cho iye Aizere, mwana wa Amisadai.

²⁶ Kasongo ka chizavu cha munyachi wa A-Ashe iye Pagiele, mwana wa Okra.

²⁷ Kasongo ka chizavu cha munyachi wa A-Napatali iye Aira, mwana wa Ena.

²⁸ Chocho chapwile kwenda cha A-Izalele nikulita ni yizavu yo, ha kukatuka.

²⁹ Mose yamba kuli Hobabe, mwana wa Reuele, Ka-Mindiane, tato-weno ya Mose ngwenyi, Mu wenyi tuli, tukaye ku chifuchi chize Yehova ambile ngwenyi, Mungunwahacho. Tweyenu hamwe ni yetu, mutunulinga kapema; mumu Yehova hanahanjika yipema ha kutwala kuli A-Izalele.

³⁰ Mwe Hobabe yamba kuli iye ngwenyi, Chichi i kuyako. Munguya ku chifuchi chami mwene ni kuli usoko wami.

³¹ Mose yamba ngwenyi. Mwane, kanda nutuhichika kama. Nunanyingika, ngwami, mu puya chize mutusa yilombo yetu, mba yenu munukapwa kuli yetu ngwe meso.

³² Muchikapwa, nyi yenu munuya hamwe ni yetu, ngwami, yuma yipema Yehova makatulinga yetu, yiyene kumutukanulinga yenu.

³³ O yakatuka ku mulundu wa Yehova, yaya wenyi wa matangwa atatu. Mushete wa usendo wa Yehova waatetekelele ha wenyi wa matangwa atatu, mukwafupila haze mahwimina.

³⁴ Lie lelwa lia Yehova liapwile helu lio ha mwalwa, ha kukatuka ku chilombo.

³⁵ Muze we mushete wakatukile Mose wambile ngwenyi, Yehova, ukatuke. Akwa kole je amwangane. Akwa kukuvwila kole achine kumeso je.

³⁶ Muze mushete watulile, iye wambile ngwenyi, Yehova, uhiluke kuli tununu ha tununu twa Izalele.