Kutuhuka 9 - MUKANDA USANDU WA ZAMBI 1975

¹ Hohene Yehova yamba kuli Mose ngwenyi, Njila kuli Falau ukambe kuli iye ngwe, Chocho anambe Yehova, Zambi ya A-Hepreu ngwenyi, Echa atu jami aye, akangulingile.

² Nyi yena mwakwika, kusolo kwaecha kuya,

³ kwoko lia Yehova mulikapwa hali yimuna je waze ali mu yambu, ni hali tuvwalu, ni hali yimbulu, ni hali tumelu, ni hali ngombe, ni hali mapanga. Kumukukapwa chilungo chipi.

⁴ Yehova kumakahandununa hakachi ka yimuna ja A-Izalele ni ja A-Engitu. Alioze hali yimuna ja A-Izalele, niumwe mafwa wakuhi.

⁵ Yehova yatongola tangwa ngwenyi, Hamene Yehova makalinga chuma chino mu chifuchi.

⁶ Mba mu kucha Yehova yalinga chuma chize. Yimuna eswe a A-Engitu yafwa. Ahoze ku yimuna eswe a A-Izalele kukwafwile niumwe, ka.

⁷ Falau yatuma akatale; kumanyi, kuli yimuna ja A-Izalele kukwapwile chipwe umuwika wafwa, ka. Hindu mbunge ya Falau yakalile. Kechele atu kuya, ka.

⁸ Yehova yamba kuli Mose ni kuli Arone ngwenyi, Zomonenu moko aali a tò ni uto wa ku lutengo. Mose atakumune ha tetela kumeso ja Falau.

⁹ Mba kumuwalumuka fufuta yikepekepe ha chifuchi cheswe cha Engitu. Kumuwalumuka ukapwe mahute a kuneha yivunda ni hali atu, ni hali tushitu, ndusu mu chifuchi cheswe cha Engitu.

¹⁰ O yanda uto wa ku lutengo, yamana kumeso ja Falau, Mose yautakumuna ha tetela, mba yiwalumuka mahute a kuneha yivunda, ni hali atu, ni hali tushitu.

¹¹ E yimbanda kahashile kumana kumeso ja Mose mumu ha mahute, mumu mahute apwile hali e yimbanda, ni hali A-Engitu eswe.

¹² Yehova yakalisa mbunge ya Falau, kahalakanyine kuli ayo, chizechene ngwe Yehova wambile kuli Mose.

¹³ Yehova yamba kuli Mose ngwenyi, Ulimeneke ha chimene ukamane kumeso ja Falau, umwambulwile ngwe, Chocho anambe Yehova, Zambi ya A-Hepreu, ngwenyi, Echa atu jami aye, akangulingile.

¹⁴ Chisuho chino kumungutuma misongo yami yeswe ku mbunge ye, ni kuli ngamba je, ni kuli atu je, ukanyingike ngwe, Hashi heswe wakuhi niumwe walifwa ni yami, ka.

¹⁵ Mumu kachi nolola kwoko liami ni kulamba yena ni atu je ni chilungo, kachi munukakuwa hashi.

¹⁶ Alioze chamwenemwene mumu ha chikuma chino hinakwaha mwono, ngukakulweze tachi jami, hanga jina liami akaliambujole hashi heswe.

¹⁷ Yena hindu hiwalinangamisa mukulimika ni atu jami, kusolo kwaecha kuya, nyi?

¹⁸ Hamene, tangwa Chichize, kumungukanokesa chiwe cha makelekeshi, chize kanda chinoka ku Engitu, chize ku mwaka uze aputukile kutunga chifuchi ndo haliapwila, ka.

¹⁹ Kashika tuma haliapwila upupwise kunjisa yimuna je hamwe ni waze eswe uli no mu yambu, mumu atu eswe ni tushitu eswe ali mu yambu, nyi kechi kwaneha ku zuwo, che chiwe muchikaanoka, mba kumakafwa.

²⁰ Hakachi ka ngamba ja Falau mweswawo wevwile woma wa liji lia Yehova yanjisa mu mazuwo ngamba jenyi ni yimuna jenyi.

²¹ Yoze walengulwile liji lia Yehova, yahichika mu yambu ngamba jenyi ni yimuna jenyi.

²² Yehova yamba kuli Mose ngwenyi, Olola kwoko lie kwilu hanga kukapwe chiwe mu chifuchi cheswe cha Engitu, ni hali atu, ni hali tushitu, ni ha yeswe ya kusoka mu musenge, ndusu chifuchi cheswe cha Engitu.

²³ Mose yazundula kwilu mulumbu wenyi, mba Yehova yatuma kukulunguza ni chiwe. Kahia yikahulumukina hashi. Yehova yanokesa chiwe ha chifuchi cheswe cha Engitu.

²⁴ Chocho kwapwile chiwe ni kahia ka kulichinga ni chiwe ni kuhenyahenya, chiwe cha makelekeshi chize kanda chipwa mu chifuchi cheswe cha Engitu chize haze aputukile kupwa vungu.

²⁵ Che chiwe yichilamba yuma yeswe ya mu yambu ndusu chifuchi cheswe cha Engitu. Yichilamba atu, ni tushitu, ni yeswe ya kusoka mu musenge. Yichishiha mitondo yeswe ya mu yambu.

²⁶ Kumwapwile chiwe mu chifuchi cha Ngoshone wika muze mwatwamine A-Izalele.

²⁷ Falau yatuma, yasanyika Mose ni Arone, yamba kuli ayo ngwenyi, Musono navulumuna. Yehova iye mukwa ululi. Yami ni atu jami tuli yingulungulu.

²⁸ Hikwahwa, liumbenu kuli Yehova. Kukulunguza cha ngolo ni chiwe chipatuke. Mungunwecha nuye. Kunuchi kashimbula nawa, ka.

²⁹ Mose yamba kuli iye ngwenyi, Cheswe mungutuhuka mwimbo mungwolola moko jami kuli Yehova. Kukulunguza kumuchihwa, chipwe kukuchi kapwa nawa chiwe, ka, hanga ukanyingike ngwe, Hashi heswe ha mbala ha Yehova.

³⁰ Alioze ha kutwala kuli yena ni ngamba je, ngunanyingika ngwami, Chipwe haliapwila kunuchi kavwila woma Yehova Zambi.

³¹ Ni wanda ni sevada yalambiwile mumu te sevada hiyapwa ni mafufu, ni wanda hiwatemuna yitemo.

³² Alioze tiliku ni mbuka kuyalambiwile, ka, mumu te kanda yichikola.

³³ Mose yatuhuka mwimbo, yahichika Falau, yolola moko jenyi kuli Yehova, mba kukulunguza ni chiwe yalitwaminyine ni vula kapukukile nawa hashi.

³⁴ Muze Falau amwene te mwe vula ni chiwe ni kukulunguza hiyalitwamina, yavulumuna cheka; yakalisa mbunge yenyi, neye ni ngamba jenyi.

³⁵ Mbunge ya Falau yakalile, kechele A-Izalele kuya, ka, chizechene ngwe Yehova wambile ku kanwa lia Mose.