Kutuhuka 6 - MUKANDA USANDU WA ZAMBI 1975

¹ Yehova yamba kuli Mose, ngwenyi, Kamunomuno mukamona chize yami mungukalinga, kuli Falau, mumu te ha kwoko lia tachi makaecha, ni ha kwoko lia tachi iye makaahuma haze lia chifuchi chenyi.

² Zambi yahanjika ni Mose, ngwenyi, Yami Yehova.

³ Nalisolwele kuli Apalahama ni kuli Izake ni kuli Yakomba ngwami, Yami Zambi Mukwa-Ndundo-Jeswe. Alioze ku jina liami lia Yehova, o kamunyingikine.

⁴ Nakolesele no usendo wami mukwaaha chifuchi cha Kanana, chifuchi cha unjize wo kuze atwamine njize.

⁵ Chikwo nawa hinevwa mikuma ya A-Izalele hanaakase kuli A-Engitu mu upinji. Hinewuluka usendo wami.

⁶ Kashika amba kuli A-Izalele ngwe, Iye Yehova. Kumakanuchiza kushi lia yiteli ya A-Engitu; makanupulula ku upinji wo; makanukula ni kwoko lia kwolola ni yitanga yinene ya upatwilo.

⁷ Makanutambula nukapwe atu jenyi. Kumakapwa Zambi yenu. Enu kumunukanyingika ngwenu, Yehova Zambi yetu, iye mukwa kutuchiza kushi lia yiteli ya A-Engitu.

⁸ Kumakanuhetesa ku chifuchi chize washingile ngwenyi, Mungukachihana kuli Apalahama ni kuli Izake ni kuli Yakomba. Mungukanwahacho chihinga. Yami Yehova.

⁹ Mose wahanjikile chocho ni A-Izalele alioze kapanjikile kuli Mose mumu ha kulipupula cha mbunge, ni mumu ha upinji ukalu.

¹⁰ Yehova yahanjika ni Mose ngwenyi,

¹¹ Yako uhanjike ni Falau mwanangana wa Engitu, akeche A-Izalele akakatuke ku chifuchi chenyi.

¹² Mose yahanjika kumeso ja Yehova ngwenyi, Mwane, A-Izalele kahalakanyine kuli yami, ka, ngwe kuchi Falau mangwivwa, yami nguli mukwa chilimi?

¹³ Mba Yehova yahanjika ni Mose ni Arone nikwaaha shimbi hali A-Izalele ni hali Falau mwanangana wa Engitu, akachize A-Izalele ku chifuchi cha Engitu.

¹⁴ Miata ja majiko ja akako ngwo, Rupene, mwana mutangu wa Izalele, ana jenyi a malunga akwa jiko lienyi, wano; ni Hanoke, ni Palu, ni Hezerone, ni Kame.

¹⁵ Ana a malunga a Simeone akwa jiko lienyi wano; ni Yemule, ni Yamine, ni Ohate, ni Yakine, ni Zohare, ni Shalo, mwana wa umwe pwo mukwa Kanana.

¹⁶ Majina ja ana a malunga a Levi nikulita ni yisemuko yo, wano; ni Ngeshone, ni Kohate, ni Merari. Mba miaka ya mwono wa Levi yapwile kulakaji lia miaka ni makumi atatu a miaka ni miaka shimbiali.

¹⁷ Ana a malunga a Ngeshone nikulita ni majiko jo, wano; Lipini ni Shimei.

¹⁸ Ana a malunga a Kohate, wano; ni Amarame, ni Izehare, ni Heprone, ni Uziele. Miaka ya mwono wa Kohate yapwile kulakaji lia miaka ni makumi atatu a miaka ni miaka yitatu.

¹⁹ Ana a malunga a Merari, wano; ni Mahile ni Mushi, a minyachi ya A-Levi nikulita ni yisemuko yo.

²⁰ Amarame wambachile Yokepete, ndumbu wa tato. Yasema nenyi Arone ni Mose, mba miaka ya mwono wa Amarame yapwile kulakaji lia miaka ni makumi atatu a miaka ni miaka shimbiali.

²¹ Ana a malunga a Izehare, wano; ni Kora, ni Nefwe, ni Zikiri.

²² Ana a malunga a Uziele, wano; ni Mishaele, ni Elezafwa, ni Shitiri.

²³ Mba Arone wambachile Eleshipa, mwana wa pwo wa Aminandambe, pangi ya Nashone. Iye yasema nenyi Nandambe, ni Ambihu, ni Eleazare, ni Itama.

²⁴ Ana a malunga a Kora, akwa jiko lienyi, wano; ni Asere, ni Elekana, ni Apasa.

²⁵ Eleazare, mwana wa lunga wa Arone, wambachile umwe wa kuli ana a mapwo a Putiele. Iye yasema nenyi Finehase. Wano te miata ja akwa jiko lia akako ja A-Levi nikulita ni minyachi yo.

²⁶ E a Arone ni Mose kuli wano Yehova yamba ngwenyi, Chizenu A-Izalele ku chifuchi cha Engitu nikulita ni yizavu yo.

²⁷ O ahanjikile ni Falau mwanangana wa Engitu akachize A-Izalele ku Engitu, wano a Mose ni Arone.

²⁸ Ha tangwa lize muze ahanjikile Yehova ni Mose mu chifuchi cha Engitu,

²⁹ Yehova yamba kuli Mose ngwenyi, Yami Yehova. Hanjika ni Falau mwanangana wa Engitu chize cheswe ngunambe kuli yena.

³⁰ Kumeso ja Yehova, Mose yamba ngwenyi, Mwane, yami nguli mukwa chilimi. Ngwe kuchi Falau mahalakana kuli yami?