Kutuhuka 5 - MUKANDA USANDU WA ZAMBI 1975

¹ Kulutwe Mose ni Arone yanjila, yamba kuli Falau ngwo, Chocho anambe Yehova, Zambi ya A-Izalele, ngwenyi, Echa atu jami aye akangulingile chiwanyino mu puya.

² Falau yamba ngwenyi, Yehova iya? Mba ngupanjike ku liji lienyi, ngweche A-Izalele kuya? Ami Chanyingikine Yehova, chikwo nawa chichi kwecha A-Izalele kuya.

³ O yamba ngwo, Zambi ya A-Hepreu hatakana ni yetu. Tunaliumbu, utweche, tuye wenyi wa matangwa atatu mu puya tukalambule yitapo kuli Yehova Zambi yetu, kuchina hanji iye matulundumukina ni chilungo hanji ni katana.

⁴ Mwanangana wa Engitu yamba kuli ayo ngwenyi, Enu Mose ni Arone kuchi te nunachiza atu ku milimo yo? Yénu ku yiteli yenu.

⁵ Falau yamba ngwenyi, Haliapwila atu ali mu chifuchi hapwa anji, mba nunaahwimisa ku yiteli yo.

⁶ Tangwa lize liene Falau watuminyine tupatashi twa atu hamwe ni tupita two ngwenyi,

⁷ Kanda nuhana nawa kuli atu mwambu wa kutenga nawo tijolo ngwe kunyima, akaye ene akonge mwambu.

⁸ Alioze twikenu hali ayo kwalula chizechene cha tijolo ngwe kunyima, kanda nutepululako mumu kanahehe ni milimo, kashika kanatete ngwo, Tweche, tuye, tukalambule yitapo kuli Zambi yetu.

⁹ Twikenu malunga ni milimo yikalu yahiana akahondanganemo, kanda akapanjika maliji a mahuza.

¹⁰ Mba e tupatashi twa atu atuhukile hamwe ni tupita two. Yahanjika ni atu ngwo, Chocho anambe Falau ngwenyi, Chichi kunwaha mwambu.

¹¹ Yénu yenwene nukande mwambu kweswako munuuwana mumu milimo yenu niyimwe kuyichi katepuluka.

¹² Chocho e atu alimwangine ndusu mu chifuchi cheswe cha Engitu mukukonga shachi ajitenge ngwe mwambu.

¹³ Tupatashi akapalishile e atu ngwo, Hetesenu milimo yenu, milimo ya tangwa ha tangwa, chizechene ngwe muze mwapwile mwambu.

¹⁴ Mba tupita twa kuli A-Izalele waze aaselele aalambile kuli tupatashi twa Falau. Ambile ngwo, Kuchi te kunwahetesele milimo yenu ni ya zau ni ya musono kulinga tijolo ngwe kunyima?

¹⁵ Hohene yaheta tupita twa kuli A-Izalele, yateta kuli Falau, ngwo, Kuchi te unalingi chocho ni yetu ngamba je?

¹⁶ Kuli yetu ngamba je keshi kuhana mwambu. O kanambe kuli yetu ngwo, Tengenu tijolo, mba kumanyi kanatulambe yetu ngamba je, alioze mulonga wa mbala wa atu je.

¹⁷ Alioze iye wambile ngwenyi, Nunahehe lume, nunahehe ni milimo, kashika nunambe ngwenu, Tweche, tuye, tukalambule yitapo kuli Yehova.

¹⁸ Kashika yénu nulinge milimo, mumu kechi kunwaha mwambu hindu kumunukahetesa kwalula cha tijolo.

¹⁹ Muze ambile ngwo, Kunuchi katepulula nichimwe ku tijolo jenu, ku milimo yenu ya tangwa ha tangwa, tupita twa kuli A-Izalele amwene pundu ngwo, Chinapiha ni yetu.

²⁰ Yatakana ni Mose ni Arone o te kanamanyina mu jila muze atuhukile kumeso ja Falau.

²¹ Yamba kuli ayo ngwo, Yehova anutale. Iye apatule mumu hinwatunukisa ni vumba lipi kumeso ja Falau ni kumeso ja ngamba jenyi ha kuhana katana mu kwoko lio akatushihe.

²² Mose yahiluka kuli Yehova, yamba ngwenyi, Mwene kuchi te hiwalinga chipi kuli atu ano, mumu yika unakangutumina?

²³ Mumu hanga nahetele kuli Falau mukuhanjika mu jina lie iye hanalingi yipi kuli wano atu. Chipwe kupulula atu je kwaapulwile nichimwe.