Kutuhuka 40 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Ha tangwa litangu lia kakweji mutangu Ukamike ye tabernakulu ya mbalaka ya chikungulwila.

³ Ukanjisemo we mushete wa Shindakenyo. Ukafuke mushete ni hina lia chikalakala.

⁴ Ukanjisemo mesa. Ukaleho yuma yize yiliho. Ukanjisemo chikwachilo cha ndeya. Ukawike je ndeya jacho.

⁵ Ukatumbike chilumbilo cha oru cha kwochelaho insensu kulutwe lia mushete wa Shindakenyo hikuzezeleka hina lia kufuka chikolo cha ku tabernakulu.

⁶ Ukatumbike chilumbilo cha milambu ya kulumba kulutwe lia chikolo cha ku tabernakulu ya mbalaka ya chikungulwila.

⁷ Ukatumbike lumbasia lwa kusanyina hakachi ka mbalaka ya chikungulwila ni chilumbilo. Ukasemo meya.

⁸ Ukajike yize ya kujingilika kweswe. Ukazezeleke hina lia kufuka chikolo cha ku yize.

⁹ Ukande maji a kuwayisa no, ukawayise ye tabernakulu ni yize yeswe yilimo. Ukayisele ku usandu ni yikashi yeswe yayo. Yikapwe yisandu.

¹⁰ Ukawayise ni maji chilumbilo cha milambu ya kulumba hamwe ni yikashi yacho yeswe. Ukasele ku usandu che chilumbilo. Chilumbilo chikapwe chisandu chahiana.

¹¹ Ukawayise ni maji lumbasia lwa kusanyina hamwe ni nganda yalwo. Ukayisele ku usandu.

¹² Ukahetese Arone ni ana jenyi a malunga ku chikolo cha ku mbalaka ya chikungulwila. Ukaasanyise meya.

¹³ Ukajike Arone mazalo asandu. Ukamuwayise ni maji. Ukamusele ku usandu hanga akangulingile usasendote.

¹⁴ Ukasake ana jenyi a malunga. Ukaajike yikuto.

¹⁵ Ukaawayise chizechene ngwe wawayisa ni maji tato hanga o akangulingile usasendote. Ha kwawayisa ni maji chikapwe kuli ayo ha usasendote wa mutolo ndusu yisemuko yo.

¹⁶ Chocho Mose walingile nikulita ni yeswe Yehova wamwambile. Chocho chialingile iye.

¹⁷ Ha kakweji mutangu wa mwaka wamuchiali, ha tangwa litangu lia mwe kakweji yajika ye tabernakulu.

¹⁸ Mose yajika ye tabernakulu, yala yimanyino yayo. Yamika matabua jayo, yanjisamo njalo jayo. Yajika manguji jayo.

¹⁹ Yazazulula mbalaka helu lia tabernakulu. Yasa chifuko cha ye mbalaka helu liayo kwilu, chizechene ngwe Yehova ambile kuli Mose.

²⁰ Yanda Shindakenyo, yasa mu mushete. Yasa milumbu ha mushete. Yanangika chitwamo cha keke helu ha we mushete.

²¹ Yanjisa mushete mu tabernakulu. Yazezeleka chikalakala cha hina, yasweka we mushete wa Shindakenyo chizechene ngwe Yehova ambile kuli Mose.

²² Yanjisa mesa mu mbalaka ya chikungulwila ku lumbu lia ku Norte lia ku tabernakulu, haze lia chikalakala cha hina.

²³ Yalaho mbolo kumeso ja Yehova chizechene ngwe Yehova ambile kuli Mose.

²⁴ Yanjisa chikwachilo cha ndeya mu mbalaka ya chikungulwila hatalanganyi ni ye mesa ku lumbu lia ku Sule lia ku tabernakulu.

²⁵ Yawika je ndeya kumeso ja Yehova chizechene ngwe Yehova ambile kuli Mose.

²⁶ Yanjisa chilumbilo cha oru mu mbalaka ya chikungulwila kulutwe lia chikalakala cha hina.

²⁷ Yochelaho insensu ya lupembo mupema, chizechene ngwe Yehova ambile kuli Mose.

²⁸ Yasa chifuko ku chikolo cha ku tabernakulu.

²⁹ Ya-tumbikila chilumbilo cha milambu ya kulumba ku chikolo cha ku tabernakulu ya ku mbalaka ya chikungulwila. Yalambwilaho mulambu wa kulumba ni mulambu wa wunga, chizechene ngwe Yehova ambile kuli Mose.

³⁰ Yatumbika lumbasia lwa kusanyina hakachi ka mbalaka ya chikungulwila ni chilumbilo. Yasamo meya a kusana.

³¹ Ni Mose ni Arone ni ana jenyi a malunga apwile nikusanamo ku moko jo ni ku molu jo.

³² Apwile nikusana muze manjila mu mbalaka ya chikungulwila, ni muze makundama ku chilumbilo, chizechene ngwe Yehova ambile kuli Mose.

³³ Yamika yize ya kujingilika tabernakulu ni che chilumbilo. Yazezeleka hina lia kufuka chikolo cha ku yize. Chocho Mose wamanunwine milimo yeswe.

³⁴ Mba lelwa yilifuka ye mbalaka ya chikungulwila. Ye tabernakulu yiyizala ni uhenya wa Yehova.

³⁵ Mose te kahashile kunjila mu mbalaka ya chikungulwila mumu te lie lelwa liatwamineho ni ye tabernakulu yazalile ni uhenya wa Yehova.

³⁶ Muze lie lelwa mulizunduka ku tabernakulu A-Izalele masenya kulutwe ndusu mawenyi jo eswe.

³⁷ Alioze nyi lelwa kuliazundukile mba kechi kuya mu wenyi ndo tangwa lize mulizunduka.

³⁸ Mumu te lie lelwa lia Yehova liapwile ha tabernakulu ha mwalwa. Mwapwilemo kahia ha ufuku kumeso ja A-Izalele eswe ndusu mawenyi jo eswe.