Kutuhuka 4 - MUKANDA USANDU WA ZAMBI 1975

¹ Mose yakumbulula ngwenyi, Alioze mwane, o kechi kungufuliela chipwe kupanjika ku liji liami, ka, mumu mamba ngwo, Yehova kasolokele kuli yena.

² Yehova yamba kuli iye ngwenyi, Acho chika uli nacho mu kwoko? Yamba ngwenyi, Mulumbu.

³ Yehova yamba ngwenyi, U-mbila hashi. Yaumbila hashi. Yiwalumuka kapela, mba Mose yamuchina.

⁴ Yehova yaimba kuli Mose ngwenyi, Zoza kwoko lie umukwate ku muchila. Yazoza kwoko lienyi, yamukwata, yalumuka mulumbu mu kwoko lienyi.

⁵ Hanga akafuliele ngwo, Yehova, Zambi ya tulamba twetu, Zambi ya Apalahama, Zambi ya Izake, Zambi ya Yakomba hanasoloka kuli yena.

⁶ Chikwo nawa Yehova yamba kuli iye ngwenyi, Njisa kwoko lie mu tulo ye. Yasa kwoko lienyi mu tulo yenyi, alioze muze yalichiza, kumanyi kwoko lienyi ni mbumba, litoma to ngwe neve.

⁷ Yamba kuli iye ngwenyi, Njisa kwoko lie mu tulo ye cheka nawa. Cheka nawa yanjisa kwoko lienyi mu tulo yenyi mba muze yalichiza, kumanyi hilialumuka nawa chimuwika ni mujimba wenyi weswe.

⁸ Mba, kachi o kechi kukufuliela chipwe kupanjika ku liji lia chilayi chitangu, kumakafuliela liji lia chilayi cha kusula.

⁹ Hindu kachi o kechi kufuliela yilayi yize yiali, chipwe kupanjika ku liji lie, ka, ukaswite meya a mu lwiji ukaamwange hashi, mba e meya muswita a mu lwiji, kumalumuka manyinga hashi.

¹⁰ Mose yamba kuli Yehova ngwenyi, Mwene, ami chishi kuhasa kuhanjika ni kushilinginya chipwe matangwa a kunyima, chipwe a haliapwila, ka, chipwe katuke ku tangwa lize wahanjikile ni yami kavumbi ke, nguli mutu wa kuhanjika makoke, limi liami lilemu.

¹¹ Yehova yamba kuli iye ngwenyi, Watangile kanwa lia mutu iya? Iya mapwisa mutu kamama? Hanji kafwa-matwi, hanji mukwa kulaula meso, hanji kapuputa? Hi yami ko Yehova nyi!

¹² Kashika haliapwila yako; mungukapwa ni kanwa lie; mungukakulongesa chize muhanjika.

¹³ Mose yamba ngwenyi Mwene, utume kama mutu weka.

¹⁴ Utenu wa Yehova yiukasumuka hali Mose, yamba ngwenyi, Yayenu Arone Ka-Levi keshiko nyi? Ngunanyingika ngwami, Iye kananyingika kuhanjika ni kushilinginya. Chikwo nawa ngwenyi, Tala, kaneza mukutakana ni yena. Muze makumona, mevwa chiseke mu mbunge yenyi.

¹⁵ Hanjika nenyi yena ukase maliji mu kanwa lienyi. Yami mu ngukapwa hamwe ni kanwa lie ni hamwe n kanwa lienyi. Mungukakulongesa chize yena, mukalinga.

¹⁶ Iye mukwa kukuhanjikila kuli atu. Iye kumakapwa kanwa kuli yena. Yena kumukapwa ngwe Zambi kuli iye

¹⁷ Mbata mulumbu uno mu kwoko lie mukalinga nawo ye yilayi.

¹⁸ Mose yahiluka kuli tato-weno Yetoru Yamba kuli iye ngwenyi, Ungutayize kama ngukahiluke kuli akwetu mu Engitu, ngukatale shina achili ni mwono nyi ka. Yetoru yamba kuli Mose ngwenyi, Uye kanawa

¹⁹ Yehova yamba kuli Mose mu Mindiane ngwenyi, Yako ukahiluke ku Engitu, mumu malunga eswe afupile kukushiha hanafu.

²⁰ Mba Mose yaya hamuwika ni mukwo-pwo ni ana jenyi a malunga kanaatwamisa hali chimbulu. Yahiluka ku Engitu. Mose te mulumbu wa Zambi kanaumbata mu kwoko lienyi.

²¹ Yehova yamba kuli Mose ngwenyi, Muze mukahiluka ku Engitu tala kanawa, ukalinge kumeso ja Falau yikomokeso yize yeswe nasele mu kwoko lie. Alioze mungukakalisa mbunge yenyi; iye kechi kwecha e atu kuya.

²² Ukambe kuli Falau ngwe, Chocho anambe Yehova ngwenyi, Izalele iye mwanami; mwanami mutangu.

²³ Yami namba kuli yena ngwami, Echa mwanami aye akangulingile. Nyi yena kusolo kumwecha, tala, mungukashiha mwané, mwané mutangu.

²⁴ Mba mu jila, ku zuwo lia kuzeka ngeji Yehova yatakana ni Mose, yafupa kumushiha.

²⁵ Haze hene Zepora yanda liwe lia kuheta, yateta musosha wa mwanenyi, yaumbila ku molu jenyi ngwenyi, Chamwenemwene yena kuwapwa lunga wa manyinga kuli yami.

²⁶ Chocho yamwecha. Haze hene pwo yamba ngwenyi, Lunga liami wa manyinga, mumu ha ungalami.

²⁷ Mba Yehova yamba kuli Arone ngwenyi, Yako mu puya ukatakane ni Mose. Yaya, yatakana nenyi ku mulundu wa Zambi, yamumbeja.

²⁸ Mose yambulwila Arone maliji eswe Yehova wamutumine no ni yilayi yeswe amwambile.

²⁹ Mose ni Arone yaya, yakungulula hamuwika makulwana eswe a A-Izalele.

³⁰ Arone walumbunwine maliji eswe Yehova te hanambe kuli Mose. Yalinga ye yilayi kumeso ja atu.

³¹ E atu afulielele mba muze evwile ngwo, Yehova te hanangisa A-Izalele, hamona luyinda wo, hohene yahetamisa mitwe yo nikuwayila.