Kutuhuka 39 - MUKANDA USANDU WA ZAMBI 1975

¹ Mba ku mahina alauluka, ni a ufungo, ni a ngengu, o yatonga ni ulangaji mazalo a kuvumbikila muma musandu. Yatonga mazalo asandu a Arone chizechene ngwe Yehova ambile kuli Mose.

² Iye yatonga ye efode ya oru, ni ya mahina alauluka, ni a ufungo, ni a ngengu, ni apema atoma.

³ Yatatula ye oru yikapwe chipenya chilelu, hikuyiteta sambu akayisepekenye ku mahina alauluka, ni a ufungo, ni a ngengu, ni apema atoma. Chitanga cha chilangaji.

⁴ Yayilingila yipaya ya kutolokenya, kwe ku masongo aali jayo yayitolokenyena.

⁵ We muya wa ponda wa ulangaji, uze wapwileho wa kuyijichika, wapwile te wa hina limuwika, wa milimo yimuwika te wa oru wa mahina alauluka, ni a ufungo, ni a ngengu, ni apema atoma, chizechene ngwe Yehova ambile kuli Mose.

⁶ Yatota mawe a sardonica a kunjisa mu maselo ja oru a kwola ngwe kwola cha ha kazeya nikulita ni majina ja ana a Izalele.

⁷ Yaanangika ha yipaya ya ye efode akapwe mawe a Chiwulwiso hali A-Izalele, chizechene ngwe Yehova ambile kuli Mose.

⁸ Yalinga chipwiko, chitanga cha chilangaji, chalifwa ni milimo ya efode te cha oru, cha mahina alauluka, ni a ufungo, ni a ngengu, ni apema atoma.

⁹ Malumbu eswe jacho a kulita ndwa lume, cha kupama. Usuhe wacho wa chikambakamba chimuwika; utohe wacho wa chikambakamba chimuwika; cha kupama.

¹⁰ Yanjisamo mikala yiwana ya mawe. Mukala wa mawe a sartiu, ni a topajiu, ni a carbunkulu; ano apwile mukala utangu.

¹¹ Mukala wamuchiali wa esmeralda, ni safwira, ni diamante.

¹² Mukala wamuchitatu wa jasendu ni agata ni ametita.

¹³ Mukala wamuchiwana wa turkeza, ni sardonica, ni jasepe. A kunjisa mu maselo jo ja oru.

¹⁴ E mawe apwile nikulita ni majina ja ana a Izalele te kumi ni aali nikulita ni majina jo ngwe kwola cha ha kazeya, vungu lieswe nikulita ni jina lialio, kumi lia mavungu ni mavungu aali.

¹⁵ Yafulila ha chipwiko malenge aali ngwe mihipu ya kuhosa ya oru ya kusayisa.

¹⁶ Yafula maselo aali a oru ni ngo jiali ja oru; yasela ngo jiali ku masongo aali a ku chipwiko.

¹⁷ Yanjisa malenge aali a oru ya kuhosa mu ngo jiali jatwama ku masongo ja chipwiko.

¹⁸ Mba masongo aali akwo a malenge a oru ya kuhosa yaanjisa mu maselo aali hikwasa kuze kulutwe ha yipaya ya efode.

¹⁹ Yafula ngo jiali ja oru, yajisela ku masongo aali a ku chipwiko ha ukundwilo wacho wa muchima uze walihata ni efode.

²⁰ Yafula ngo jiali ja oru, yajisa kulutwe ha chihanda cha kushi cha yipaya yiali ya ye efode, kusulangana ni unungino wayo helu lia muya wa ponda wa ulangaji wa ku efode.

²¹ Yakashila chipwiko ku ngo jacho ni ku ngo ja ku efode ni wanda ulauluka, hanga chikapwe ha muya wa ponda wa ulangaji wa ku efode, hanga chipwiko kuchichi kakasuluka ku ye efode chizechene ngwe Yehova ambile kuli Mose.

²² Yatonga hina lia ngungu lia efode, lia kuseleka, lieswe lukombo lilauluka.

²³ Chituwa cha mu hina lia ngungu cha mukachi ngwe chituwa cha mu chikuto cha utale. Chikwete lupula wa kujingilika hanga hina kulichi katanuka.

²⁴ Yatungila ha lupula uli ku songo lia lie hina lia ngungu romana jilauluka, ni ja ufungo, ni ja ngengu, ni ja mahina apema atoma.

²⁵ Yafula yiwolowolo ya oru ya kusayisa ya kusowela ni je romana ha lupula wa hina lia ngungu ha kujingilika, ya kusowela ni je romana.

²⁶ Chiwolowolo cha oru ni romana, Chiwolowolo cha oru ni romana ha lupula wa hina lia ngungu ha kujingilika kweswe, lia kuvumbikila chizechene ngwe Yehova ambile kuli Mose.

²⁷ O yatongela Arone ni ana jenyi a malunga yikuto ya mahina apema atoma a kuseleka;

²⁸ ni kapusa wa hina lipema litoma, ni mbone jipema ja hina lipema litoma, ni putula ja hina lipema litoma;

²⁹ ni muya wa ponda wa hina lipema litoma, ni lilauluka, ni lia ufungo, ni lia ngengu. Chitanga cha mukwa kwola chizechene ngwe Yehova ambile kuli Mose.

³⁰ O yafula chipenya cha ku chipangula chisandu cha oru ya kusayisa. Yolaho sona jimwe ngwe kwola cha ha kazeya ngwo, musandu Kuli Yehova.

³¹ Yachikashila helu ha kapusa ni wanda ulauluka chizechene ngwe Yehova ambile kuli Mose.

³² Chocho milimo yeswe yahwile ya tabernakulu ni ya mbalaka ya chikungulwila. A-Izalele yalinga nikulita ni yeswe Yehova ambile kuli Mose. Chocho o alingile.

³³ Yahetesa ye tabernakulu kuli Mose, ye mbalaka hamwe ni yikashi yayo yeswe. Ni sepe jayo, ni matabua jayo, ni njalo jayo, ni manguji jayo, ni yimanyino yayo;

³⁴ ni chifuko cha kutonga cha malambu a kuji a mapanga a kulomba achila, ni chifuko cha kutonga cha malambu a yipanyundu, ni hina lia chikalakala lia kufuka nalio;

³⁵ ni mushete wa Shindakenyo ni mikambo yawo, ni chitwamo cha keke,

³⁶ ni mesa ni yikashi yeswe yayo, ni mbolo ja kutumbieka;

³⁷ ni chikwachilo cha ndeya cha oru ya kusayisa, ni je ndeya jacho ja kululikisa, ni yikashi yeswe yacho, ni maji a ndeya,

³⁸ ni chilumbilo cha oru, ni maji asandu a kuwayisa no, ni insensu ya lupembo mupema, ni hina lia kufuka nalio chikolo cha mbalaka;

³⁹ ni chilumbilo cha unengu, ni sambu jacho ja unengu, ni mikambo yacho, ni yikashi yeswe yacho, ni lumbasia lwa kusanyina ni nganda yalwo;

⁴⁰ ni mahina a kuzezeleka a ku yize, ni manguji jayo, ni yimanyino yayo, ni hina lia kufuka chikolo cha ku yize, ni mihipu yalio, ni mbambo jalio, ni yikashi yeswe ya ha milimo ya ku tabernakulu ya ku mbalaka ya chikungulwila;

⁴¹ ni mazalo a kulinga ni ulangaji a kuvumbikila muma musandu, ni mazalo asandu a sasendote Arone, ni mazalo a ana jenyi a malunga mukuvumbika usasendote.

⁴² Chizechene ngwe Yehova ambile kuli Mose, chocho A-Izalele alingile milimo yeswe.

⁴³ Mose yatala milimo yeswe, kumanyi te halinga yeswe chizechene ngwe Yehova hamba, chocho hayilinga, mba Mose yaawahisa.