Kutuhuka 38 - MUKANDA USANDU WA ZAMBI 1975

¹ Iye yalinga chilumbilo cha milambu ya kulumba, cha mutondo wa mukesha. Usuhe wacho wa mbandu jitano. Utohe wacho wa mbandu jitano. Malumbu eswe a kulita ndwa lume. Chizundamo chacho cha mbandu jitatu.

² Mbinga jacho iye yajisongela ha mbango jacho jiwana. Mbinga jacho te ja kusonga ku mutondo umuwika ni che chilumbilo. Yalamikaho unengu.

³ Yafula yikashi yeswe ya che chilumbilo te ndeho, ni mapá, ni mbasia, ni nguto ja misako, ni yikombelo. Yikashi yeswe yacho yayifula ya unengu.

⁴ Yafulila che chilumbilo sambu ja unengu ja kusepekenya, ja kunjila kushi lia mukomo wa kujingilika kweswe kushi, nikupwila mwe mukachi ka chilumbilo.

⁵ Iye yazuzulwila mbango jiwana ja je sambu ja unengu ja kusepekenya ngo jiwana ja kunjishilamo ye mikambo.

⁶ Yasonga mikambo ya mutondo wa mukesha. Yalamikaho unengu.

⁷ Iye yanjisa ye mikambo mu ngo ja mu malumbu a chilumbilo ja kuchimbachila. Yachisonga ni matabua, muchima wacho mwamokomoko.

⁸ Yafula lumbasia lwa unengu, ni nganda yalwo ya unengu, ya tutalilo twa mapwo akuvumbikila ku chikolo cha mbalaka ya chikungulwila.

⁹ Yatunga nawa yize. Ku lumbu lia ku Sule mahina a kuzezelekaho apwile a mahina apema atoma a kulakaji lia mbandu.

¹⁰ Manguji jo apwile makumi aali. Yimanyino yo ya unengu, makumi aali. Ngo ja e manguji ni mikambo yo japwile ja prata.

¹¹ Ku lumbu lia ku Norte a kulakaji lia mbandu. Manguji jo makumi aali. Yimanyino yo makumi aali te ya unengu. Ngo ja ha manguji ni mikambo yajo ja prata.

¹² Ku lumbu lia kutalikisa ku Chitokelo kwapwile mahina a kuzezeleka a makumi atano a mbandu. Manguji jo kumi. Yimanyino yo kumi. Ngo ja ha manguji ni mikambo yajo ja prata.

¹³ Ku lumbu lia kutalikisa ku Chivumbuko a makumi atano a mbandu.

¹⁴ Mahina a kuzezeleka a ku sali limwe lia ku chikolo apwile a kumi lia mbandu ni mbandu jitano. Manguji jo atatu. Yimanyino yo yitatu.

¹⁵ Chochene ku sali likwo, sali ni sali ku chikolo cha yize kwapwile mahina a kuzezeleka a kumi lia mbandu ni mbandu jitano. Manguji jo atatu. Yimanyino yo yitatu.

¹⁶ Mahina eswe a kuzezeleka a ku yize ha kujingilika kweswe apwile apema atoma.

¹⁷ Yimanyino ya manguji yapwile ya unengu. Ngo ja ha manguji ni mikambo yajo japwile ja prata. Ku masongo jo kwa kulamika ni prata. Manguji eswe a ku yize apwile ni mikambo ya prata.

¹⁸ Hina lia kufuka ku chikolo cha ku yize liapwile chitanga cha mukwa kwola, lilauluka, ni lia ufungo, ni lia ngengu, ni lipema litoma. Usuhe walio wa makumi aali a mbandu. Ni Chizundamo ni utohe walio wa mbandu jitano lia kulita ni mahina a kuzezeleka a ku yize.

¹⁹ Manguji jo awana. Yimanyino yo yiwana ya unengu. Ngo jo ja prata. Ku masongo jo kwa kulamika ni prata. Mikambo yo ya prata.

²⁰ Mbambo jeswe ja ku tabernakulu ni ja ku yize kujingilika kweswe japwile ja unengu.

²¹ Achi te kwalula cha yuma ya ku tabernakulu, tabernakulu ya Shindakenyo, chizechene ngwe ayalwile nikulita ni liji lia shimbi ya Mose ya ha uvumbiko wa A-Levi ku kwoko lia Itama, mwana wa sasendote Arone.

²² Mbezalele, mwana wa Uri, mwana wa Hure, wa ku vungu lia Yunda, walingile yeswe ambile Yehova kuli Mose.

²³ Hamwe nenyi hapwile Aholiambe, mwana wa Ahisamake wa ku vungu lia Ndane, mukwa kwola ha mawe chilangaji, mukwa kwola ni mahina alauluka, ni a ufungo, ni a ngengu, ni apema atoma.

²⁴ Oru yeswe ya ha milimo ayihwishile ku milimo yeswe ya muma musandu, te oru ya milambu yapwile ya makumi aali a *talentu ni talentu livwa ni makulakaji shimbiali a shekele ni makumi atatu a shekele nikulita ni shekele ya muma musandu.

²⁵ Prata ya waze aalwile a ku chikungulwila yapwile ya kulakaji lia *talentu, ni kanunu ka shekele ni makulakaji shimbiali a shekele ni makumi shimbiali a shekele ni shekele jitano nikulita ni ye shekele ya muma musandu.

²⁶ Kuli mutu mweswe mbeka yimuwika, yalita ni chihanda cha hakachi cha shekele nikulita ni ye shekele ya muma musandu, kuli waze eswe hanapalika, te waze hanaalula, chize kuli akwa makumi aali a miaka ndo kuli makulwana. Te kuli makulakaji asambano a tununu ni tununu atatu a malunga ni makulakaji atano a malunga ni makumi atano a malunga.

²⁷ Lie kulakaji lia *talentu ja prata lia kuzuzulwila ye yimanyino ya muma musandu, ni yimanyino ya ku chikalakala cha hina. Kulakaji lia yimanyino lialita ni kulakaji lia *talentu. Talentu ni chimanyino, talentu ni chimanyino.

²⁸ Mba ni kanunu ni makulakaji shimbiali a shekele ni makumi shimbiali ni shekele jitano iye yafula ngo ja ha manguji. Yalamika prata ha masongo jo. Yaafulila mikambo.

²⁹ We unengu wa milambu wapwile wa makumi shimbiali a *talentu ni tununu aali a shekele ni makulakaji awana a shekele.

³⁰ Yafula nawo ye yimanyino ya ku chikolo cha mbalaka ya chikungulwila, ni chilumbilo cha unengu, ni sambu jacho ja unengu, ni yikashi yeswe ya ku chilumbilo;

³¹ ni yimanyino ya yize kujingilika kweswe ni yimanyino ya chikolo cha yize, ni mbambo jeswe ja ku tabernakulu, ni mbambo jeswe ja ku yize kujingilika kweswe.