Kutuhuka 37 - MUKANDA USANDU WA ZAMBI 1975

¹ Mbezalele yasonga we mushete wa mutondo wa mukesha. Usuhe wawo wa mbandu jiali ni chihanda cha hakachi. Utohe wawo wa mbandu yimuwika ni chihanda cha hakachi. Chizundamo chawo cha mbandu yimuwika ni chihanda cha hakachi.

² Yalamikaho oru ya kusayisa ni muchima ni haze. Yaufulila chipangula cha oru cha kujingilika kweswe.

³ Yauzuzulwila ngo jiwana ja oru ku molu jawo awana, te ngo jiali ku lumbu likwo liawo, ni ngo jiali ku lumbu likwo liawo.

⁴ Yasonga mikambo ya mutondo wa mukesha. Yalamikaho oru.

⁵ Yanjisa ye mikambo mu ngo ku malumbu ja mushete ya kumbachila we mushete.

⁶ Yasonga nawa chitwamo cha keke cha oru ya kusayisa. Usuhe wacho wa mbandu jiali ni chihanda cha hakachi. Utohe wacho wa mbandu yimuwika ni chihanda cha hakachi.

⁷ Yafula akerupimi aali a oru, a milimo ya kutatula. Aafulilile ku masongo eswe aali a ku chitwamo cha keke.

⁸ Kerupimi umuwika ku songo likwo ni kerupimi mukwo ku songo likwo. Yafula e akerupimi ku chishinda chimuwika ni chitwamo cha keke, kwe ku masongo eswe aali jacho.

⁹ Akerupimi yazazulula mapulwa jo kwilu nikuzulamina che chitwamo cha keke ni mapulwa jo nikutalikisa meso jo umwe kuli mukwo. Akerupimi yalitala meso jo ku chitwamo cha keke.

¹⁰ Yasonga ye mesa ya mutondo wa mukesha. Usuhe wayo wa mbandu jiali. Utohe wayo wa mbandu yimuwika. Chizundamo chayo cha mbandu yimuwika ni chihanda cha hakachi.

¹¹ Yalamikaho oru ya kusayisa. Yayifulila chipangula cha oru cha kujingilika kweswe.

¹² Yayisongela mukomo, utohe wawo wa chikambakamba chimuwika. Yafulila we mukomo chipangula cha oru cha kujingilika kweswe.

¹³ Yayizuzulwila ngo jiwana ja oru, yajisa ku mbango jiwana ku molu jayo awana.

¹⁴ Je ngo japwile hakamwihi ni mukomo muze mwatwama mikambo ya kumbachila ye mesa.

¹⁵ Yasonga ye mikambo ya mutondo wa mukesha ya kumbachila mesa, yalamikaho oru.

¹⁶ Yafula yikashi ya ha mesa ya oru ya kusayisa, yenga yayo, ni misenge yayo, ni ndeho jayo, ni mitondo yayo ya kutehwina.

¹⁷ Yafula chikwachilo cha ndeya cha oru ya kusayisa. Yafula che chikwachilo cha ndeya ku milimo ya kutatula. Ewa ni nganda yacho, ni mukungo wacho, ni misenge yacho, ni mawundu jacho, ni yitemo yacho, yeswe yapwile ya chishinda chimuwika.

¹⁸ Kwapwile mitango yisambano ya kuhachika ku malumbu jacho; mitango yitatu yacho ya kuhachika ku lumbu likwo; mitango yitatu yikwo ya kuhachika ku lumbu likwo.

¹⁹ Ku mutango umuwika misenge yitatu yalifwa ni amendoa, ni wundu limuwika ni chitemo chimuwika. Ku mutango ukwo misenge yitatu yalifwa ni amendoa, ni wundu limuwika ni chitemo chimuwika. Chochene ku mitango yisambano ya kuhachika ku lumbu lia che chikwachilo cha ndeya.

²⁰ Ha chikwachilo cha ndeya hapwile misenge yiwana, yalifwa ni amendoa ni mawundu jacho ni yitemo yacho.

²¹ Mushi lia mitango yiali wundu limuwika lia chishinda chimuwika chayo, ni wundu likwo mushi lia mitango yiali yikwo lia chishinda chimuwika chayo. Chocho ha mitango yisambano ya kuhachika ku lumbu liacho.

²² Mawundu jayo ni yitemo yayo yapwile ya chishinda chimuwika chacho. Che cheswe chapwile cha chitanga chimuwika lume cha kutatula cha oru ya kusayisa.

²³ Iye yafula ndeya jacho shimbiali, ni mana jacho, ni yenga yacho ya kukwachilamo mwelela, ya oru ya kusayisa.

²⁴ Yachifula ku *talentu yimuwika ya oru ya kusayisa hamwe ni yikashi yeswe yacho.

²⁵ Yalinga chilumbilo cha insensu cha mutondo wa mukesha. Usuhe wacho wa mbandu yimuwika. Utohe wacho wa mbandu yimuwika. Malumbu eswe a kulita ndwa lume. Chizundamo chacho cha mbandu jiali. Mbinga jacho ja kusonga ku mutondo umuwika wacho.

²⁶ Yalamikaho oru ya kusayisa, ni helu liacho, ni ha malumbu jacho kwa kujingilika kweswe, ni mbinga jacho. Yachifulila chipangula cha oru cha kujingilika kweswe.

²⁷ Yachifulila ngo jiali ja oru kushi lia chipangula chacho ku mbango jiali jacho ha malumbu aali jacho, jikapwe ha mikambo ya kuchimbachila.

²⁸ Iye yasonga mikambo ya mutondo wa mukesha. Yalamikaho oru.

²⁹ Yachinga maji asandu a kuwayisa no. Yachinga insensu yitoma ya tumbuto twa lupembo mupema nikulita ni milimo ya mukwa kuchinga tumbuto twa lupembo mupema.