Kutuhuka 35 - MUKANDA USANDU WA ZAMBI 1975

¹ Mose yakungulula chikungulwila cheswe cha A-Izalele. Yamba kuli ayo ngwenyi, Maliji Yehova hamba hanga nukaalinge, wano.

² Nukalinge milimo ha matangwa asambano alioze ha tangwa liamuchishimbiali kumukukapwa tangwa lisandu kuli yenu, Sambata ya uhwimino ulemu kumeso ja Yehova. Mweswawo malingilaho milimo yeswayo, nukamushihe lume.

³ Kanda nukawika kahia nikamwe ha tangwa lia Sambata ndusu mazuwo jenu.

⁴ Mose yahanjika ni chikungulwila cheswe cha A-Izalele ngwenyi, Che chuma Yehova hamba chino, ngwenyi,

⁵ Anjilenu Yehova mulambu hakachi kenu. Mweswawo uli ni mbunge ya kutá, akanehe we mulambu kuli Yehova wa oru, ni prata, ni unengu;

⁶ ni mahina alauluka, ni a ufungo, ni a ngengu, ni apema atoma, ni uzangi wa pembe;

⁷ ni malambu a kuji a mapanga a kulomba achila, ni malambu a yipanyundu, ni mitondo ya mukesha;

⁸ ni maji a ndeya, ni tumbuto twa lupembo mupema twa maji a kuwayisa no, ni twa insensu;

⁹ ni mawe a sardonica, ni mawe akaalamike ha efode ni ha chipwiko.

¹⁰ Mutu mweswe ukwete mbunge ya mana, eze akalinge yize yeswe Yehova hamba.

¹¹ Ye tabernakulu, ni mbalaka yayo, ni chifuko chayo, ni sepe jayo, ni matabua jayo, ni njalo jayo, ni manguji jayo, ni yimanyino yayo;

¹² ni mushete ni mikambo yawo, ni chitwamo cha keke, ni hina lia chikalakala;

¹³ ni mesa ni mikambo yayo, hamwe ni yikashi yeswe yayo, ni mbolo ja kutumbieka;

¹⁴ ni chikwachilo cha ndeya cha kuhana pangu ni yikashi yacho, ni ndeya jacho, ni maji a ndeya;

¹⁵ ni chilumbilo cha insensu, ni mikambo yacho, ni maji a kuwayisa no, ni insensu ya lupembo mupema, ni hina lia kufuka ku chikolo cha tabernakulu;

¹⁶ ni chilumbilo cha milambu ya kulumba, hamwe ni sambu jacho ja unengu, ni mikambo yacho, ni yikashi yeswe yacho, ni lumbasia lwa kusanyina ni nganda yalwo;

¹⁷ ni mahina a kuzezeleka a yize ni manguji jo, ni yimanyino yo, ni hina lia kufuka ku chikolo cha ku yize;

¹⁸ ni mbambo ja ku tabernakulu, ni mbambo ja ku yize, ni mihipu yajo;

¹⁹ ni mazalo a kutonga ni ulangaji a kulingila muma musandu, mazalo asandu a sasendote Arone, ni mazalo ja ana jenyi a malunga mukulingila usasendote.

²⁰ Chikungulwila cheswe cha A-Izalele chakatukile kumeso ja Mose.

²¹ Mba atu eswe, mutu mweswe mbunge yenyi yinazange, Spiritu ya kutá ali nayo yaya, yatwala mulambu wa Yehova, ukapwe wa milimo ya ku mbalaka ya chikungulwila, ni wa uvumbiko weswe wayo, ni wa mazalo asandu.

²² Mba yaya, malunga ni mapwo eswe apwile ni mbunge ja kutá, yatwala mikosa, ni yingelengele, ni tuzeya, ni yijingo, ni upite weswe wa oru. Mukwa kulambula mweswe, walambwile Yehova mulambu wa oru.

²³ Mutu mweswe wapwile ni mahina alauluka, ni a ufungo, ni a ngengu, ni apema atoma, ni uzangi wa pembe, ni malambu a kuji a mapanga a kulomba achila, ni malambu a yipanyundu, yaatwala.

²⁴ Mutu mweswe yoze walambwile mulambu wa prata ni wa unengu atwalile mulambu wa Yehova. Mutu mweswe wapwile ni mitondo ya mukesha ayitwalile, yikapwe ya milimo yeswayo ya uvumbiko.

²⁵ Mapwo eswe apwile ni mbunge ja mana yahosa ni moko jo, yatwala chize ahosele te mahina alauluka, ni a ufungo, ni a ngengu, ni apema atoma.

²⁶ Mapwo eswe aze mbunge jo jazangile ni mana, yahosa uzangi wa pembe.

²⁷ Miata yatwala mawe a sardonica ni mawe akaalamike a efode ni a chipwiko.

²⁸ Ni tumbuto twa lupembo mupema, ni maji a ndeya, ni maji a kuwayisa no, ni a insensu ya lupembo mupema.

²⁹ A-Izalele yatwalila Yehova mulambu wa vumbi, lunga mweswe, pwo mweswe mbunge jo jatayile mukutwala ha milimo yeswe yize ambile Yehova akayilinge ku kwoko lia Mose.

³⁰ Mose yamba kuli A-Izalele ngwenyi, Yehova hanatambika ni jina lienyi Mbezalele, mwana Uri, mwana Hure, wa ku vungu lia Yunda.

³¹ Hanamuzalisa ni Spiritu ya Zambi, ni mana, ni malinjekela, ni yinyingi, ni ulangaji weka ni weka,

³² mukutomba milimo ya ulangaji ya oru, ni ya prata, ni ya unengu,

³³ ni ya kutota mawe a kunjisa mu yituwa yo, ni ya kwola ha mitondo mukulinga milimo yeswe yeka ni yeka ya ulangaji.

³⁴ Yamwahacho mu mbunge yenyi akalongese, neye ni Aholiambe, mwana Ahisamake wa ku vungu lia Ndane.

³⁵ Hanazalisa wano ni mana mukulinga ulangaji weka ni weka ni wa mukwa kwola ha mawe, ni wa chilangaji, ni wa mukwa kwola ha mahina alauluka, ni a ufungo, ni a ngengu, ni apema atoma, ni wa mukwa kuseleka, ni wa a kutomba milimo ya ulangaji.