Kutuhuka 34 - MUKANDA USANDU WA ZAMBI 1975

¹ Yehova yamba kuli Mose ngwenyi, Ulitotele mawe aali a kulifwa ni atangu. Mungusoneka ha e mawe maliji aze apwile ha mawe atangu aze unakashiha.

² Ulilulike ha kucha, mba ha kucha ukakanduke ha mulundu wa Sinai, ukalisololeko kuli yami ha mbulwa mulundu.

³ Niumwe mutu kanda akakanduka hamwe ni yena, chipwe kanda akasoloka niumwe kweswako ku mulundu chipwe mapanga, chipwe ngombe, kanda akalia kulutwe lia we mulundu.

⁴ Iye watetele mawe aali a kulifwa ni atangu. Ha kucha Mose yalimeneka, yakanduka ha mulundu wa Sinai chizechene ngwe Yehova hamwamba. Yambata mu moko jenyi mawe aali.

⁵ Yehova wahulumukine mu lelwa, yamanako hamwe nenyi nikwambulula jina lia Yehova.

⁶ Yehova wapalikile kumeso jenyi nikwambulula ngwenyi, Yehova, mwe Yehova, Zambi mukwa keke, mukwa vumbi, makoke kutenuka, wakulumbama ni utu wa zango ni umwenemwene.

⁷ Kakufunga utu wa zango hali tununu twa atu, kakukonekena uhenge ni uvulumunyi ni shili. Keshi kusambisa nichimwe yoze wahia. Kakufwetesa uhenge wa yisemi hali ana jo ni hali ajikulu, ha chisemuko chamuchitatu ni ha chisemuko chamuchiwana.

⁸ Mose walipupwishile, yahetamisa mutwe wenyi ndo hashi nikuwayila.

⁹ Ngwenyi, Mwene kachi haliapwila hinawana vumbi kumeso je, ngunakulembe, Mwene ukaye hakachi ketu, mumu o kapwa akwa pami. Utukonekene uhenge ni shili yetu. Utuzuke kama tukapwe chihinga che.

¹⁰ Yehova yamba ngwenyi, Ngunakolesa usendo. Kumeso ja atu je eswe mungukalinga yipekesa kanda achiyilinga hashi, chipwe hakachi ka vungu nilimwe, ka. Mba atu eswe watwama hakachi ko kumakamona chitanga cha Yehova, mumu chize mungukalinga ni yena muchipwa cha kukolesa woma.

¹¹ Ononoka ku chize ngunakwambe musono. Munguhuma mu chifuchi kumeso je A-Amore, ni A-Kanana, ni A-Hete, ni A-Perize, ni A-Hevwe, ni A-Yepushe.

¹² Ulifunge yena mwene kuchina mukakwata usendo ni akwa chifuchi kuze mukaya, kuchina muukapwa kambwila hakachi kenu.

¹³ Alioze ukapuzule yilumbilo yo, Ukapalwole yipinji tuponya two, ukapakule Ashera yo.

¹⁴ Kanda ukawayila tuzambi eka, mumu Yehova (jina lienyi iye Ukwa), iye Zambi mukwa ukwa.

¹⁵ Kuchina mukakwata usendo ni akwa chifuchi chize, mba muze makaya, akalinge ukoi ni tuzambi two, akatambule kuli tuzambi two yitapo, hanji makakutambika mba mukalila ku chitapo chenyi.

¹⁶ Kuchina mukambachisa ana jo a mapwo kuli ana je a malunga, mba ana jo a mapwo makaya akalinge ukoi ni tuzambi two mba makazangisa ana je a malunga kuya akalinge ukoi ni tuzambi two.

¹⁷ Kanda ukalilingila tuzambi niamwe a kuzuzulula.

¹⁸ Ukafunge chiwanyino cha mbolo kuyishi futunwiso. Ukalie mbolo kuyishi futunwiso matangwa shimbiali, ngwe nakwambile, ha shimbu liacho ha kakweji ka Ambimbi, mumu ha kakweji ka Ambimbi wakatukile ku Engitu.

¹⁹ Tupula-majimo eswe ninyami. Yimuna je eswe a kuji, ana atangu a ngombe chipwe a mapanga.

²⁰ Kapula-jimo wa chimbulu ukamukule ni mwana-panga. Nyi kwazangile kumukula, ukamumakune kota. Tupula-majimo eswe a kuli ana je a malunga ukaakule. Niumwe kanda akasoloka mokomoko kumeso jami.

²¹ Ukalinge milimo matangwa asambano alioze ha tangwa liamuchishimbiali hikuhwima lume. Ha mwaka wa kuchipa ni ha mwaka wa kucha ukahwime.

²² Ukafunge chiwanyino cha masemana, cha tiliku yitangu ya kulianga kuhia. Ukafunge nawa chiwanyino cha kukungila mbuto ha kuhwa cha mwaka.

²³ Mwaka ha mwaka, yisuho yitatu, malunga je eswe akasoloke kumeso ja Mwene Yehova, Zambi ya A-Izalele.

²⁴ Mumu mungukahuma mu chifuchi mavungu kumeso je. Mungukatohesa njiza je. Niumwe mutu kechi kazanga chifuchi che wakuhi, muze mukanduka ukasoloke kumeso ja Yehova Zambi ye, mwaka ha mwaka, yisuho yitatu.

²⁵ Kanda ukalambula manyinga a chitapo chami hamwe ni mbolo ya futunwiso; chipwe kuhichika chitapo cha ku chiwanyino cha Chizomboka ndo mu kucha, kanda ukachihichika.

²⁶ Yitangu ya kuhia ya ku mbuto ya mu minda ye ukatwale ku zuwo lia Yehova Zambi ye. Kanda ukateleka mwana-pembe mu yamwa ya naye.

²⁷ Yehova yamba kuli Mose ngwenyi, Soneka maliji ano mumu nikulita ni maliji ano hingunakolesa usendo ni yena ni A-Izalele.

²⁸ Iye wapwile kuze hamwe ni Yehova makumi awana a matangwa ni makumi awana a ufuku. Kalile, chipwe kunwa, kanwine. Iye yasoneka ha mawe maliji a usendo, e maliji kumi.

²⁹ Muze Mose hapalumuka ku mulundu wa Sinai te kanambata mu moko jenyi ye mikanda yiali ya mawe ya Shindakenyo, muze te mapalumuka, Mose kanyingikine te chikowa cha ku meso jenyi chinatemuka mumu ha kuhanjika nenyi.

³⁰ Muze Arone ni A-Izalele eswe amwene Mose, kumanyi chikowa cha ku meso jenyi chinatemuka, yevwa woma kumukundama.

³¹ Mose yatambika kuli ayo, mba Arone ni miata eswe a ku chikungulwila yeza kuli iye. Mose yahanjika no.

³² Kulutwe A-Izalele eswe akundamine mba iye waahele shimbi jize jeswe Yehova wambile ha mulundu wa Sinai.

³³ Muze Mose hamana kuhanjika yalifuka ku meso ni wanda.

³⁴ Alioze muze Mose anjilile kumeso ja Yehova mukuhanjika nenyi, yachiza we wanda ndo iye hatuhuka. Yatuhuka, yahanjika ni A-Izalele yeswe hamwamba.

³⁵ A-Izalele amwene meso ja Mose ngwo, Chikowa cha ku meso ja Mose chinatemuka, mba Mose yalifuka ni wanda nawa ndo anjilile mukuhanjika nenyi.