Kutuhuka 33 - MUKANDA USANDU WA ZAMBI 1975

¹ Yehova yamba kuli Mose ngwenyi, Yako ukakanduke hamwe ni atu aze waachijile ku chifuchi cha Engitu, ndo ku chifuchi chize nalishingile ni shingo kuli Apalahama ni Izake ni Yakomba ngwami, Mungukachihana ku munyachi we.

² Mungukatuma mungelo kumeso je, (mumu mungukahuma mu chifuchi A-Kanana, ni A-Amore, ni A-Hete, ni A-Perize, ni A-Hevwe, ni A-Yepushe)

³ ndo ku chifuchi kuze kunokela yamwa ni wuchi; mumu yami mwene chichi kukanduka mukachi kenu mumu yenu nuli akwa pami, kuchina mungukanwonwona mu jila.

⁴ Mba muze e atu evwile sango lino lipi, yalishimwoka. Niumwe wazalile yuma yenyi ya uhenya wakuhi.

⁵ Yehova yamba kuli Mose ngwenyi, Ambulwila A-Izalele ngwe, Nuli akwa pami, kachi mungukanduka hakachi kenu ha shimbu likepe kachi mungukanwonwona lume. Kashika haliapwila Chizenu yuma yenu ya uhenya hanga ngunyingike chize mungulinga ni yenu.

⁶ A-Izalele alichijile yuma yo ya uhenya katuke ku mulundu wa Horepe ni kulutwe.

⁷ Mose watwalile mbalaka nikuyijika haze lia chilombo, kusuku ni chilombo, yayiluka jina ngwenyi, Mbalaka ya chikungulwila. Mba mweswawo wafupile Yehova, yatuhuka nikuya ku mbalaka ya chikungulwila yapwile haze lia chilombo.

⁸ Muze Mose atuhukile nikuya ku ye mbalaka, atu eswe yakatuka nikumana ha molu jo, mutu mweswe ku chikolo cha mbalaka yenyi, nikutala Mose ndo iye manjila mu mbalaka.

⁹ Muze Mose hanjila mu mbalaka, nguji lia lelwa liahulumukine, yilimana ku chikolo cha mbalaka, mba Yehova wahanjikile ni Mose.

¹⁰ Atu eswe amwene lie nguji lia lelwa Unamana ku chikolo cha mbalaka. Atu eswe yakatuka nikuwayila, mutu mweswe ku chikolo cha mbalaka yenyi.

¹¹ Yehova wahanjikile ni Mose meso ni meso ngwe mutu mahanjika ni kasendo kenyi. Mba yahiluka nawa ku chilombo, alioze kavumbi kenyi Yoshua, mwana Nune, iye te mukweze, kakatukile ku mbalaka.

¹² Mose yamba kuli Yehova ngwenyi, Yena unambe kuli yami ngwe, Kandwisa wano atu, alioze kwangulwezele yoze mutuma ni yami. Hindu hiwamba ngwe, Ngunakunyingika ni jina lie, hiwawana nawa vumbi kumeso jami.

¹³ Haliapwila kashika, ngunakulembe, kachi hinawana vumbi kumeso je, ngulweze kama majila je, ngukunyingike hanga nguwane vumbi kumeso je, uchinyonge kama, ngwami, vungu lino kuliapwa atu je.

¹⁴ Yehova yamba ngwenyi, Yami mwene mungukapwa hamwe ni yena. Kumungukakuhwimisa.

¹⁵ Mose yamba kuli iye ngwenyi, Nyi yena mwene kuchi kuya hamuwika kanda utuchiza kuno ututwale kulutwe.

¹⁶ Kuchi mungunyingika ngwami, Hinawana vumbi kumeso je, ni yami ni atu je? Te kuchapwile ha chuma chino nyi? Mumu yena wakuya hamwe ni yetu, chocho ni yami ni atu je tukahandunuke kuli atu eswe muno muze.

¹⁷ Yehova yamba kuli Mose ngwenyi, Mungulinga nawa chino hiwamba mumu hiwawana vumbi kumeso jami. Ngunakunyingika ku jina lie.

¹⁸ Yamba ngwenyi, Ngunakulembe ngwami, Ngusolwele ulemu we.

¹⁹ Ngwenyi, Mungupalikisa kumeso je utu wami weswe. Mungwambulula jina lia Yehova kumeso je. Mungukapwa mukwa vumbi kuli mweswawo mungukamuvwilalio. Mungukulweza keke kuli mweswawo tnungukamulwezayo.

²⁰ Ngwenyi, Kuchi kuhasa kumona meso jami, mumu mutu kechi kutwama ni mwono nyi mamona meso jami.

²¹ Yehova yamba ngwenyi, Kuno kuli yami chihela chiliko, ukamaneko ha liwe.

²² Mba shimbu ulemu wami unachipalika mungukunjisa mu pako ya liwe. Mungukufuka ni kwoko liami ndo hinapalika.

²³ Mba munguchiza kwoko liami, ukatale nyima liami, alioze meso jami kechi kumoneka.