Kutuhuka 32 - MUKANDA USANDU WA ZAMBI 1975

¹ Muze atu amwene ngwo, Mose kapalumukine nikawashi ha mulundu, e atu yakungulula hamuwika kuli Arone, yamba kuli iye ngwo, Katuka, utulingile tuzambi tuze mutututetekela, mumu yono Mose, mwe mutu watuchijile ku Engitu, Kutwanyingikine chize chinamuwane.

² Mba Arone yamba kuli ayo ngwenyi, Zulenu yingelengele ya oru yili ku matwi ja akwenumapwo, ni ku matwi ja ana jenu a malunga, ni ku matwi ja ana jenu a mapwo, nunguneheneyo.

³ Atu eswe azulile yingelengele ya oru yapwile mu matwi jo, yayitwala kuli Arone.

⁴ Iye wayitambwile ku moko jo, yayisonga ni shizo, yayilinga mwana-ngombe wa kuzuzulula. O yamba ngwo, Enu A-Izalele, Zambi yenu yono, wanuchijile ku chifuchi cha Engitu.

⁵ Muze Arone amumwene, yatunga chilumbilo kulutwe lienyi, yatambika ngwenyi, Hamene mukupwa chiwanyino cha Yehova.

⁶ Alimenekene ha kucha, yalambula milambu ya kulumba, yaneha milambu ya sambukila. E atu atwamine hashi mukulia, ni mukunwa, mba yakatuka akahehe.

⁷ Yehova yamba kuli Mose ngwenyi, Yako upalumuke, mumu atu je waze yena waachijile ku chifuchi cha Engitu halichisa.

⁸ Hahambuluka washiwashi ku jila yize naambile. Halilingila ene mwana-ngombe wa kuzuzulula, hafukama kuli iye, hamulambula milambu, hamba ngwo, Enu A-Izalele, Zambi yenu yono, wanuchijile ku chifuchi cha Engitu.

⁹ Yehova yamba kuli Mose ngwenyi, Hinamona wano atu, kumanyi e atu te akwa pami.

¹⁰ Kashika, haliapwila, Ungweche hanga utenu wami usasaminye hali ayo, ngwaonwone mba mungukapwisa yena vungu linene.

¹¹ Mose yamba kuli Yehova Zambi yenyi ngwenyi, Yehova, kuchi te utenu we unasasaminya hali atu je, waze waachijile ku chifuchi cha Engitu ni tachi jinji, ni kwoko lia ndundo?

¹² Kuchi te A-Engitu mamba ngwo, Waachijile hanga aalinge chipi, mukwashiha ha milundu, mukwaonwona lume hashi? Utewulule utenu we usasu. Ulikonyeke, kanda ulinga chuma chino chipi kuli atu je.

¹³ Iwuluka kama tuvumbi twe Apalahama, ni Izake, ni Izalele, kuli wano yena walishingile ni shingo ngwe, Kumungwokesa ana jenu ngwe matongonoshi a malilu. Chifuchi chino cheswe hinamba, kumungukachihana kuli ana jenu. O kumakachipita ndo ku miaka ya mutolo.

¹⁴ Mba Yehova walikonyekene ha yipi yize ambile ngwenyi, Munguyilinga kuli atu jami.

¹⁵ Mose yalumuka, yapalumuka ku mulundu kanambata mu moko jenyi mikanda yiali ya mawe ya Shindakenyo; mawe a kusoneka sali ni sali. Ha sali limwe ha kusoneka, ni ha sali likwo nawa.

¹⁶ E mawe apwile milimo ya Zambi, ni che kusoneka te kusoneka cha Zambi, cha kutota ha mawe.

¹⁷ Muze Yoshua evwile liji lia atu ha kuka lumioka, yamba kuli Mose ngwenyi, Ngunevu liji lia jita mu chilombo.

¹⁸ Ngwenyi, Hi liji ko lia waze makalumioka ha kukumba, ka, chipwe hi liji ko lia waze mateta mumu haakumba, ka, alioze liji lia akwa kwimba mwaso ngunevu.

¹⁹ Mba cheswe iye akundamine ku chilombo yamona mwe mwana-ngombe ni kuhangana cha atu. Utenu wa Mose yiusasaminya, yambila e mawe ku moko jenyi, yaashiha hashi mushi lia mulundu.

²⁰ Mba yanda mwe mwana-ngombe yoze hamulinga, yamwocha ni kahia nikumufwenya apwe fufuta mba yamulekumwina ha meya nikunwisayo A-Izalele.

²¹ Mose yamba kuli Arone ngwenyi, Wano atu yika anakakulinga hiwaakokela mulonga upwa haha?

²² Arone yamba ngwenyi, Mwata, utenu we kanda usasaminya kama. Yena kuwanyingika e atu. Kanazange yipi.

²³ Mumu kanakamba kuli yami ngwo, Utulingile tuzambi atutetekele, mumu ha kutwala kuli yono Mose, watuchijile ku chifuchi cha Engitu, Kutwanyingikine chize chinamuwane.

²⁴ Ngunakamba kuli ayo ngwami, Mweswawo uli ni oru ayichize, chocho yangwahayo. Ngunakayimbila mu kahia mba mwatuhuka mwe mwana-ngombe.

²⁵ Muze Mose amwene atu halifukula (mumu Arone te haatayiza kulifukula akaambwatule kuli akwa kole jo),

²⁶ haze hene Mose wamanyine ku chikolo cha chilombo, yamba ngwenyi, Yoze uli ku sali lia Yehova apalike kuli yami. Mba malunga A-Levi yalikungulwila kuli iye.

²⁷ Iye yamba kuli ayo ngwenyi, Chocho anambe Yehova Zambi ya A-Izalele ngwenyi, Lunga mweswe alipakate katana kenyi, aye ndusu mu chilombo ku chikolo ni chikolo. Lunga mweswe ashihe mwanakwo chipwe yayo. Lunga mweswe ashihe sepa lienyi. Lunga mweswe ashihe mwenyembo wenyi.

²⁸ Malunga A-Levi alingile nikulita ni liji lia Mose, mba kuli atu tangwa lize afwile ngwe tununu atatu a malunga.

²⁹ Mose yamba ngwenyi, Litumbikilenu kuli Yehova musono. Lunga mweswe hamwe ni mwanenyi wa lunga, ewa, hamwe ni mwanakwo hanga akanuzukwile chiwape tangwa lino.

³⁰ Mba ha kucha, Mose yamba kuli atu ngwenyi, Hinwavulumuna mulonga unene, haliapwila mungukanduka kuli Yehova, hanji munguhasa kufuka shili yenu.

³¹ Mose yahiluka kuli Yehova, ngwenyi, Mwane, wano atu havulumuna mulonga unene, halilingila tuzambi twa oru.

³² Chipwe chocho, nyi muhasa kukonekena mulonga wo—alioze nyi ka, ngunakulembe ngwami, Ungujimune kama ku mukanda we wasonekene.

³³ Yehova yamba kuli Mose ngwenyi, Mweswawo hanguvulumuna, mwe iye mungumujimuna ku mukanda wami.

³⁴ Haliapwila hiyako, ukasongwele atu kuma kuze navulukile kuli yena. Mungelo wami kumakanutetekela alioze ha tangwa lize mungukafwetesa, kumungukaafwetesa mulonga wo.

³⁵ Mba Yehova walambile e atu mumu te o atengele mwana-ngombe yoze amutengele kuli Arone.