Kutuhuka 30 - MUKANDA USANDU WA ZAMBI 1975

¹ Ukalinge chilumbilo cha kwochelaho insensu. Ukachilinge cha mutondo wa mukesha.

² Usuhe wacho ukapwe wa mbandu yimuwika. Utohe wacho ukapwe wa mbandu yimuwika. Malumbu eswe a cheseko chimuwika ndwa lume. Chizundamo chacho chikapwe cha mbandu jiali. Mbinga jacho ja mutondo umuwika.

³ Ukalamikeho oru ya kusayisa, helu liacho ni malumbu jacho ha kujingilika ni mbinga jacho. Ukachifulile chipangula cha oru ha kujingilika.

⁴ Ukafulile ngo jiali ja oru kushi lia chipangula chacho ku mbango jiali jacho, ukajifulile ha malumbu aali jacho. Jikapwe ha mikambo ya kumbachila.

⁵ Ukasonge mikambo ya mutondo wa mukesha. Ukalamikeho oru.

⁶ Ukachitumbikile kulutwe lia chikalakala cha hina chatwama kulutwe lia mushete wa Shindakenyo, kulutwe lia chitwamo cha keke chatwama helu lia Shindakenyo, kuze mungukatakana ni yena.

⁷ Arone akocheleho insensu ya lupembo mupema, chimene ha chimene muze iye malulikisa ndeya.

⁸ Muze Arone mawika ndeya ha chingoloshi iye akoche nawa ye insensu yikapwe insensu ya matangwa eswe kumeso ja Yehova ndusu yisemuko yenu.

⁹ Kanda nukalambwilaho insensu yeka, chipwe mulambu wa kulumba, chipwe mulambu wa wunga, ka. Kanda nukazujilaho mulambu niumwe wa kunwa.

¹⁰ Arone akafuke ha je mbinga jacho kamuwika mwaka ha mwaka. Akachifuke ni manyinga a mulambu ha shili kamuwika mwaka ha mwaka ndusu yisemuko yenu. Kuchapwa chisandu chahiana kuli Yehova.

¹¹ Yehova yamba kuli Mose ngwenyi,

¹² Muze muwalula A-Izalele nikulita ni kwalula cho, hohene mutu mweswe akahane kuli Yehova ha ukule wa mbunge yenyi, muze muwalula, hanga kukuchi kapwa hakachi ko chilungo nichimwe muze muwalula.

¹³ Eswe mapalika kuli waze hanaalula mutu mweswe akahane chino ngwo, Chihanda cha hakachi cha shekele nikulita ni shekele ya muma musandu (ye shekele kuyafwika makumi aali a ngera). Chihanda cha hakachi cha shekele chikapwe mulambu kuli Yehova.

¹⁴ Mutu mweswe mapalika kuli waze hanaalula chize kuli akwa makumi aali a miaka ndo kuli makulwana akahane we mulambu wa Yehova.

¹⁵ Pichi kanda akawezaho. Yiswale kanda akatepululaho ku che chihanda cha hakachi cha shekele muze mahana mulambu wa Yehova, ha kulifukila shili yenu.

¹⁶ Ukatambule kuli A-Izalele mbongo ja kwafukila milonga ukajise ku uvumbiko wa mu mbalaka ya chikungulwila, jikapwe Chiwulwiso cha A-Izalele kumeso ja Yehova, mukunufukila shili.

¹⁷ Yehova yamba kuli Mose ngwenyi,

¹⁸ Ukalinge nawa lumbasia lwa unengu lwa kusanyina, ni nganda yalwo ya unengu. Ukalutumbike hakachi ka mbalaka ya chikungulwila ni chilumbilo. Ukasemo meya.

¹⁹ Ni Arone ni ana jenyi a malunga akasanyinemo ku moko jo ni ku molu jo.

²⁰ Muze manjila mu mbalaka ya chikungulwila akasane meya kuchina mafwa, hanji muze nukundama ku chilumbilo mukuvumbika, mukulumba ni kahia mulambu kuli Yehova.

²¹ Chocho akasane ku moko jo ni molu jo kuchina mafwa. Chikapwe shimbi ya mutolo kuli ayo; ewa, kuli iye ni kuli ana jenyi ndusu yisemuko yo.

²² Yehova yamba nawa kuli Mose ngwenyi,

²³ Ukasake tumbuto tupema twahiana twa lupembo mupema twa mira ya kututumuka makulakaji atano a shekele, ni twa kanela muyema chihanda cha hakachi cha pesu, te makulakaji aali a shekele ni makumi atano a shekele, ni twa kalamu muyema makulakaji aali a shekele ni makumi atano a shekele,

²⁴ ni twa kasha makulakaji atano a shekele, yeswe nikulita ni shekele ya muma musandu, hi *hine ya maji a azeite.

²⁵ Ukayichinge yikapwe maji asandu a kuwayisa no, lupembo mupema wa kuchinga kuli mukwa ulangaji wayo. Yikapwe maji asandu a kuwayisa no.

²⁶ Ukawayise no mbalaka ya chikungulwila ni mushete wa Shindakenyo,

²⁷ ni mesa ni yikashi yayo, ni chikwachilo cha ndeya hamwe ni yikashi yacho, ni chilumbilo cha insensu,

²⁸ ni chilumbilo cha milambu ya kulumba hamwe ni yikashi yacho, ni lumbasia ni nganda yalwo.

²⁹ Ukayisele ku usandu, yikapwe yisandu yahiana. Cheswacho muchikwatako kumuchikapwa chisandu.

³⁰ Ukawayise ni maji Arone ni ana jenyi a malunga. Ukaasele ku usandu hanga akangulingile usasendote.

³¹ Ukambe kuli A-Izalele ngwe, Maji ano akapwe asandu kuli yami a kuwayisa no ndusu yisemuko yenu.

³² Kanda akaazuza ha mujimba wa mutu niumwe chipwe nikulita ni kuchinga cho, kanda akachinga maji ngwe wano, ka. Kapwa asandu. Akapwe asandu kuli yenu.

³³ Mweswawo machinga amwe ngwe wano, ni mweswawo makaazuza hali mutu weka, akamutete hakachi ka atu jenyi.

³⁴ Yehova yamba kuli Mose ngwenyi, Ukasake tumbuto tuyema twa lupembo mupema twa estonake ni onecha ni ngalambanu, tumbuto tuyema twa lupembo mupema hamwe ni libano yitoma. Tumbuto tweswe tukapwe ni pesu yimuwika.

³⁵ Ukayichinge yikapwe insensu, lupembo mupema, nikulita ni ulangaji wa mukwa kuyichinga, yilungiwe ni mungwa, yitoma, yisandu.

³⁶ Ukatwe yimwe yikapwe ya wungawunga ukayitumbike kulutwe lia Shindakenyo mu mbalaka ya chikungulwila kuze mungukatakana ni yena. Yikapwe yisandu yahiana kuli yenu.

³⁷ Ye insensu mukachinga, kanda nukalichingilayo yenwene nikulita ni kuchinga chayo. Yikapwe kuli yenu yisandu ya mbala ya Yehova.

³⁸ Mweswawo machinga yimwe ya kulifwa nayo mukuyipanjika lupembo, akamutete hakachi ka atu jenyi.