Kutuhuka 29 - MUKANDA USANDU WA ZAMBI 1975

¹ Chuma mulinga kuli ayo mukwasela ku usandu, mukungulingila usasendote, chino, ngwami, Tongola kuji ya ngombe chimbembe, ni kuji aali a mapanga keshi chipa,

² ni mbolo kuyishi futunwiso, ni yandanda ya kuchinga ni maji, kuyishi futunwiso, ni malikemba alelu, keshi futunwiso, a kulembula ni maji. Ukayichike ni wunga wafufunuka wa tiliku.

³ Ukayise mu mutonga umuwika nikuyineha mu mutonga hamwe ni mwe kuji ya ngombe, ni e kuji aali a mapanga.

⁴ Arone ni ana jenyi a malunga ukaahetese ku chikolo cha mbalaka ya chikungulwila. Ukaasanyise meya.

⁵ Ukande mazalo, ukajike Arone chikuto, ni hina lia ngungu lia efode, ni ye efode, ni chipwiko. Ukamujichike ni muya wa ponda wa ulangaji wa ye efode.

⁶ Ukase kapusa ha mutwe wenyi mba hikunangika chipenya chisandu ha mwe kapusa.

⁷ Hohene Ukande maji a kuwayisa no, ukaazuze ha mutwe wenyi, ukamuwayise no.

⁸ Ukasake ana jenyi a malunga, ukaajike yikuto.

⁹ Ukaajichike miya ya ponda ni Arone ni ana jenyi a malunga. Ukase tupusa asuku ha mitwe yo mba o makazuka usasendote ku chiyulo cha mutolo. Ukatumbikile Arone ni ana jenyi a malunga ku uvumbiko.

¹⁰ Utwale mwe kuji ya ngombe kulutwe lia mbalaka ya chikungulwila. Arone ni ana jenyi a malunga asayike moko jo ha mutwe wa mwe kuji ya ngombe.

¹¹ Ushihe mwe kuji ya ngombe kumeso ja Yehova ku chikolo cha mbalaka ya chikungulwila.

¹² Ukachize ku manyinga a mwe kuji ya ngombe ukakomone ha mbinga ja chilumbilo ni munwe we. Ukazujile manyinga eswe ku shina lia chilumbilo.

¹³ Ukachize maji eswe ku yingambiangambia yenyi ya muchima, ni maji a ha liayi, ni njiso jiali ni maji jaho, ukayilumbe ha chilumbilo.

¹⁴ Alioze yifwo ya mwe kuji ya ngombe, ni kupu lienyi, ni ufwachi wenyi ukayoche ni kahia haze lia chilombo. Kapwa mulambu ha shili.

¹⁵ Utwale nawa mwe kuji ya panga, Arone ni ana jenyi a malunga asayike moko jo ha mutwe wa mwe kuji ya panga.

¹⁶ Ushihe kuji ya panga mba utwale manyinga jenyi wasapwile kwa kujingilika ha chilumbilo.

¹⁷ Utete mwe kuji ya panga mu yihanda yenyi nikukosa yingambiangambia yenyi ya muchima, ni molu, ni yilama yenyi, hikuyilumbika hamwe ni yihanda yenyi ni hamwe ni mutwe wenyi.

¹⁸ Ukalumbe kuji ya panga mweswe ha chilumbilo. Chapwa mulambu wa kulumba kuli Yehova. Lupembo mupema. Mulambu wa kwocha ni kahia kuli Yehova.

¹⁹ Utwale mwe kuji ya panga mukwo; Arone ni ana jenyi a malunga asayike moko jo ha mutwe wa mwe kuji ya panga.

²⁰ Hohene ushihe mwe kuji ya panga, utwale manyinga jenyi hikukomona ha songo lia twitwi lia chindume lia Arone ni ha songo lia matwi a chindume a ana jenyi a malunga ni ha minwe ya shina ya moko jo a chindume, ni ha minwe ya shina ya molu jo a chindume. Usapwile e manyinga ha chilumbilo kwa kujingilika kweswe.

²¹ Uchize ku manyinga ali ha chilumbilo ni ku maji a kuwayisa no, wasapwile hali Arone, ni ha mazalo jenyi, ni hali ana jenyi a malunga, ni ha mazalo a ana jenyi a malunga hamwe nenyi. Umusele usandu ni mazalo jenyi, ni ana jenyi a malunga, ni mazalo a ana jenyi a malunga.

²² Ukande nawa maji a mwe kuji ya panga ni muchila wa maji, ni maji ali ku yingambiangambia ya muchima, ni maji a ha liayi, ni njiso jiali, ni maji jaho, ni chilama cha chindume, mumu iye kuji ya panga wa kwatumbikila ku uvumbiko.

²³ Ukachize ku mutonga wa mbolo kuyishi futunwiso watwama kumeso ja Yehova, mbolo yimuwika, ni chandanda chimuwika cha mbolo ya kulembula ni maji, ni likemba limuwika.

²⁴ Ukatumbike yeswe lukombo ha moko ja Arone ni ha moko ja ana jenyi a malunga. Ukayihungise yikapwe mulambu wa kuhungisa kumeso ja Yehova.

²⁵ Ukayichize ku moko jo hikuyilumba ha chilumbilo ya kunangika ha mulambu wa kulumba, yikapwe lupembo mupema kumeso ja Yehova. Kuwapwa mulambu wa kwocha ni kahia kuli Yehova.

²⁶ Ukande nawa pambo lia kuji ya panga yoze wa kutumbikila Arone ku uvumbiko, ukalihungise likapwe mulambu wa kuhungisa kumeso ja Yehova. Mba mulipwa chitundo che.

²⁷ Lie pambo lia mulambu wa kuhungisa ukalisele ku usandu ni chilama cha mulambu wa kuzundula cha kuhungisa, cha kuzundula cha ku kuji ya panga wa kwatumbikila ku uvumbiko te kuli yoze wapwa hali Arone ni kuli yoze wapwa hali ana jenyi a malunga.

²⁸ Yikapwe ya Arone ni ana jenyi a malunga ya kuli A-Izalele ni chiyulo cha mutolo. Kuwapwa mulambu wa kuzundula. Ukapwe mulambu wa kuzundula wa kuli A-Izalele wa ku milambu yo ya sambukila te milambu yo ya kuzundula kuli Yehova.

²⁹ Mazalo asandu a Arone akapwe hali ana jenyi a malunga kulutwe lienyi, ha kwazala akaawayise ni maji, akaatumbikile no ku uvumbiko.

³⁰ Mwanenyi wa lunga mapwa sasendote ha kumusalakana akaazale matangwa shimbiali muze manjila mu mbalaka ya chikungulwila mukuvumbikila muma musandu.

³¹ Ukatwale mwe kuji ya panga wa kwatumbikila ku uvumbiko, mba yifwo yenyi ukayitelekele kumwe kuma kusandu.

³² Ye yifwo ya kuji ya panga ni mbolo yili mu mutonga, Arone ni ana jenyi a malunga akayilile ku chikolo cha mbalaka ya chikungulwila.

³³ Akalie yuma ya kufuka nayo shili, mukwatumbikila ku uvumbiko, mukwasela ku usandu. Chilambala kanda akaliako, mumu kuyapwa yisandu.

³⁴ Mba nyi yifwo yimwe ya kwatumbikila ku uvumbiko, hanji mbolo yimwe muyilisalaho ndo mu kucha, ukoche ni kahia yize yalisalaho. Kanda akayilia mumu kuyapwa yisandu.

³⁵ Ukalinge chocho kuli Arone ni kuli ana jenyi a malunga nikulita ni yize yeswe hinakwamba. Ukaatumbikile ku uvumbiko matangwa shimbiali.

³⁶ Tangwa ha tangwa ukatambule kuji ya ngombe ha shili, ha kufuka. Ukapemese chilumbilo ha kutwala ku shili ha kuchifuka, ukachiwayise ni maji mukuchisela ku usandu.

³⁷ Ukafuke che chilumbilo matangwa shimbiali, ukachisele ku usandu. Chilumbilo chikapwe chisandu chahiana. Yeswayo muyikwata ku chilumbilo yikapwe yisandu.

³⁸ Chuma mulambwila ha chilumbilo chino, ana a mapanga aali a mwaka Umuwika, kwalambula tangwa ha tangwa, matangwa eswe.

³⁹ Mwana-panga umuwika ukamulambule ha chimene, mba mwana-panga mukwo ukamulambule ha chingoloshi.

⁴⁰ Hamwe ni mwana-panga umwe ukatambule chihanda chimuwika cha ku kumi lia yihanda ya wunga wafufunuka, cha kuchinga ni chihanda chimuwika cha ku yihanda yiwana ya *hine ya maji a kusohola ni chihanda chimuwika cha ku yihanda yiwana ya *hine ya vinyu, yikapwe mulambu wa kunwa.

⁴¹ Mba mwana-panga mukwo ukamulambule ha chingoloshi. Ukalinge nenyi nikulita ni mulambu wa wunga wa chimene, nikulita ni mulambu wa kunwa, akapwe lupembo mupema, mulambu wa kwocha ni kahia kuli Yehova.

⁴² Akapwe mulambu wa kulumba wa matangwa eswe ndusu yisemuko yenu, ku chikolo cha mbalaka ya chikungulwila, kumeso ja Yehova, kuze mungukatakana ni yenu mukuhanjikilako ni yenu.

⁴³ Kuze mungukatakana ni A-Izalele. Ulemu wami muukapwisa yisandu ye mbalaka.

⁴⁴ Mungukapwisa yisandu mbalaka ya chikungulwila ni chilumbilo nawa. Arone ni ana jenyi a malunga nawa mungwasela ku usandu, akangulingile usasendote.

⁴⁵ Kumungukatwama hakachi ka A-Izalele. Kumungukapwa Zambi yo.

⁴⁶ O kumakanyingika ngwo, Mwe Yehova Zambi yetu, watuchijile ku chifuchi cha Engitu, hanga akatwame hakachi ketu. Ngwami, Yami Yehova, Zambi yo.