Kutuhuka 28 - MUKANDA USANDU WA ZAMBI 1975

¹ Ukakundamise kuli yena yayenu Arone ni ana jenyi a malunga hamwe nenyi, kwachiza kuli A-Izalele hanga iye akangulingile usasendote; ni Arone, ni Nandambe, ni Ambihu, ni Elieza, ni Itama, eswe te ana a malunga a Arone.

² Ukatongele yayenu Arone mazalo asandu, akapwe a ulemu, a upeme.

³ Ukahanjike ni atu eswe akwete mana, waze hinaazalisa ni Spiritu ya mana, akatonge mazalo a Arone akamusele ku usandu hanga iye akangulingile milimo ya usasendote.

⁴ Mazalo matonga wano; ni chipwiko, ni efode, ni hina lia ngungu, ni chikuto cha milimo ya kwola ya uhenya, ni kapusa, ni muya wa ponda; akatongele yayenu Arone ni ana jenyi a malunga mazalo asandu hanga iye akangulingile usasendote.

⁵ O akande oru ni mahina alauluka, ni a ufungo, ni a ngengu, ni apema atoma.

⁶ Akalinge ye efode ya oru ni ya hina lilauluka, ni lia ufungo, ni lia ngengu, ni lipema litoma, chitanga cha chilangaji.

⁷ Efode yikapwe ni yipaya yiali ya kutolokenya ku masongo jayo aali; akapwe a kutolokenya.

⁸ We muya wa ponda wa ulangaji uliho wa kumujichikila ukapwe wa milimo yimuwika ni hina limuwika, te wa oru ni wa hina lilauluka, ni lia ufungo, ni lia ngengu, ni lipema litoma.

⁹ Ukande nawa mawe aali a sardonica, ukoleho majina ja ana a Izalele.

¹⁰ Majina ja asambano akapwe ha liwe limuwika, mba majina ja asambano alisalako akapwe ha liwe likwo nikulita ni kusemuka cho.

¹¹ Ukole e mawe aali ni milimo ya mukwa kwola ha mawe, ngwe mola ha kazeya nikulita ni majina ja ana a Izalele. Ukaanjise mu maselo ja oru.

¹² Ukanangike e mawe aali ha yipaya ya ye efode, akapwe mawe a Chiwulwiso hali A-Izalele. Arone akambate majina jo kumeso ja Yehova ha yipaya yenyi yiali, akapwe Chiwulwiso.

¹³ Ukafule maselo ja oru.

¹⁴ Ukafule nawa malenge aali a oru ya kusayisa, nikwafula ngwe mihipu ya kuhosa. Ukanunge e malenge a kuhosa ha maselo.

¹⁵ Ukalinge chipwiko cha upatwilo, chitanga cha chilangaji. Ukachilinge cha kulifwa ni milimo ya ku ye efode, cha oru, ni cha hina lilauluka, ni lia ufungo, ni lia ngengu, ni lipema litoma.

¹⁶ Chikapwe ni ukundwilo uwana weswe wa usuhe umuwika ndwa, cha kupama. Usuhe wacho wa chikambakamba chimuwika. Utohe wacho wa chikambakamba chimuwika.

¹⁷ Ukanjise mawe mu yituwa yacho, mikala yiwana ya mawe. Mukala utangu wa mawe a sartiu, ni topajiu, ni carbunkulu.

¹⁸ Mukala wamuchiali wa esmeralda, ni safwira, ni diamante.

¹⁹ Mukala wamuchitatu wa jasendu, ni agata, ni ametita.

²⁰ Mukala wamuchiwana wa turkeza, ni sardonica, ni jasepe. Ukaasele mu maselo jo ja oru.

²¹ E mawe akalite ni majina ja ana a Izalele, kumi lia mawe ni mawe aali nikulita ni majina jo, ngwe kwola cha ha kazeya, vungu ni vungu nikulita ni jina lialio. Akapwe a mavungu kumi ni aali.

²² Ukafulile che chipwiko malenge aali a oru ya kusayisa, ngwe mihipu ya kuhosa.

²³ Ukafulile chipwiko ngo jiali ja oru nikujisela ku masongo aali a chipwiko.

²⁴ Ukanjise malenge aali a oru a kuhosa mu ngo jiali jize jatwama ku masongo aali a chipwiko.

²⁵ Masongo aali akwo a malenge aali a kuhosa ukanjise mu maselo aali mba hikwasa kuze kulutwe ha yipaya yiali ya ye efode.

²⁶ Ukafule ngo jiali ja oru, ukajisele ku masongo aali a chipwiko ha ukundwilo wacho wa muchima uze walihata ni ye efode.

²⁷ Ukafule nawa ngo jiali ja oru mba hikujisa kulutwe ha chihanda chize cha kushi cha yipaya yiali ya ye efode kusulangana ni unungino wayo helu lia we muya wa ponda wa ulangaji wa efode.

²⁸ Akakashile che chipwiko ku ngo jacho ni ku ngo ja efode ni wanda ulauluka hanga chikapwe ha muya wa ponda wa ulangaji wa ku efode, hanga chipwiko kuchichi kukasuluka ku ye efode.

²⁹ Arone akambate majina ja A-Izalele ku chipwiko cha upatwilo ha mbunge yenyi, muze manjila muma musandu, chikapwe Chiwulwiso kumeso ja Yehova matangwa eswe.

³⁰ Ukase nawa mu chipwiko cha upatwilo Urimi ni Tumimi, yikapwe ha mbunge ya Arone muze manjila kumeso ja Yehova. Arone akambate ha mbunge yenyi upatwilo wa A-Izalele kumeso ja Yehova matangwa eswe.

³¹ Ukatonge hina lia ngungu lia efode lieswe lukombo lilauluka.

³² Likapwe ni chituwa cha mutwe mukachi. Likapwe ni lupula wa kuseleka wa kujingilika che chituwa chalio, ngwe chituwa cha ku chikuto cha utale hanga kulichi katanuka.

³³ Ha lupula uli ku songo lialio ukatongeleho romana jilauluka, ni ja ufungo, ni ja ngengu, ja kusowela ni yiwolowolo ya oru ha kujingilika lupula mweswe.

³⁴ Chiwolowolo cha oru ni romana, chiwolowolo cha oru ni romana ha lupula wa hina lia ngungu, ha kujingilika kweswe.

³⁵ Mba Arone akalizale ha kuvumbika. Liji liacho mulikahiohia muze manjila muma musandu kumeso ja Yehova ni muze matuhuka, kuchina iye mafwa.

³⁶ Ukafule chipenya cha oru ya kusayisa. Ukoleho ngwe kwola cha ha kazeya, ngwo, MUSANDU KULI YEHOVA.

³⁷ Ukachikashile ha kapusa ni wanda ulauluka, chikapwe kulutwe ha mwe kapusa.

³⁸ Chikapwe ha huma lia Arone. Arone akambate uhenge wa yuma yisandu, yenayo A-Izalele makayisela ku usandu ku yawana yo yeswe yisandu. Chikapwe ha huma lienyi matangwa eswe hanga akaatambule kumeso ja Yehova.

³⁹ Ukatonge chikuto cha hina lipema litoma. Ukatonge nawa kapusa ni hina lipema litoma. Ukatonge muya wa ponda, milimo ya mukwa kwola.

⁴⁰ Ukatongele ana a malunga a Arone yikuto. Ukaatongele nawa miya ya ponda ni tupusa asuku ukaatongele, a ulemu, a upeme.

⁴¹ Ukajikeyo yayenu Arone ni ana jenyi a malunga. Ukaawayise ni maji. Ukaasele ku uvumbiko. Ukaasele usandu hanga akangulingile usasendote.

⁴² Ukaatongele kaputula wa hina lipema litoma, akafuke nenyi uselesele wa mijimba yo, chize ku mitanda akahete ndo ku shina lia kulu.

⁴³ Arone ni ana jenyi a malunga akamuzale muze manjila mu mbalaka ya chikungulwila hanji muze makundama ku chilumbilo mukuvumbika muma musandu, kuchina mambata uhenge mba mafwa. Chikapwe chiyulo ndo ku miaka ya mutolo hali iye ni hali ana jenyi kulutwe lienyi.