Kutuhuka 24 - MUKANDA USANDU WA ZAMBI 1975

¹ Iye yamba kuli Mose ngwenyi, Kandukenu kuli Yehova, yena ni Arone ni Nandambe ni Ambihu ni makumi shimbiali a makulwana a A-Izalele. Nukawayilile kusuku.

² Mose ukawenyi akakundame kuli Yehova. Alioze o kanda akakundama, chipwe e atu kanda akakanduka hamwe nenyi.

³ Mose yaya, yambulwila atu maliji eswe a Yehova ni chiyulo cheswe. Atu eswe akumbulwile ni liji limuwika ngwo, Maliji ano eswe Yehova hahanjika kumutukaalinga.

⁴ Mose yasoneka maliji eswe a Yehova, yalimeneka chimenemene mbwi, yatunga ku kulwa mulundu chilumbilo ni kumi lia manguji ni manguji aali nikulita ni mavungu a A-Izalele kumi ni aali.

⁵ Yatuma akweze a A-Izalele o alambwile milambu ya kulumba, yalambula kuli Yehova ngombe apwe milambu ya sambukila.

⁶ Mose yanda chihanda cha hakachi cha ku manyinga, yasa mu mbasia jimwe, mba chihanda chikwo yachisapwila ha che chilumbilo.

⁷ Iye yanda we mukanda wa usendo, yautanga hanga atu akevwe. O yamba ngwo, Ye yeswe hahanjika Yehova yetu kumutukayilinga. Kumutukononoka.

⁸ Mose yanda manyinga, yaasapwila hali e atu ngwenyi, Talenu manyinga a usendo Yehova hanakolesa ni yenu ha kutwala ku maliji ano eswe.

⁹ Hohene akandukile Mose ni Arone ni Nandambe ni Ambihu ni makumi shimbiali a makulwana a A-Izalele.

¹⁰ O yamona Zambi ya A-Izalele. Kushi lia yiliato yenyi kwapwile ngwe mawe a safwira a kwala, zwalala lume ngwe mwilu.

¹¹ Yilolo ja A-Izalele kaalingile chipi, yamona Zambi, yalia, yanwa.

¹² Yehova yamba kuli Mose ngwenyi, Kanduka ha mulundu ndo kuli yami, utwameko. Mungukwaha mawe ni shimbi ni maliji a shimbi, yize hingunasoneka, ukayilongese.

¹³ Mose yakatuka hamwe ni Yoshua, kavumbi kenyi, mba Mose yakanduka ha mulundu wa Zambi.

¹⁴ Iye yamba kuli e makulwana ngwenyi, Nututwaminyine kuno ndo mutwiza nawa kuli yenu. Arone ni Hure hamwe ni yenu ali, mweswawo uli ni liji ahete kuli ayo.

¹⁵ Mose yakanduka ha mulundu. Lie lelwa liafukile mulundu.

¹⁶ Uhenya wa Yehova Watwamine ha mulundu wa Sinai. Lie lelwa yiliufuka ha matangwa asambano. Ha tangwa liamuchishimbiali iye yatambika kuli Mose ni liji yilituhuka muchima lia lelwa.

¹⁷ Kusoloka cha uhenya wa Yehova chapwile ngwe kahia ka kulalisa ha mbulwa mulundu kumeso ja A-Izalele.

¹⁸ Mose yanjila mwe muchima lia lelwa. Yakanduka ha mulundu. Mose wapwile ha mulundu makumi awana a matangwa ni makumi awana a ufuku.