Kutuhuka 23 - MUKANDA USANDU WA ZAMBI 1975

¹ Kanda ukambulula saki. Kanda ukalifutula ni yingulungulu kupwa chela cha uhenge.

² Kanda ukakaula mbunga mukulinga chipi. Chipwe ha kusopa mutonga kanda ukashindakenya nikukaula mbunga mukuhengesa upatwilo.

³ Chipwe kanda ukalemesa chiswale ni chikuma chenyi.

⁴ Nyi muwana ngombe wa mukwa kole ye, hanji chimbulu chenyi kanapianguka, ukamuhilwise wate kuli iye nawa.

⁵ Nyi mumona chimbulu cha yoze wakukuvwila kole kanashachiwa ni chiteli chenyi, kanyama, kanda ukachina kumukwasa. Uchimukwase lume kumulelumuna.

⁶ Kanda ukahengesa upatwilo wa mukwenu chiswale ku chikuma chenyi.

⁷ Usosoloke kusuku ni chuma cha mahuza. Kanda ukashiha mukwa kusamba chipwe mukwa ululi, mumu ami chichi kusambisa yingulungulu.

⁸ Kanda ukatambula chijiko, mumu chijiko kuchakupupuchisa waze akwete meso. Kuchakuhengesa maliji a mukwa ululi.

⁹ Kanda ukamwesa lamba njize, mumu nunanyingika mbunge ya njize, se yenwene nwapwile njize mu chifuchi cha Engitu.

¹⁰ Ukalime minda ye ha miaka yisambano. Ukache mbuto yayo.

¹¹ Alioze ha mwaka wamuchishimbiali hikuyecha lume, yikapwe yihutu, hanga yiswale a atu jami akalie. Mba yize makahichika, tushitu a mu yambu akalie. Chizechene ukalinge ni munda we wa uva ni wa olevwe nawa.

¹² Ha matangwa asambano ukalinge milimo ye. Ha tangwa liamuchishimbiali hikuhwima, ni ngombe ye, ni chimbulu che akahwime, hanga mwana wa ndungo ye wa pwo ni njize akasanguluke.

¹³ Nukafunge yuma yeswe hinamba kuli yenu. Kanda nukavuluka majina ja tuzambi tweka, chipwe kanda akaevwa ku makanwa jenu.

¹⁴ Mwaka ha mwaka, yisuho yitatu, ukangulingile chiwanyino.

¹⁵ Ukafunge chiwanyino cha mbolo kuyishi futunwiso. Ukalie mbolo kuyishi futunwiso matangwa shimbiali ngwe nakwambile, haze naselele ha kakweji ka Ambimbi, mumu ha yoze mwene yena wakatukile ku Engitu. Kanda akasoloka kumeso jami mokomoko.

¹⁶ Chiwanyino cha kuhela mbuto, (mbuto yitangu ya ku kuhondangana che), wakulima ku munda, ni chiwanyino cha kukungila mbuto ha kuhwa cha mwaka, muze mukunga ya ku kuhondangana che ku munda.

¹⁷ Malunga je eswe akasoloke kumeso ja Mwene Yehova mwaka ha mwaka, yisuho yitatu.

¹⁸ Kanda ukalambula manyinga a chitapo chami hamwe ni mbolo ya futunwiso. Chipwe maji a chiwanyino chami kanda asala ufuku weswe ndo mu kucha.

¹⁹ Ukahetese mu zuwo lia Yehova Zambi ye, yitangu ya kuhia ya ku mbuto ya mu minda ye. Kanda ukateleka mwana-pembe mu yamwa ya naye.

²⁰ Mungutuma mungelo kulutwe lie mukukufunga mu jila, mukukuhetesa kuze hingunalulika.

²¹ Ulifunge kumeso jenyi, uhalakane ku liji lienyi. Kanda ukamuvwisa kupiha mumu iye kechi kukonekena uvulumunyi we, mumu jina liami lili muli iye.

²² Alioze nyi chamwenemwene muhalakana ku liji lienyi nikulinga yeswe mungwamba, mba kumungukapwa mukwa kole kuli akwa kole je, mukwa kumwesa luyinda kuli waze akukumwesa luyinda.

²³ Mumu mungelo wami kumakakutetekela, kumakakuhetesa ndo kuli A-Amore, ni kuli A-Hete, ni kuli A-Perize, ni kuli A-Kanana, ni kuli A-Hevwe, ni kuli A-Yepushe. Yami kumungukaateta.

²⁴ Kanda ukafukama kuli tuzambi two chipwe kwalingila, ka, chipwe kanda ukalinga nikulita ni yitanga yo alioze ukaapuzule liakulu. Ukapalwole yipinji tuponya two.

²⁵ Nukavumbike Yehova Zambi yenu. Iye kumakawahisa kulia chenu ni meya jenu. Kumungukachiza kuyiza hakachi kenu.

²⁶ Kukuchi kapwa mu chifuchi chenu niumwe yoze maselumuna mwanenyi, chipwe mumba, ka. Kumungukanuhetesa ku kuzuka cha matangwa jenu.

²⁷ Kumungukatuma mwongo wami kulutwe lienu. Mungukapinjisa atu eswe waze munukaaheta, mba akwa kole jenu eswe makanuchina.

²⁸ Kumungukatuma mboji kulutwe lienu, waze makahuma kumeso jenu A-Hevwe, ni A-Kanana, ni A-Hete.

²⁹ Chichi kwahuma kumeso jenu ha mwaka umuwika kuchina che chifuchi muchikapwa chahululu mba tushitu a mu yambu makanwokela.

³⁰ Hakehe hakehe mungukaahuma kulutwe lienu ndo munukapwa mbunga nikupita chifuchi.

³¹ Mungukafunjika njiza jenu chize ku Kalunga-lwiji Muchila ndo ku kalunga-lwiji wa A-Filistea; chize ku puya ndo ku Lwiji, mumu mungukakunjika akwa chifuchi chize ku moko jenu mba yenu munukaahuma kulutwe lienu.

³² Kanda nukakolesa no usendo niweumwe chipwe ni tuzambi two, ka.

³³ Kanda akatwama mu chifuchi chenu kuchina manuvulumwisa mu yuma yami. Mumu nyi munulingila tuzambi two, chamwenemwene kumuchikapwa kambwila kuli yenu.