Kutuhuka 22 - MUKANDA USANDU WA ZAMBI 1975

¹ Kachi mutu meya ngombe hanji panga mba mamushiha chipwe mamulanjisa, iye akafwete ngombe atano ha ngombe umuwika. Mapanga awana ha panga umuwika.

² Nyi makwata mwiji kanalokola zuwo, mamulamba chocho mafwa, kukuchi kapwa uhiso wa manyinga mumu hali iye.

³ Kachi tangwa mulimuvumbukila, kumukukapwa uhiso wa manyinga mumu hali iye. Akahilwise yeswe. Nyi mokomoko ali, akamulanjise mumu ha wiji wenyi.

⁴ Kachi mawana chuma cha wiji ku kwoko lienyi chichili ni mwono, chipwe ngombe, chipwe chimbulu, chipwe panga, iye akafwete kaali.

⁵ Kachi mutu maliwisa munda, chipwe wa uva, nyi mazulwila chimuna chenyi mba malia ku munda wa mbala, akahilwise yeswe ya ku yuma yipema yahiana ya mu munda wenyi wa uva, hanji ya mu wande wenyi.

⁶ Kachi kahia mukasambuka mba mingonga muyikwata kahia chocho yichita ya mbuto muyiwema, chipwe mbuto yize yichili ku ulime chipwe munda, yoze wawikanga ke kahia akahilwise yeswe lume.

⁷ Kachi mutu makunjika kuli mwenyembo wenyi mbongo hanji yikumba akayitulike, mba mamwiyayo ku zuwo lia mwe mutu, nyi mawana mwiji, akafwete kaali.

⁸ Alioze nyi kechi kuwana mwiji mba mwenya zuwo mamuhetesa kuli ngaji akatale nyi iye mwene kakwachile ni kwoko lienyi ye yikumba ya mwenyembo wenyi.

⁹ Ha yikuma yeswe ya uvulumunyi chipwe ha kutwala ku ngombe, hanji chimbulu, hanji panga, hanji mahina, hanji chuma cheswacho chatoka chize mutu mavuluka ngwenyi, Acho nichami. Liji, lia eswe aali likahete kumeso ja ngaji. Yoze mamuhisa kuli ngaji akafwete kaali kuli mukwo.

¹⁰ Kachi mutu makunjika kuli mukwo chimbulu, hanji ngombe, hanji panga, hanji chimuna, akamwajilileye, mba mafwa, hanji malemana, hanji matoka, niumwe kuchimona wakuhi.

¹¹ Shingo lia Yehova likapwe hakachi ka eswe aali ngwenyi, Chakwachile ku yuma ya mukwetu. Mba mwenyacho akachifuliele, kanda akachifweta.

¹² Alioze nyi mamwiyacho, akahane cheka kuli mwenyacho.

¹³ Nyi hapapuluka yipinji akamuhetese ha yela. Kanda akafweta yoze wapapuluka.

¹⁴ Kachi mutu matambula chimuna kuli mukwo mba malemana hanji mafwa, kako te keshiko; akamuhilwishile weka.

¹⁵ Kachi mwe kako mapwa hamwe nenyi, kanda akamuhilwishila weka. Kachi wapwa wa fweto, kejilanga fweto yenyi.

¹⁶ Kachi lunga masongojola mwana-pwo yoze te kanda achipomba ni lunga, kanda achimutenda, mba mapomba nenyi, kachi iye akafwete chihako lume hali iye, akapwe mukwo-pwo.

¹⁷ Kachi tato ya mwana-pwo kasolo pundu kumwahaye, mwe lunga akafwete mbongo nikulita ni yihako ya ana-mapwo waze kanda achipomba ni malunga.

¹⁸ Kanda ukatayiza chimbanda kutwama ni mwono.

¹⁹ Mweswawo mapomba ni kashitu, akamushihe lume.

²⁰ Yoze matambula kuli kazambi keswako shina Yehova wika, akamwonwone liakulu.

²¹ Kanda ukalinga chipi kuli njize chipwe kumumwesa lamba, ka. Mumu yenu nwapwile njize mu chifuchi cha Engitu.

²² Kanda nukayindamisa twamishi wa pwo chipwe mwana-shiwa, ka.

²³ Kachi munwayindamisa chimwe mba o mateta kuli yami kachi chamwenemwene kumungwivwa muteto wo.

²⁴ Mba utenu wami muukasasaminya, kumungukamushiha ni katana. Akwenumapwo kumakapwa tuliwa; ana jenu ashiwa.

²⁵ Kachi muhana mbongo ja makongo kuli chiswale mweswawo wa atu jami, kanda ukapwa kuli iye mukwa kuhana mbongo chipwe kanda ukamufwetesa mbwezo.

²⁶ Nyi hanji mutambula uzalo wa mukwenu ukapwe chifungo, umuhilwishilewo shimbu tangwa kanda likatoka.

²⁷ Mumu lioliene kuliapwa lia kulifuka nalio. Kuliapwa hina lia ku mujimba wenyi. Neka mapomba? Mba muze iye mateta kuli yami, kumungwivwa, mumu yami mukwa vumbi.

²⁸ Kanda ukashililika Zambi. Chipwe kanda ukatuka mukwa kuyula atu je.

²⁹ Kanda ukalaluka kutambula ya ku kulumbama cha mbuto ye, ni ya ku maji a mu ukamino we. Tupula-majimo a kuli ané a malunga ukaahane kuli yami.

³⁰ Chizechene ukalinge ni ngombe je ni mapanga je. Mwana atwame ni naye matangwa shimbiali. Ha tangwa liamuchinake ukamuhane kuli yami.

³¹ Nukapwe atu asandu kuli yami. Kashika kanda nukalia yifwo niyimwe yize vinapapuluka kuli tushitu a mu yambu. Nukayimbile ku tuwa.