Kutuhuka 21 - MUKANDA USANDU WA ZAMBI 1975

¹ Yiyulo yino mukayisela ku meso jo.

² Kachi mulanda ndungo Ka-Hepreu, akavumbike miaka yisambano. Ha mwaka wamuchishimbiali akatusuke chawana.

³ Kachi iye manjila ukawenyi, kachi akatuhuke ukawenyi. Kachi hambata pwo, kachi pwo lienyi akatuhuke hamwe nenyi.

⁴ Kachi kako mamwaha pwo mba iye mamusemena ana a malunga ni ana a mapwo, kachi mwe pwo ni e ana mapwa a mbala a kako, lunga akatuhuke ukawenyi.

⁵ Alioze nyi ndungo mapatula pundu ngwenyi, Ami kunazanga kaka ni mukwetu-pwo ni ana jami, chazangile kutusuka.

⁶ Henaho kako akamuhetese kuli ngaji. Amunehe ku chikolo chipwe ku yipamba ya ku chikolo. Mwe kako akamutuwe twitwi lienyi ni katwalo. Iye akamuvumbike ndo ku miaka ya mutolo.

⁷ Kachi umwe lunga malanjisa mwanenyi wa pwo akapwe ndungo, kanda akatuhuka chizechene ngwe ndungo ja malunga.

⁸ Kachi mapihila kako yoze wamutendele kachi até, amukule. Kechi kuhasa kumulanjisa kuli tundaka se halinga nenyi ni mafwefwe.

⁹ Kachi mamuhangisa kuli mwanenyi wa lunga kachi akalinge nenyi nikulita ni shimbi ya anenyi a mapwo.

¹⁰ Nyi mambata mukwo, kanda akakehesa kulia chenyi, chipwe mahina jenyi, chipwe ndako ya ulo wenyi.

¹¹ Mba nyi lunga kechi kumulingila yino yuma yitatu, mba iye akatusuke chawana. Kechi kufweta mbongo, ka.

¹² Yoze malamba mutu, mba mafwa akamushihe lume.

¹³ Nyi mutu kechi kujikinyina mukwo alioze Zambi mamukunjika ku kwoko lienyi, yami mungukamusela chihela cha kuchinyinako.

¹⁴ Nyi mutu mavwila shili mwenyembo wenyi mukumushiha ni kalimbalimba, ukamuchize ku chilumbilo chami, akafwe.

¹⁵ Yoze malamba tato hanji naye, akamushihe lume.

¹⁶ Yoze meya mutu nikumulanjisa, hanji mamuwana nenyi, akamushihe lume.

¹⁷ Yoze mashililika tato hanji naye, akamushihe lume.

¹⁸ Nyi malunga mazwela, umwe malamba mukwo ni liwe chipwe ni kome, mba mapomba ha muhela nikuyiza hindu kechi kufwa.

¹⁹ Kachi iye mahinduka nawa, maya haze nikujikijila ha mulumbu wenyi, kanda akasuma mutonga yoze wamulamba. Akafwete wika matangwa aze a kuyiza chenyi. Akamuhindwise liakulu.

²⁰ Kachi mutu malamba ni mbwechi ndungo yenyi wa lunga, hanji ndungo yenyi wa pwo, mba mafwa ni kwoko lienyi, akamukale.

²¹ Hindu nyi iye matwama ni mwono matangwa amwe, kanda akamukala mumu iye mbongo jenyi.

²² Kachi atu mazwela, malemeka kafumbakaji chocho maselumuna mwana, alioze kukuchi kupwa ulema, akamufwetese lume, nikulita ni chize mukwo-lunga mamusela. Iye akafwete ngwe ngaji matongola.

²³ Alioze kachi ulema umwe muusoloka kachi akahane mwono ha mwono,

²⁴ liso ha liso, lizo ha lizo, kwoko ha kwoko, kulu ha kulu,

²⁵ kuwema ha kuwema, ulema ha ulema, mujiji ha mujiji.

²⁶ Kachi mutu malamba liso lia ndungo yenyi wa lunga, hanji liso lia ndungo yenyi wa pwo, mamushihalio, akamutusule mumu ha liso lienyi.

²⁷ Kachi mapukula lizo lia ndungo yenyi wa lunga, hanji lizo lia ndungo yenyi wa pwo, akamutusule mumu ha lizo lienyi.

²⁸ Kachi ngombe mapupa ni mbinga lunga hanji pwo, mba mafwa, akase mawe mwe ngombe. Kanda akalia yifwo yenyi. Kako wa mwe ngombe kanda amusuma mutonga.

²⁹ Alioze nyi mwe ngombe wapwile nikupupa matangwa a kunyima, mba yachishindakenya kuli kako, hindu kamwajilile, alioze hashiha lunga hanji pwo, akase mawe mwe ngombe. Akashihe nawa mwe kako.

³⁰ Kachi mamusela ndando ya kuka kachi akahane ukule wa mwono wenyi cheswacho mamuselacho.

³¹ Chipwe hapupa ni mbinga mwana-lunga, chipwe hapupa ni mbinga mwana-pwo, nikulita ni chiyulo chino akalinge kuli iye.

³² Nyi ngombe mapupa ni mbinga ndungo wa lunga hanji ndungo wa pwo, akahane kuli kako makumi atatu a shekele ja prata. Akase mawe mwe ngombe.

³³ Kachi mutu mashikulula wumbu hanji mashima wumbu kulishi kufuka, mba hanji ngombe hanji chimbulu maholokelamo,

³⁴ mukwa wumbu akafwete. Akahane mbongo kuli kako. Kashitu yoze wafwa akapwe niwenyi.

³⁵ Kachi ngombe wa mutu umwe malemeka ngombe wa mbala mba mafwa, kachi akalanjise ngombe wa mwono akalipangile ye ndando. Akalipangile nawa yoze wafwa.

³⁶ Alioze nyi hanyingika ngwo, Mwe ngombe wapwile nikupupa matangwa a kunyima, kako kamukuchikileko. Iye akafwete lume ngombe ha ngombe. Kashitu yoze wafwa akapwe niwenyi.