Kutuhuka 20 - MUKANDA USANDU WA ZAMBI 1975

¹ Zambi wambile maliji wano eswe ngwenyi,

² Nakuchijile ku chifuchi cha Engitu, ku zuwo lia upinji, Yami Yehova Zambi ye.

³ Kanda ukapwa ni tuzambi tweka kumeso jami.

⁴ Kanda ukalisongela kaponya, chipwe wa kulifwa ni chuma chimwe cha mwilu, chipwe chuma cha hashi, chipwe chuma cha mu meya mushi lia hashi.

⁵ Kanda ukafukama kuli ayo, chipwe kwalingila, ka, mumu yami Yehova Zambi ye, nguli Zambi ya ukwa, nikufwetesa ana uhenge wa atato ndo ku chisemuko chamuchitatu ni chamuchiwana cha waze akunguvwila kole;

⁶ nikulweza utu wa zango kuli tununu twa waze akunguzanga, kuli waze akufunga shimbi jami.

⁷ Kanda ukavuluka ni mahuza jina lia Yehova Zambi ye, mumu Yehova kechi kusambisa yoze mavuluka ni mahuza jina lienyi.

⁸ Iwuluka tangwa lia Sambata, ukalifunge lisandu.

⁹ Ukahondangane matangwa asambano. Ukalingeho milimo ye yeswe.

¹⁰ Alioze tangwa liamuchishimbiali Sambata kuli Yehova Zambi ye. Kanda ukalingaho milimo niyeyimwe, chipwe yena, chipwe mwané wa lunga, chipwe mwané wa pwo, chipwe ngamba ye wa lunga, chipwe ngamba ye wa pwo, chipwe yimuna je, chipwe njize uli mu chihunda che.

¹¹ Mumu ha matangwa asambano Yehova alingile malilu, ni hashi, ni kalunga-lwiji ni yuma yeswe yilimo. Yahwima ha tangwa liamuchishimbiali. Kashika Yehova wawahishile lie tangwa lia Sambata. Yalipwisa lisandu.

¹² Lemesa tatenu ni noko, hanga matangwa je akapwe anji mu chifuchi chize Yehova Zambi ye kanakwehe.

¹³ Kanda ukashiha mutu.

¹⁴ Kanda ukalinga utanji.

¹⁵ Kanda ukeya.

¹⁶ Kanda ukatayila mahuza mwenyembo we.

¹⁷ Kanda ukavwila chipululu zuwo lia mwenyembo we. Kanda ukavwila chipululu pwo lia mwenyembo we, chipwe ngamba yenyi wa lunga, chipwe ngamba yenyi wa pwo, chipwe ngombe yenyi, chipwe chimbulu chenyi, chipwe chuma chimwe cha mwenyembo we.

¹⁸ Mba e atu eswe amwene kukulunguza ni mihenyo ni lie liji lia chitavwi ni mulundu unatuhwisa mwishi. Muze atu achimwene, yachikima, yamana kusuku.

¹⁹ O yamba kuli Mose ngwo, Hanjika yena ni yetu mba kumutwivwa, alioze Zambi kanda ahanjika kama kuchina mutufwa.

²⁰ Mose yamba kuli e atu ngwenyi, Kanda nwivwa woma mumu Zambi heza mukunweseka, hanga woma wenyi ukapwe kumeso jenu, hanga kunuchi kavulumuna.

²¹ Atu amanyine kusuku. Mose yakundama ndo mu milima pwi muze mwapwile Zambi.

²² Yehova yamba kuli Mose ngwenyi, Chocho ukambe kuli A-Izalele ngwe, Yenwene hinwamona ngwami, Kwilu hinahanjika ni yenu.

²³ Kanda ukalinga tuzambi tweka kwapalakenya ni yami, chipwe tuzambi twa prata, chipwe tuzambi twa oru.

²⁴ Ukangutungile chilumbilo cha mavu. Ukalambwileho milambu ye ya kulumba ni milambu ye ya sambukila, ni mapanga je ni ngombe je. Mu yihela yeswe kuze mungukaewulwisa jina liami kumungukakundama kuli yena. Kumungukakuwahisa.

²⁵ Kachi mukangutungila chilumbilo cha mawe kanda uchitunga ni mawe a kutota, mumu kachi muzundulaho chikungo che, kachi muchipihisa.

²⁶ Chipwe kanda ukanyinyina ha ndondelo ku chilumbilo chami hanga uselesele we kuuchi kasoloka.