Kutuhuka 2 - MUKANDA USANDU WA ZAMBI 1975

¹ Kwayile umwe lunga wa ku munyachi wa Levi, yambata pwo wa kuli A-Levi.

² Mwe pwo yaka ufumba, yasema mwana-lunga. Muze amumwene iye mwana mupema, yamusweka tukweji atatu.

³ Muze te kahashile kumusweka nawa yamutungila kawato ka manenga. Yashilako ni kaso ni usososhi. Yatumbikamo mwe mwana mba yakatumbika ku ngenge ya lwiji hakachi ka mbungu.

⁴ Ndumbwenyi wamanyine kusuku mukunyingika chize muchiwana mwe kemba.

⁵ Mwana wa Falau wa pwo wapalumukine ku lwiji mukusana, mba akwa manda jenyi ja mapwo endele ku mbumbulu ya lwiji. Mwana wa Falau yamona ke kawato hakachi ka mbungu mba yatuma mukwa manda wenyi wa pwo akasake.

⁶ Muze akapakwile yamonamo mwe mwana, kumanyi kanalili. Yamuvwila keke, ngwenyi, Au mwana wa umwe Ka-Hepreu.

⁷ Hoho ndumbu ya mwana wambile kuli mwana wa Falau, ngwenyi, Nguye, ngukutambikile ndeji umwe wa kuli mapwo A-Hepreu, akulelele mwe mwana nyi?

⁸ Mba mwana wa Falau yamba ngwenyi, Yako. Mwe mwana-pwo yaya, yatambika naye ya mwana.

⁹ Mwana wa Falau yamba kuli iye ngwenyi, Tambula yono mwana, ungule-leleye, mba mungukwaha fweto ye. Mwe pwo yatambula mwana, wamulelele.

¹⁰ Mwe mwana watatukile mba yamutwala kuli mwana wa Falau. Iye yamupwisa mwanenyi wa lunga. Yamuluka jina ngwo, Mose, mumu ngwenyi, Namuzambwile mu meya.

¹¹ Ha matangwa aze Mose, muze te hakola, yaya kuli usoko wenyi, yatala yiteli yo. Yamona umwe Ka-Engitu kanalambe umwe Ka-Hepreu wa usoko wenyi.

¹² Yakengesa sali ni sali mba muze hamona te mutu wakuhi, yashiha mwe Ka-Engitu. Yamusweka mu masekeseke.

¹³ Mukwachako iye watuhukile nawa, yamona atu aali A-Hepreu kanazwele, mba yamba kuli lunga unalingi chipi, ngwenyi, Kuchi te unalambe mukwenu?

¹⁴ Iye yamba ngwenyi, Iya wakupwisa mukwa kutuyula hanji mukwa kutupatwila milonga? Unambe kungushiha ngwe unakashiha Ka-Engitu nyi? Mose yevwa woma, ngwenyi, Chamwenemwene chuma chino hichasangiwa.

¹⁵ Mba muze Falau hachivwa, yafupa kushiha Mose. Alioze Mose yachina kumeso ja Falau. Yaya nikutwama ku chifuchi cha A-Mindiane. Yatwama ku shima lia meya.

¹⁶ Sasendote ya A-Mindiane wapwile ni anenyi a mapwo shimbiali. O yeza mukutaha meya. Yazalisa nawa yingolongolo akanwise yimuna ja tato.

¹⁷ Tufunga ejile nikwahuma. Mose yakatuka, yaakwasa, yanwisa e yimuna.

¹⁸ Muze ahetele kuli tato Reuele, iye yamba ngwenyi, Kuchi nweza washi musono?

¹⁹ O ngwo, Umwe Ka-Engitu watupululanga ku moko ja tufunga. Chikwo nawa yatutahila meya, yanwisa mapanga.

²⁰ Iye wambile kuli anenyi a mapwo ngwenyi, Ulihiye? Kuchi te nwahichika mwe lunga? Mutambikenu alie.

²¹ Mba chawahilile Mose kutwama ni mutu yoze. Yahana kuli Mose mwanenyi wa pwo Zepora.

²² Iye wasemene mwana-lunga, yamuluka jina ngwenyi, Ngeshome, mumu te ngwenyi, Ami kunapwa njize mu chifuchi cha mbala.

²³ Ha kupalika miaka yize yinji mwanangana wa Engitu yafwa. Mba A-Izalele afwile mikuma mumu ha mukunda wa upinji; atetele, mba muteto wo wahetele kwilu kuli Zambi, mumu ha mukunda wa upinji.

²⁴ Zambi wevwile mikuma yo. Zambi yewuluka usendo wenyi uze akolesele ni Apalahama ni Izake ni Yakomba.

²⁵ Zambi wamwene A-Izalele. Zambi yasa chinyingi.