Kutuhuka 19 - MUKANDA USANDU WA ZAMBI 1975

¹ Ha kakweji wamuchitatu muze te A-Izalele hatuhuka ku chifuchi cha Engitu, ha tangwa lize liene o yaheta ku puya ya Sinai.

² Muze te hakatuka ku Refwindimi haheta ku puya ya Sinai, yajika mbalaka jo ku puya. Kwe kuze kulutwe lia mulundu A-Izalele yatunga chilombo.

³ Mose wakandukile kuli Zambi mba Yehova watambikile kuli iye ni liji lia kutuhuka ku mulundu ngwenyi, Chocho ukambe kuli A-Yakomba, nikwambulwila A-Izalele ngwe,

⁴ Nwamwene chize nalingile kuli A-Engitu, ngwe yami nanumbachile ha mapulwa ja pupa nikunuhetesa kuli yami mwene.

⁵ Kashika haliapwila, nyi munuzeya chamwenemwene ku liji liami nikufunga usendo wami, mba kumunukapwa kuli yami upite wami wa kutongola hakachi ka mavungu eswe, mumu hashi heswe ha mbala ha yami.

⁶ Kumunukapwa kuli yami munyachi wa asasendote, vungu lisandu. Wano maliji muwambulula kuli A-Izalele.

⁷ Mose yaya, yatambika makulwana ja atu, yatambika kumeso jo maliji aze eswe Yehova wamwambile.

⁸ Atu eswe yakumbulula hamuwika ngwo, Yuma yeswe hamba Yehova, kumutukalinga. Mose yambulwila Yehova maliji a e atu.

⁹ Yehova yamba kuli Mose ngwenyi, Mungwiza kuli yena mu lelwa lilá hanga e atu evwe muze munguhanjika ni yena, akakufuliele nawa ndo ku miaka ya mutolo. Mose yambulwila Yehova maliji a e atu.

¹⁰ Yehova yamba kuli Mose ngwenyi, Yako kuli atu, wasele ku usandu ni musono ni hamene. Akakose mazalo jo.

¹¹ Akalilulike tangwa liamuchitatu mumu ha tangwa liamuchitatu Yehova makahulumuka ndo ha mulundu wa Sinai kumeso ja atu eswe.

¹² Ukasele atu njiza ya kujingilika. Amba ngwe, Nukanyame. Kanda nukanduka ha mulundu chipwe kukwata ku njiza yawo, ka. Mweswawo makwata ku mulundu akamushihe lume.

¹³ Kwoko nilimwe kanda likasungako, alioze akamwase mawe lume, hanji mwivu, chipwe kashitu chipwe mutu. Kanda atwama ni mwono. Muze memba chitavwi, embye-e o akakundame ku mulundu.

¹⁴ Mba Mose yapalumuka ku mulundu; yaheta kuli e atu. Yasela atu ku usandu. O yakosa mazalo jo.

¹⁵ Iye yamba kuli e atu ngwenyi, Lilulikenu tangwa liamuchitatu. Kanda nukundama kuli mapwo.

¹⁶ Mba ha tangwa liamuchitatu muze te hikwacha kwapwile kukulunguza ni mihenyo ni lelwa lilá ha mulundu, ni liji lia tachi lia chitavwi. Atu eswe mu chilombo yachikima.

¹⁷ Mose yatuhwisa atu ku chilombo akatakane ni Zambi. O yamana ku kulwa mulundu.

¹⁸ Mulundu weswe wa Sinai te unatuhwisa mwishi mumu Yehova te hahulumukinaho mu kahia. Mwishi wawo yiwanduka ngwe mwishi wa ku lutengo. Mulundu weswe yiunyika chikolo.

¹⁹ Mba lie liji lia chitavwi te linayi ni kuhiohia ni tachi. Mose yahanjika, mba Zambi yamukumbulula ni liji.

²⁰ Yehova yahulumuka ndo ha mulundu wa Sinai, e ndo ha mbulwa mulundu. Yehova yatambika Mose eze ha mbulwa mulundu. Mose yakanduka.

²¹ Yehova yamba kuli Mose ngwenyi, Palumuka, uhane koki kuli atu kuchina mazomboka njiza ndo kuli Yehova mukumutala, mba anji a kuli ayo mafwa.

²² Asasendote nawa akukundama kuli Yehova akalisele ku usandu, kuchina Yehova mapula haze nikwaheta.

²³ Mose yamba kuli Yehova ngwenyi, E atu kahashile kukundama ku mulundu wa Sinai, mumu yena unakatwaha koki ngwe, Ukasele atu njiza ya kujingilika mulundu, ukausele ku usandu.

²⁴ Yehova yamba kuli iye ngwenyi, Yako, upalumuke mba ukakanduke ni yena ni Arone hamwe ni yena. Alioze asasendote ni e atu kanda akazomboka njiza mukukanduka ndo kuli Yehova kuchina iye makapula haze nikwaheta.

²⁵ Chocho yapalumuka Mose kuli atu. Yaambulwila.