Kutuhuka 18 - MUKANDA USANDU WA ZAMBI 1975

¹ Yetoru, sasendote ya A-Mindiane, tato-weno ya Mose yevwa yuma yeswe Zambi halingila Mose ni A-Izalele atu jenyi, ngwe Yehova hanachiza A-Izalele ku Engitu.

² Yetoru, tato-weno ya Mose, watambwile Zepora, pwo lia Mose, mumu Mose te hamuhilwisa,

³ ni ana jenyi aali a malunga. Mukwo jina lienyi Ngeshome mumu ambile ngwenyi, Ami kunapwa njize mu chifuchi cha mbala.

⁴ Ni jina lia mukwo Elieza mumu ngwenyi, Zambi ya tata, iye hapwa chikwashi chami. Iye yangupuiula ku katana ka Falau.

⁵ Yetoru, tato-weno ya Mose wayile Kuli Mose hamwe ni ana jenyi a malunga ni pwo lienyi, ndo ku puya kuze apwile mu chilombo, ku mulundu wa Zambi.

⁶ Iye yamba kuli Mose ngwenyi, Yami Yetoru, tatenu-weno, nguneza kuli yena ni mukwenu-pwo ni ana jenyi aali a malunga hamwe nenyi.

⁷ Mose yatuhuka akapatwize tato-weno, yafukama kuli iye, nikumumeneka. O alihulile mujimbu. Mba yanjila mu mbalaka.

⁸ Mose wambulwilile tato-weno yeswe alingile Yehova kuli Falau ni A-Engitu mumu hali A-Izalele, ni lamba lieswe liaawanyine mu jila ni chize Yehova waapulwile.

⁹ Yetoru yawahilila mumu ha utu weswe alingile Yehova kuli A-Izalele, mumu iye te haapulula ku moko ja A-Engitu.

¹⁰ Yetoru yamba ngwenyi, Yehova afumane yoze wanupulwile ku kwoko lia A-Engitu ni ku kwoko lia Falau, yoze wapulwile e atu kushi lia kwoko lia A-Engitu.

¹¹ Haliapwila kungunanyingika ngwami, Yehova iye Wahiana tuzambi tweswe chipwe mu chuma chize alengumukine nacho.

¹² Mba Yetoru, tato-weno ya Mose walambwile mulambu wa kulumba kuli Zambi hamwe ni yitapo. Arone yeza ni makulwana eswe a A-Izalele hamwe ni mwe tato-weno ya Mose mukulia mbolo kumeso ja Zambi.

¹³ Chocho muze hikwacha, Mose Watwamine mukupatwila atu. E atu te kanamana kumeso ja Mose chize ku chimene ndo ku chingoloshi.

¹⁴ Muze tato-weno ya Mose amwene yeswe alingile kuli e atu, yamba ngwenyi, Acho unalingi ni atu chika? Kuchi te unatwama ukawe, atu eswe kanamana kumeso je chize ku chimene ndo ku chingoloshi?

¹⁵ Mose yamba kuli tato-weno ngwenyi, Mumu te e atu kaneza kuli yami mukuhula kuli Zambi.

¹⁶ Muze o mapwa ni chuma meza kuli yami mba yami mungupatwila mutu ni mwenyembo wenyi. Nakwanyingikisa yiyulo ya Zambi ni shimbi jenyi.

¹⁷ Tato-weno ya Mose yamba kuli iye ngwenyi, Chuma chino unalingi kuchapemene.

¹⁸ Kumujikuhwa wate ni yena ni atu wano ali hamwe ni yena. Che chuma chakulemena naye. Kuwahashile kuchilinga yena mwene ukawe.

¹⁹ Hatakana haliapwila ku liji liami. Mungukwaha mana; Zambi akapwe hamwe ni yena. Ukapwe yena hali atu kumeso ja Zambi. Uhetese ye yuma kuli Zambi.

²⁰ Ukaalongese ye yiyulo ni je shimbi, ukaalweze jila o chaatamba kwendamo, ni milimo o chaatamba kulinga.

²¹ Chikwo nawa ukalitalile malunga yitakame a kuli atu, a kuvwila woma Zambi, malunga amwenemwene, a kuvwila lwaji chipululu. Ukaapwise miata jo; akapwe akwa kuyula tununu twa atu, akwa kuyula makulakaji, akwa kuyula makumi atano, akwa kuyula kumi lia atu.

²² O akapatule matangwa eswe mba makunehena yuma yeswe yikalu, alioze yuma yeswe yashi ene akayipatule, chocho makalelumuna chiteli hali yena. Kumakalitwikacho hamwe ni yena.

²³ Kachi yena mulinga chino chuma, nyi Zambi makwambacho, kachi muhasa kujikiza, ni wano atu eswe kumakaya kuma kwo ni kuhwima cha mbunge.

²⁴ Chocho ahalakanyine Mose ku liji lia tato-weno. Yalinga yize yeswe ambile.

²⁵ Mose wasakwile malunga yitakame a kuli A-Izalele eswe. Yaapwisa miata ja atu, akwa kuyula tununu, akwa kuyula makulakaji, akwa kuyula makumi atano, akwa kuyula kumi.

²⁶ O apatwilile atu matangwa eswe. Yuma yikalu yatwala kuli Mose, yuma yeswe yashi, ene ayipatwile.

²⁷ Mose washikile tato-weno, akaye, chocho yaya kwenyi ku chifuchi chenyi mwene.