Kutuhuka 17 - MUKANDA USANDU WA ZAMBI 1975

¹ Chikungulwila cheswe cha A-Izalele ayile wenyi wo, chize ku puya ya Shini, chilombo ha chilombo nikulita ni liji lia shimbi ya Yehova, ndo yatunga chilombo cho ku Refwindimi. Kukwapwileko meya a kunwa niamwe.

² Kashika e atu alitachikile ni Mose ngwo, Twehe meya tunwe. Mose yamba kuli ayo ngwenyi, Yika te nunalitachika ni yami? Kuchi te nuneseka Yehova?

³ Kwe kuze atu evwile pwila ya meya. E atu yalinyenyeta ni Mose ngwo, Kuchi te watuchijile ku Engitu? Mukutushiha ni pwila, ni ana jetu ni yimuna jetu nyi?

⁴ Mose watetele kuli Yehova ngwenyi, Ngulinge kuchi ni wano atu? Anambe kungwasa mawe.

⁵ Yehova yamba kuli Mose ngwenyi, Palika yena kulutwe lia atu, utwale makulwana amwe A-Izalele hamwe ni yena, ukwate nawa mu kwoko lie mulumbu we walambile nawo lwiji, ukaye.

⁶ Yami mungumana kumeso je, ha liwe lize lili ku Horepe. Lamba lie liwe mba meya mapukukamo, hanga atu akanwe. Chocho alingile Mose kumeso ja makulwana A-Izalele.

⁷ Yaluka kuma kuze jina ngwenyi, Masa kanda Meripa, mumu ha kulitachika cha A-Izalele, mumu o yeseka Yehova ha kwamba ngwo, Shina Yehova kwali hakachi ketu nyi shina ka?

⁸ Henaho ahetele A-Amaleke. Yasa jita ni A-Izalele mu Refwindimi.

⁹ Mose yamba kuli Yoshua ngwenyi, Tongola malunga, nukaye, nukase jita ni A-Amaleke. Hamene mungukamana ha mbulwa mulundu nikukwata mulumbu wa Zambi mu kwoko liami.

¹⁰ Chocho alingile Yoshua ngwe amwambile Mose. Yasa jita ni A-Amaleke, mba ni Mose ni Arone ni Hure yakanduka ndo ha mbulwa mulundu.

¹¹ Mba chapwile muze Mose azundwile kwoko lienyi, A-Izalele yakangana, mba muze iye azeyesele kwoko lienyi A-Amaleke yakangana.

¹² Alioze moko ja Mose halema, o yanda liwe, yalisa mushi lienyi mba iye watwamineho. Arone ni Hure akundwijile moko jenyi, mukwo ku lumbu limwe, ni mukwo ku lumbu likwo. Chocho moko jenyi ajikijile ndo tangwa hilianjila.

¹³ Chocho Yoshua yashiha tachi ja A-Amaleke ni ja atu jenyi ni lutwilo wa katana.

¹⁴ Yehova yamba kuli Mose ngwenyi, Soneka chino mu mukanda hanga chikapwe Chiwulwiso, uchitange kuli Yoshua, mumu kumungukajimuna jimu A-Amaleke; kechi kwaewuluka nawa hashi.

¹⁵ Mose wafungile chilumbilo, yachiluka jina ngwenyi, Yehova-Nissi.

¹⁶ Ngwenyi, Yehova walishinga ni shingo, Yehova kumakása jita ni A-Amaleke chize ku chisemuko chimwe ndo ku chisemuko chikwo.