Kutuhuka 15 - MUKANDA USANDU WA ZAMBI 1975

¹ Hohene Mose ni A-Izalele embilile Yehova mwaso uno. Yamba ngwo, Mungwimbila Yehova mwaso, mumu iye hanangama kuhiana. Tuvwalu ni akwa kwaendesa yaanyasa mu kalunga-lwiji.

² Yehova iye tachi jami ni mwaso wami. Iye hanapu ulamwino wami. Yono mwe Zambi yami. Kumungumuhalisa yono Zambi ya tata. Kumungumunangamisa.

³ Yehova iye Kajita. Jina lienyi, iye Yehova.

⁴ Matemba a Falau ni chendo chenyi, yaambila mu Kalunga-lwiji Muchila. Tupitau twenyi waze akusakula kanashimbama mu Kalunga-lwiji Muchila.

⁵ Majinga a meya kanaafuku. O yashimbama, ngwe liwe ndo ha mashima.

⁶ Yehova, kwoko lie lia chindume kuliapwa lilemu ni tachi. Yehova, kwoko lie lia chindume hiliawonda mukwa kole.

⁷ Mba ni unene we wa kuhiana kuwakupupa waze makukatukila. Kuwakutuma utenu we, wene wakwamanuna ngwe shachi jumu.

⁸ Ni mwiku wa ku mazulu je wamikanga e meya, masanga a meya yachindama ngwe mulumba. Majinga yakonda, mwe muchima lia kalunga-lwiji.

⁹ Mukwa kole yamba ngwenyi, Mungukaula, kumungwawana, kumungupangila yikumba yo. Mbunge yami muyiyuka nikwapupa. Mungutomona katana kami. Kwoko liami muliamanuna.

¹⁰ Ena wafuzanga ni fuji ye. Kalunga-lwiji yaafuka. O yashimbama ngwe chikungo mu meya a tachi.

¹¹ Yehova—hakachi ka tuzambi walita ni yena iya? Walita ni yena iya? Mulemu ni musandu—yena. Ha kukuhalisa, kole ni woma yena. Kuwakulinga yikomokeso.

¹² Yena wazundulanga kwoko lie lia chindume. Hashi yihaamina.

¹³ Yena ni utu wa zango lie watwalile atu aze waakulile. Yena ni tachi je waasongwelele ndo kuze kwatwama usandu we.

¹⁴ Mavungu hachivwa, hanachikima. Yikola hiyakwata waze akutwama ku Filistea.

¹⁵ Hohene miata ja A-Endome alishimwokene. Akwa ndundo ja A-Moape kuchikima hichaakwata. Eswe akutwama ku Kanana hanasangunuka.

¹⁶ Woma ni mwongo hiyaaholokela. Ku unene wa kwoko lie kanaholo kúlú ngwe liwe ndo te atu ja yena Yehova mazauka; ndo te e atu mazauka, waze yena unapichi.

¹⁷ Kumukaahetesa nikwatumbila ku mulundu wa chihinga che, kuma kuze hiwapwisa kwa yena Yehova kwa kutwamako. Zuwo lisandu yena Mwene hiunalulika ni moko je.

¹⁸ Yehova kumakayula ndo ku miaka yeswe ya mutolo.

¹⁹ Mumu tuvwalu twa Falau anjilile mu kalunga-lwiji hamwe ni matemba jenyi ni akwa tuvwalu twenyi, mba Yehova yahilwisa meya a mu kalunga-lwiji hali ayo, alioze A-Izalele endele hashi homu mukachi ka kalunga-lwiji.

²⁰ Profeta wa pwo Miriame, ndumbu ya Arone, wakwachile kamukupiela mu kwoko lienyi mba mapwo eswe yatuhuka hamwe nenyi ni tumikupiela nikuhangana.

²¹ Miriame waakuwilile ngwenyi, Embilenu Yehova mwaso mumu iye hanangama kuhiana. Ni tuvwalu ni akwa kwaendesa yaanyasa mu kalunga-lwiji.

²² Mose watwalile A-Izalele chize ku Kalunga-lwiji Muchila, yanjila mu puya ya Shure. Yaya wenyi wa matangwa atatu mu puya. Kawanyinemo meya niamwe.

²³ Muze ahetele ku Mara kahashile kunwa meya a mu Mara, mumu te kusaso. Kashika yalukako jina ngwo, Mara.

²⁴ E atu alinyenyetene ni Mose ngwo, Yika mutunwa?

²⁵ Iye watetele kuli Yehova, mba Yehova yamulweza mutondo, yaumbila mu meya, meya yalumuka ayema. Kuze kwene akolesele hali ayo chiyulo ni liji lia shimbi. Kuze kwene nawa iye yaeseka.

²⁶ Yamba ngwenyi, Kachi yenu munuhalakana pundu ku liji lia Yehova Zambi yenu, nikulinga chize chinate ku meso jenyi, nikupanjika ku maliji jenyi a shimbi, nikufunga yiyulo yenyi yeswe, kachi chichi kusa hali yenu kuyiza nichimwe nasele hali A-Engitu, mumu Yami Yehova, mukwa kunuwuka.

²⁷ O ahetele ku Elime kuze kwapwile mafuji a meya kumi ni aali, ni makumi shimbiali a mingaji. Kwenako yatunga chilombo cho ku kulwa meya aze.