Kutuhuka 14 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Amba A-Izalele ahiluke kunyima, ajike mbalaka jo kulutwe lia Paihahiro, hakachi ka Mingondole ni kalunga-lwiji, kulutwe lia Mbale-Zefwone ku sesa lia kalunga-lwiji, hatalanganyi ni kuze nukajike mbalaka jenu.

³ Ha kutwala kuli A-Izalele Falau mamba ngwenyi, O hanalilimbalimba mu chifuchi. Puya hiyaaseleka.

⁴ Yami mungukalisa mbunge ya Falau. Iye kumakaakaula. Mungukazuka ulemu kuli Falau ni ku yizavu yenyi yeswe. A-Engitu eswe kumakanyingika ngwo, Mwe Yehova. Chocho alingile.

⁵ Ambulwilile mwanangana wa Engitu ngwo, Atu hachina. Mba mbunge ya Falau ni mbunge ja ngamba jenyi jalumukine kulimika ni e atu. Yamba ngwo, Yika te twalinga chuma chino? Yika te twecha A-Izalele kuya, alitwamine kutulingila?

⁶ Iye yalongeza matemba jenyi a jita, yatwala atu jenyi hamwe nenyi.

⁷ Yatwala makulakaji asambano a matemba a kutongola ni matemba eswe a mu Engitu ni tupitau two eswe.

⁸ Yehova wakalishile mbunge ya Falau, mwanangana wa Engitu, chocho yakaula A-Izalele mumu te A-Izalele yakatuka ni kwoko lia hamu.

⁹ A-Engitu aakawile ni tuvwalu eswe, ni matemba eswe a Falau, ni akwa tuvwalu twenyi, ni tujita twenyi, yaawana ku chipombelo cho ku sesa lia kalunga-lwiji, ku kulwa Paihahiro kulutwe lia Mbale-Zefwone.

¹⁰ Muze Falau akundamine A-Izalele yahetula meso jo, kumanyi A-Engitu te kaneza kuli ayo. A-Izalele woma wunji evwile. Yateta kuli Yehova.

¹¹ O ambile kuli Mose ngwo, Te ku Engitu mafuka keshiko nyi, kashika hiwatuchiza, tukafwile muno mu puya? Kuchi te watulinga chize, ha kutuchiza ku Engitu?

¹² Te kutwahanjikile kuli yena mu Engitu liji lino liene, ngwetu, Tweche, tukalingile A-Engitu? Shinaho tukalingile A-Engitu, kufwila muno mu puya chipi.

¹³ Mba Mose yamba kuli e atu ngwenyi, Kanda nwivwa woma, manenu, numone ulamwino wa Yehova, manulingilawo musono. Mumu A-Engitu nwamona musono, kunuchi kwiza kwamona nawa nilimwe tangwa.

¹⁴ Yehova kumakanwashila jita. Enu munukahola kwenu.

¹⁵ Yehova yamba kuli Mose ngwenyi, Kuchi te unatete kuli yami? Amba A-Izalele, asenye kulutwe.

¹⁶ Zundula mulumbu we nikwolola kwoko lie ha kalunga-lwiji, umupule hakachi mba A-Izalele mazauka hashi homu mukachi ka meya.

¹⁷ Yami mwene mungukalisa mbunge ja A-Engitu. Kumakaakaulamo mba yami mungukazuka ulemu ha kukumba Falau ni yizavu yenyi yeswe, ni matemba jenyi, ni akwa tuvwalu twenyi.

¹⁸ A-Engitu kumakanyingika ngwo, Mwe Yehova, muze hinazuka ulemu ha kukumba Falau ni matemba jenyi, ni akwa tuvwalu twenyi.

¹⁹ Mungelo wa Zambi yoze watetekelele chendo cha A-Izalele yatutuluka, yaya kunyima lio mba lie nguji lia lelwa yilikatuka kulutwe lio, yilimana kunyima lio.

²⁰ Yiliya mukachi ka chendo cha A-Engitu ni chendo cha A-Izalele. Kwapwile lelwa ni milima, hindu liatemwine ha ufuku. Chocho ufuku weswe kalikundamine.

²¹ Mose yolola kwoko lienyi ha kalunga-lwiji mba ufuku weswe Yehova yasosolola kalunga-lwiji ni fuji ya tachi ya ku Chivumbuko; yalumuna kalunga-lwiji hashi homu. Meya yahandunuka.

²² A-Izalele yanjila mukachi ka kalunga-lwiji nikwenda hashi homu. E meya yapwa ngwe chipanga kuli ayo ni ku chindume cho ni ku chimeso cho.

²³ A-Engitu aakawile, yakaula kunyima lio mukachi ka kalunga-lwiji, tuvwalu eswe a Falau, ni matemba jenyi, ni akwa tuvwalu twenyi.

²⁴ Kumanyi haze ha kufulafula ni kucha—ku nguji lia kahia ni ku nguji lia lelwa Yehova watalile ku chizavu cheswe cha A-Engitu. Iye yatalisa chendo cheswe cha A-Engitu.

²⁵ Iye yasokola maroda ja matemba jo chocho chapwile chikalu kwaendesa. A-Engitu ambile ngwo, Tuchinenu kumeso ja A-Izalele mumu Yehova kanaashila jita ni A-Engitu.

²⁶ Yehova yamba kuli Mose ngwenyi, Olola kwoko lie ha kalunga-lwiji, hanga meya azemukine A-Engitu ni matemba jo ni akwa tuvwalu two.

²⁷ Mose yolola kwoko lienyi ha kalunga-lwiji mba muze hikwacha kalunga-lwiji yatakana ni tachi jenyi. A-Engitu yamuchina alioze Yehova yakumba A-Engitu mukachi ka kalunga-lwiji.

²⁸ Meya ahilukile, yafuka e matemba ni e akwa tuvwalu, te chendo cheswe cha Falau waze aakawile mu kalunga-lwiji. Kukwasalile chipwe umuwika wa ayo, ka.

²⁹ Alioze A-Izalele endele hashi homu mukachi ka kalunga-lwiji. E meya yapwa ngwe chipanga kuli ayo ni ku chindume cho ni ku chimeso cho.

³⁰ Chocho tangwa lize Yehova walamwinyine A-Izalele ku kwoko lia A-Engitu. A-Izalele yamona A-Engitu a ufwe ha ngenge ya kalunga-lwiji.

³¹ A-Izalele amwene chitanga cha tachi alingile Yehova kuli A-Engitu. E atu yavwila woma Yehova. Yafuliela muli Yehova ni muli Mose kavumbi kenyi.