Kutuhuka 13 - MUKANDA USANDU WA ZAMBI 1975

¹ Yehova yamba kuli Mose ngwenyi,

² Nungusele ku usandu tupula-majimo eswe hakachi ka A-Izalele, atangu kusemuka kuli atu ni kuli yimuna; ni nyami.

³ Mose yamba kuli atu ngwenyi, Iwulukenu lino tangwa muze nwakatukile ku Engitu, ewa ku zuwo lia upinji, mumu Yehova yanuchiza ku chihela chize ku tachi ja kwoko lienyi. Kanda nukalia mbolo niyimwe ya futunwiso.

⁴ Nunakatuka musono ha kakweji wa Ambimbi.

⁵ Chikapwe muze Yehova makanuhetesa ku chifuchi cha A-Kanana, ni cha A-Hete, ni cha A-Amore, ni cha A-Hevwe, ni cha A-Yepushe, che chize alishingile kuli tulamba twenu mukunwaha, chifuchi kuze kunokela yamwa ni wuchi, ngwami, Ha kakweji yono mwene nukalinge uvumbiko uno.

⁶ Munukalia mbolo kuyishi futunwiso ha matangwa shimbiali mba ha tangwa liamuchishimbiali hakapwe chiwanyino hali Yehova.

⁷ Munukalia mbolo kuyishi futunwiso ndusu e matangwa shimbiali. Kanda awana kuli yenu mbolo niyimwe ya futunwiso chipwe kuwana futunwiso yimwe kuli yenu, ku mazuwo jenu eswe, ka.

⁸ Ukambulwile mwané wa lunga ha tangwa lize ngwe, Te mumu ha chize angulingilile Yehova muze nakatukile ku Engitu.

⁹ Chikapwe chilayi kuli yenu ha moko jenu ni Chiwulwiso mukachi ka meso jenu, hanga shimbi ya Yehova yikapwe mu makanwa jenu, mumu Yehova hananuchiza ku Engitu ni kwoko lia tachi.

¹⁰ Kashika nukafunge shimbi yino ha kakweji kayo mwaka ha mwaka.

¹¹ Mba muze Yehova makanuhetesa ku chifuchi cha A-Kanana chize alakenyene ni shingo kuli yenu ni kuli tulamba twenu akanwehecho,

¹² nukasele kuli Yehova waze eswe atangu kusemuka ni tupula-majimo eswe a kuli yimuna. Malunga ni kuji eswe akapwe a mbala a Yehova.

¹³ Kapula-jimo wa chimbulu mweswe nukamukule ni mwanapanga, alioze nyi kunuchi kamukula nukamumakune kota. Ni tupula-majimo eswe hakachi ka ana jenu, nukaakule.

¹⁴ Muze manuhula kuli ana jenu kulutwe ngwo, Acho chika? Nukaambulwile ngwenu, Ni kwoko lia tachi, Yehova watuchijile ku Engitu ku zuwo lia upinji.

¹⁵ Mba muze Falau kasolo kututusula Yehova washihile tupula-majimo eswe a mu chifuchi cha Engitu, ni tupula-majimo a atu, ni tupula-majimo a yimuna. Kashika twakulambula kuli Yehova kuji eswe tupula-majimo, alioze tupula-majimo eswe a ana jetu a malunga twakwakula.

¹⁶ Chikapwe chilayi ha moko jenu ni cha kukashila hakachi ka meso jenu, mumu Yehova watuchijile ku Engitu ni kwoko lia tachi.

¹⁷ Muze Falau echele atu kuya, Zambi te kaatwalile ku jila ya kupalikila ku chifuchi cha A-Filistea chipwe kwapwile kwihi; mumu Zambi ngwenyi, Kuchina hanji e atu makalikonyeka muze makamona jita mba makahiluka ku Engitu.

¹⁸ Alioze Zambi yajingisa e atu ku jila ya puya, ya kupalikila ku Kalunga-lwiji Muchila. A-Izalele nikwenda mu mikana akatukile ku chifuchi cha Engitu.

¹⁹ Mose yatwala hamwe nenyi yifwaha ya José mumu José te ashingishile A-Izalele ni shingo ngwenyi, Pundu, Zambi kumeza kunutala, nukambateko yifwaha yami hamwe ni yenu.

²⁰ O ayile wenyi wo chize ku Sukote ndo yajika mbalaka jo ku Etame kuze kwaputuka puya.

²¹ Yehova waatelekelele ha mwalwa mu nguji lia lelwa, akaatwale mu jila, mba ha ufuku mu nguji lia kahia akaatemwine, hanga akahase kwenda ha mwalwa ni ha ufuku.

²² Ni nguji lia lelwa ha mwalwa ni nguji lia kahia ha ufuku kuliakatukile kumeso ja atu, ka.