Kutuhuka 12 - MUKANDA USANDU WA ZAMBI 1975

¹ Yehova yamba kuli Mose ni Arone mu chifuchi cha Engitu ngwenyi,

² Kakweji yono makapwa kakweji wa kuputuka kuli yenu. Makapwa mutangu wa mwaka kuli yenu.

³ Hanjikenu ni chikungulwila cheswe cha A-Izalele ngwenu, Ha tangwa liamuchikumi lia kakweji yono lunga mweswe akalianjile mwana-panga, jiko lieswe mwana-panga, nikulita ni majiko ja atato.

⁴ Nyi akwa jiko limwe mapwa akepe naye ha mwana-panga mba iye ni mwenyembo wenyi yoze walihata ni zuwo lienyi akatambule umwe nikulita ni kwalula cha atu jo, nukeseke ha mwana-panga nikulita ni chize mutu ha mutu malia.

⁵ Mwana-panga wenu akapwe keshi chipa, musamba wa kuji, nukamuchize ku mapanga chipwe ku pembe.

⁶ Nukamukuchike ndo tangwa kumi ni liamuchiwana lia kakweji yoze mwene, mba chikungulwila cheswe cha A-Izalele akamushihe ha chingoloshi.

⁷ O akachize amwe manyinga, akaasapwile ha yipamba ya yikolo ku mazuwo muze makamulila, ni ha chikuli cha helu.

⁸ Ufuku uze akalie ye yifwo ya kwocha ni kahia hamwe ni mbolo kuyishi futunwiso. Akayilie hamwe ni yilimalima yisasu.

⁹ Kanda nuyilia ya wisu, chipwe ya kuteleka mu meya, ka, shina ya kwocha ni kahia, ni mutwe wenyi ni yilio yenyi ni yingambiangambia yenyi ya muchima.

¹⁰ Kanda nuhichika yifwo niyimwe ndo mu kucha, alioze yize muyilisalaho ndo mu kucha nukayimbile mu kahia.

¹¹ Chocho nukamulie, miya yenu ya kulijichika mu zalilo, nikuzala haku jenu, nikukwata milumbu yenu mu moko jenu, nukamulie ni kapupushi. Che Chizomboka cha Yehova.

¹² Mumu te ha ufuku mungupalika ndusu chifuchi cha Engitu, mungulamba e tupula-majimo eswe mu chifuchi cha Engitu, ni kuli atu, ni kuli tushitu. Mungupatwila tuzambi tweswe twa Engitu. Yami Yehova.

¹³ Mumu e manyinga kumakapwa chilayi kuli yenu ku mazuwo kuze nuli. Muze mungukamona e manyinga mungukanuzomboka, mba kukuchi kapwa kuli yenu chilungo nichimwe cha kunwenyeka muze mungukalamba chifuchi cha Engitu.

¹⁴ Lino tangwa likapwe kuli yenu Chiwulwiso, lia kufunga chiwanyino cha Yehova. Ndusu yisemuko yenu munufunga chiwanyino chikapwe shimbi ya mutolo.

¹⁵ Ha matangwa shimbiali munukalia mbolo kuyishi futunwiso. Ha tangwa lia kuputuka chizenu futunwiso ku mazuwo jenu. Mumu mweswawo malia mbolo ya futunwiso chize ku tangwa lia kuputuka ndo ku tangwa liamuchishimbiali, akamutete hakachi ka Izalele.

¹⁶ Ha tangwa lia kuputuka hakapwe kulikungulula chisandu ni ha tangwa liamuchishimbiali kukungulula chisandu nawa. Kanda nukalingaho milimo niyeyimwe, shina chize malia mutu mweswe. Chize wika nukalinge.

¹⁷ Nukafunge chiwanyino cha mbolo kuyishi futunwiso mumu te ha tangwa lioliene hinachiza yizavu yenu ku chifuchi cha Engitu, kashika nukafunge lino tangwa ni shimbi ya mutolo ndusu yisemuko yenu.

¹⁸ Ha kakweji mutangu ha tangwa kumi ni liamuchiwana ha chingoloshi nukalie mbolo kuyishi futunwiso ndo ku chingoloshi cha tangwa makumi aali ni litangu lia mwe kakweji.

¹⁹ Ha matangwa shimbiali kanda awana mu mazuwo jenu futunwiso niyimwe, mumu te mweswawo malia ya futunwiso, akamutete hakachi ka chikungulwila cha Izalele, apwe njize, apwe mukwa chifuchi.

²⁰ Kanda nukalia nichimwe cha futunwiso. Munukalia mbolo kuyishi futunwiso mu mazuwo jenu eswe.

²¹ Mba Mose yasanyika makulwana eswe a kuli A-Izalele yamba kuli ayo ngwenyi, Sakulenu misamba jenu nikulita ni majiko jenu, nukashihe chitapo cha Chizomboka.

²² Nukande chisapo cha hisope, nukachichupike mu manyinga ali mu mbasia, nukasapwile e manyinga ali mu mbasia ha chikuli ni ha yipamba yiali ya ku yikolo. Mba mutu niumwe wa kuli yenu kanda akatuhuka ku chikolo cha zuwo lienyi ndo mu kucha.

²³ Mumu Yehova makapalika ndusu mukulamba A-Engitu. Muze makamona e manyinga ha chikuli ni ha yipamba yiali ya ku chikolo, Yehova kumakazomboka che chikolo. Iye kechi katayiza chonwonyi kunjila mu mazuwo jenu akanulambe.

²⁴ Nukafunge chino chuma; chikapwe shimbi kuli yenu ni kuli ana jenu ndo ku miaka ya mutolo.

²⁵ Mba kumuchikapwa muze hinwaheta ku chifuchi chize Yehova makanwaha ngwe iye hanalakenya, nukalinge uvumbiko uno.

²⁶ Muze ana jenu makamba kuli yenu ngwo, Uvumbiko uno kuchi unalumbunuka?

²⁷ Nukambe ngwenu, Chino che chitapo cha Chizomboka cha Yehova mumu te iye yazomboka mazuwo ja A-Izalele mu chifuchi cha Engitu muze alambile A-Engitu, yapulula atu jetu. E atu yahetamisa mitwe, yawayila.

²⁸ A-Izalele yaya, yalinga chocho, chizechene ngwe Yehova hatuma Mose ni Arone, chocho alingile.

²⁹ Mba ha muchima ufuku Yehova yalamba tupula-majimo eswe a mu chifuchi cha Engitu, chize kuli kapula-jimo wa Falau watwama ha ngunja yenyi ndo kuli kapula-jimo wa funge uli mu zuwo lia ususu, ni tupula-majimo a yimuna nawa.

³⁰ Ha ufuku akatukile Falau, ni ngamba jenyi eswe, ni A-Engitu eswe. Mwapwile muteto unene mu Engitu mumu kukwapwile zuwo nilimwe kulishi mufu, ka.

³¹ Iye yatambika Mose ni Arone ha ufuku, ngwenyi, Katukenu, ni yenu ni A-Izalele, nutuhuke hakachi ka atu jami. Yénu, nukalingile Yehova ngwe hinwamba.

³² Twalenu ni yimuna jenu ni ngombe jenu, ngwe hinwamba. Yénu, nunguwahise yami nawa.

³³ A-Engitu ashinjilile e atu. Yaapupwisa kukatuka ku chifuchi mumu ambile ngwo. Yetu eswe kutwafwa.

³⁴ E atu atwalile wunga wo wa mbolo shimbu kanda ufutunuka; mboke jo ja kuchikilamo te hajikasa ni mahina jo ha yipaya yo.

³⁵ A-Izalele alingile nikulita ni liji lia Mose. Yeta kuli A-Engitu upite wa prata ni upite wa oru ni mazalo.

³⁶ E atu apemenene A-Engitu ni vumbi kuli Yehova; A-Engitu chocho yaaha yize aechile. O yapupa A-Engitu.

³⁷ A-Izalele yaya wenyi wo nikwenda hashi chize ku Ramese ndo ku Sukote. Kafwa te apwile ngwe makulakaji asambano a tununu a malunga, mba kuwezaho ana nawa.

³⁸ Mbunga ya kulichinga yakanduka nawa hamwe no ni yimuna ni ngombe, te yimuna anji chikolo.

³⁹ O yocha tumbolo kutushi futunwiso twa ku wunga uze akatukile nawo ku Engitu, mumu te kuushi futunwiso mumu yaahuma ku Engitu, te kahashile kulaluka chipwe kulilulikila kulia, ka.

⁴⁰ Miaka yize A-Izalele atwamine ku Engitu yapwile makulakaji awana a miaka ni makumi atatu a miaka.

⁴¹ Mba ha kuhwa makulakaji awana a miaka ni makumi atatu a miaka, ha tangwa lize liene yizavu yeswe ya Yehova yakatuka ku chifuchi cha Engitu.

⁴² Ufuku uze ufuku wa kufunga kumeso ja Yehova chinji ha kwakatwisa ku chifuchi cha Engitu. Awo ufuku wa Yehova akaufunge chikolo kuli A-Izalele eswe ndusu yisemuko yeswe.

⁴³ Yehova yamba kuli Mose ni Arone ngwenyi, Yino ye shimbi ya Chizomboka, ngwami, Kandaka niumwe kanda akaliaho.

⁴⁴ Alioze ngamba wa mutu mweswe wa kulanda ni mbongo, muze te hinwamupwisa ngalami, maliaho.

⁴⁵ Ngeji ni mukwa milimo wa kufweta kanda akaliaho.

⁴⁶ Nukachilile ku zuwo limuwika. Kanda nukambata haze lia lie zuwo yifwo yacho niyimwe, chipwe kanda nukamakuna chifwaha chacho nichimwe.

⁴⁷ Eswe akwa chikungulwila a A-Izalele akachilinge.

⁴⁸ Muze njize matwama ni yenu, nyi mazanga kufunga che Chizomboka cha Yehova, malunga jenyi eswe akaapwise ngalami, mba akakundame akachifunge. Mba o kumakapwa ngwe akwa chifuchi. Alioze chilima niumwe kanda akaliaho.

⁴⁹ Shimbi yimuwika yikapwe hali mukwa chifuchi ni hali njize watwama hakachi kenu.

⁵⁰ Chocho chialingile A-Izalele eswe ngwe Yehova hatuma Mose ni Arone, chocho alingile.

⁵¹ Mba ha tangwa lize liene Yehova yachiza A-Izalele ku chifuchi cha Engitu nikulita ni yizavu yo.