Kutuhuka 11 - MUKANDA USANDU WA ZAMBI 1975

¹ Yehova yamba kuli Mose ngwenyi, Kwasala hindu chilungo chimuwika mungukatuma hali Falau ni hali A-Engitu, mba kulutwe iye kumakanwecha nukatuke ku chifuchi. Muze makanwecha kuya pundu, kumakanuhumamo liakulu.

² Uhanjike haliapwila ku matwi ja atu, lunga mweswe akete upite wa prata ni wa oru kuli yoze walihata nenyi, ni pwo mweswe nawa akete kuli yoze walihata nenyi.

³ E atu apemenene A-Engitu ni vumbi kuli Yehova. Chikwo nawa, mwe lunga Mose yapwa mutu munene chikolo mu chifuchi cha Engitu ni kumeso ja ngamba ja Falau ni kumeso ja e atu.

⁴ Mose yamba ngwenyi, Chocho anambe Yehova ngwenyi, Ha muchima ufuku mungukapalika mukachi ka chifuchi cha Engitu,

⁵ mba tupula-majimo a mu chifuchi cha Engitu kumafwa chize kuli kapula-jimo wa Falau watwama ha ngunja yenyi ndo kuli kapula-jimo wa ngamba wa pwo wakutwatwa wunga; tupula-majimo twa tushitu nawa.

⁶ Kumukukapwa muteto unene ndusu mu chifuchi cha Engitu. Kanda kupwa unene ngwe uno, chipwe kulutwe kukuchi kapwa nawa.

⁷ Alioze chipwe kawa kechi kakenanyina niumwe wa kuli A-Izalele, chipwe kukenanyina mutu, chipwe kashitu, ka, hanga nukanyingike ngwenu, Yehova hanahandununa hakachi ka A-Engitu ni A-Izalele.

⁸ Wano eswe ngamba je kumakapalumuka kuli yami, kumakafukama kuli yami, nikwamba ngwo, Katukenu, yénu ni atu eswe akukukaula. Mba kulutwe lia yino yami mungukakatuka. Chocho yakatuka kuli Falau ni utenu wunji.

⁹ Yehova yamba kuli Mose ngwenyi, Falau kechi kahalakana kuli yena, hanga yikomokeso yami yoke mu chifuchi cha Engitu.

¹⁰ Mose ni Arone alingile yikomokeso yino yeswe kumeso ja Falau. Yehova yakalisa mbunge ya Falau. Kechele A-Izalele akatuke ku chifuchi chenyi.