Kutuhuka 10 - MUKANDA USANDU WA ZAMBI 1975

¹ Yehova yamba kuli Mose ngwenyi, Heta kuli Falau mumu hinakalisa mbunge yenyi, ni mbunge ja ngamba jenyi, hanga ngukalinge yino yilayi yami hakachi ko.

² Hanga ukambulwile mu matwi ja mwané, ni ja mujikulu we, yuma yize nalingile mu Engitu, ni yilayi yami yize nalingile hakachi ko, nukanyingike ngwenu, Mwe Yehova.

³ Mose ni Arone yaheta kuli Falau, yamba kuli iye ngwo, Chocho anambe Yehova, Zambi ya A-Hepreu, ngwenyi, Ndo mwiji muka kusolo kulilelesa kumeso jami? Echa atu jami aye, akangulingile.

⁴ Nyi ka, nyi kusolo kwecha atu jami kuya, hamene kumungukaneha makumbi mu chifuchi che.

⁵ O kumakafuka hashi heswe, chipwe mutu kechi kuhasa kumona he hashi, ka; mba yize yalisalaho ku chiwe o kumakayilia, ni mitondo yenu yeswe ya kusoka mu yambu kumakayilia.

⁶ Mazuwo je eswe, ni mazuwo ja ngamba je eswe, ni mazuwo ja A-Engitu eswe, kumakazala tò. Chipwe akakenu, chipwe tulamba twenu, kanda achimona, ka, chize ku tangwa lize o apwile hashi ndo musono. Iye yatewuluka, yakatuka kuli Falau.

⁷ Ngamba ja Falau ambile kuli iye ngwo, Ndo mwiji muka yono lunga mapwa kambwila kuli yetu? Echa malunga aye, akalingile Yehova Zambi yo. Kanda uchinyingika nyi? Ngwetu, Chifuchi cha Engitu kuchafwa.

⁸ Ahetesele Mose ni Arone cheka nawa kuli Falau. Iye yamba kuli ayo ngwenyi, Yénu nukalingile Yehova Zambi yenu, alioze waze maya aya?

⁹ Mose yamba ngwenyi, Etu kumutukaya ni twanuke twetu, ni makulwana jetu, ni ana jetu a malunga, ni ana jetu a mapwo, ni yimuna jetu, ni ngombe jetu, kumutukaya no, mumu chatutamba kulingila Yehova chiwanyino.

¹⁰ Iye yamba kuli ayo ngwenyi, Nyi mungwiza kunwecha kuya hamwe ni twanuke twenu, Yehova apwe ni yenu. Kanyamenu! Mumu kumeso jenu yipi yiliko.

¹¹ Hi chocho ko, enu malunga munuya, nukalingile Yehova mumu chocho nunafupu. Mba yaahuma kumeso ja Falau.

¹² Yehova yamba kuli Mose ngwenyi, Olola kwoko lie ha chifuchi cha Engitu ukanehe makumbi akakanduke ha chifuchi cha Engitu, akalie yeswe ya kusoka mu chifuchi, te yeswe yasala ku chiwe.

¹³ Mose yazundula mulumbu wenyi ha chifuchi cha Engitu, mba tangwa lize lieswe, ni ufuku uze weswe, Yehova yatuma ha chifuchi fuji yimwe ya ku Chivumbuko. Mba muze kwachile ye fuji ya ku Chivumbuko yanehene makumbi.

¹⁴ E makumbi akandukile ha chifuchi cheswe cha Engitu. Yapwila ha njiza jeswe ja Engitu mazaji anene chikolo. Chipwe kunyima kukwapwile makumbi niamwe ngwe waze, chipwe kulutwe kukuchi kapwa niamwe ngwe waze, ka.

¹⁵ Mumu afukile hashi heswe, chocho chifuchi yichilá pwi. Chocho yalia yeswe ya kusoka mu yambu ni mihuko ya mitondo yize yalisalaho ku chiwe. Kukwasalile chuma cha kusoka nichimwe, chipwe mutondo, chipwe chize cha mu yambu, ka, ndusu chifuchi cheswe cha Engitu.

¹⁶ Mba Falau yasanyika ni kapupushi Mose ni Arone, yamba ngwenyi, Hinavulumuna Yehova Zambi yenu. Hinavulumuna yenu nawa.

¹⁷ Haliapwila kashika, mwane, nukonekene kama mutonga wami, chichi kuhilukilamo, Liumbenu kuli Yehova Zambi yenu akanguchize kufwa chino.

¹⁸ Iye yakatuka kuli Falau, yaliumba kuli Yehova.

¹⁹ Yehova yatuma fuji yimwe ya tachi jinene ya ku Chitokelo, yiyianda e makumbi yiyiambila mu Kalunga-lwiji Muchila. Kukwasalile chipwe kumbi umuwika mu njiza jeswe ja Engitu, ka.

²⁰ Alioze Yehova wakalishile mbunge ya Falau. Kechele A-Izalele kuya, ka.

²¹ Yehova yamba kuli Mose ngwenyi, Olola kwoko lie kwilu hanga kukapwe milima kweswe ku chifuchi cha Engitu; hanga atu akapapate mu milima.

²² Mose yolola kwoko lienyi kwilu mba ha matangwa atatu mwapwile milima pwi lume mu chifuchi cheswe cha Engitu.

²³ Kalimwene umwe ni mukwo, ka, chipwe ha matangwa atatu niumwe wakatukile haze anatwama wakuhi. Alioze A-Izalele eswe apwile ni pangu mu mazuwo jo.

²⁴ Falau yasanyika Mose, yamba ngwenyi, Yénu nukalingile Yehova, alioze yimuna jenu ni ngombe jenu asale. Twanuke twenu nawa akaye ni yenu.

²⁵ Mose yamba ngwenyi, Chakutamba kutwaha mu moko jetu yitapo ni milambu ya kulumba, tukalambule yitapo kuli Yehova Zambi yetu.

²⁶ Yimuna jetu kumaya hamwe ni yetu nawa. Kukuchi kasala kunyima lusende umuwika; mumu tukwete kwatwala tukalingile no Yehova Zambi yetu. Mumu kutwanyingikine chize mutukalingila nacho Yehova ndo mutukahetako.

²⁷ Alioze Yehova wakalishile mbunge ya Falau, kaechele kuya, ka.

²⁸ Falau yamba kuli iye ngwenyi, Katuka kuli yami. Ukanyame kanda umona meso jami cheka nawa, mumu tangwa lize mumona meso jami, kumukafwa.

²⁹ Mose yamba ngwenyi, Wahanjika kanawa. Chichi kamona meso je cheka nawa.