Kutuhuka 1 - MUKANDA USANDU WA ZAMBI 1975

¹ A-Izalele ayile ku Engitu hamwe ni Yakomba, lunga ni lunga ni akwa jiko lienyi, majina jo wano;

² ni Rupene, ni Simeone, ni Levi, ni Yunda,

³ ni Isaka, ni Zapulone, ni Mbenjamine,

⁴ ni Ndane, ni Napatali, ni Ngate, ni Ashe.

⁵ Atu eswe aze asemukine kuli Yakomba apwile makumi shimbiali a atu; José te hapwa kulu mu Engitu.

⁶ Yafwa José; yafwa nawa ayayo eswe ni akwa chisemuko chize eswe.

⁷ A-Izalele asemene, okele chikolo, alumbamine, akanganyine; chifuchi yichitakana no.

⁸ Aswanyishine mwanangana weka wa Engitu, umwe kanyingikine José.

⁹ Iye yamba kuli atu jenyi ngwenyi, Talenu, atu A-Izalele kanoko, kanatuhiana, kanakangana ni tachi.

¹⁰ Tuyenu, tulinge kuli ayo ni mana kuchina moka, mumu kachi mukupwa jita, o makalifutula ni akwa kole jetu, akaliase ni yetu mba kumakakatuka ku chifuchi.

¹¹ Kashika asele tupatashi mukwapinjisa ni yiteli. O yatungila Falau membo, Pitome ni Ramese, mukutulikilamo upite.

¹² Alioze chize cheswe alikolezele kwapinjisa, ahianyine kwoka. Yalitanda ku chifuchi cheswe. A-Engitu evwilile kupiha chinji A-Izalele.

¹³ A-Engitu alingishile A-Izalele ni uswi.

¹⁴ Yaashata milimo yikalu ya ndambo, ni ya tijolo, ni ya milimo yeka ni yeka ya mu minda. Yaalingisayo yeswe ni uswi.

¹⁵ Mwanangana wa Engitu yahanjika ni yifunguji a kuli A-Hepreu, mukwo jina lienyi Shipara, ni mukwo jina lienyi Puvwa,

¹⁶ ngwenyi, Muze munufungula mwana kuli mapwo A-Hepreu, ha kwamona maya ku punga ya kusemena, nyi mwana wa lunga, numushihe lume, alioze nyi wa pwo, atwame ni mwono.

¹⁷ Alioze yifunguji avwilile woma Zambi, kalingile ngwe mwanangana wa Engitu ambile kuli ayo, ka. Yatunga ni mwono ana a malunga.

¹⁸ Mwanangana wa Engitu watambikile yifunguji, yamba ngwenyi, Kuchi te nwalinga chino, nikufunga ni mwono ana a malunga?

¹⁹ Yifunguji ambile kuli Falau ngwo, Mapwo A-Hepreu kapwile ngwe mapwo ja A-Engitu, ka, mumu kapindu akwete. Shimbu yifunguji kanda ahetako, o te hasema kulu.

²⁰ Zambi walingile ni vumbi kuli yifunguji. E atu okele, akanganyine.

²¹ Mba kutala se e yifunguji kanavwila woma Zambi iye yaapwisa semi ja ana.

²² Falau yahana shimbi kuli atu jenyi eswe, ngwenyi, Ana a malunga eswe masemuka nwambile mu lwiji, ana a mapwo eswe atwame ni mwono.