Kolosu 4 - MUKANDA USANDU WA ZAMBI 1975

¹ Yenu miata, hanenu kuli ndungo ni ululi, chize chinalite; se nunanyingika ngwenu, Ni yetu nawa tuli ni Mwene mu malilu.

² Nyongononenu ni kulemba, ni kulámo hamwe nikusakwila.

³ Lembenu ha shimbu lize liene hali yetu nawa, hanga Zambi akatwazulwile pito ha liji, mukuhanjika chijimbikilo cha Kristu, mumu ha chenacho nawa nguli mu makana;

⁴ hanga ngukachisolole ngwe chize changutamba kuhanjika.

⁵ Endenu ni mana kuli waze ali haze, nikukuta mwaka.

⁶ Liji lienu likapwe matangwa eswe ni vumbi, lia kulungiwa ni mungwa, hanga nukanyingike chize Chanutamba kukumbulula kuli mutu ni mutu.

⁷ Techiku, ndumbwetu wa zango, kavumbi wamwenemwene, kanda ngamba-nimukwetu muli Mwene, kumakanulweza cheswe cha kutwala kuli yami.

⁸ Iye hingunamutumu kuli yenu ha chikuma chino chene, hanga nukanyingike ha kutwala kuli yetu, hanga akalembejeke mbunge jenu;

⁹ hamwe ni Onesimu, ndumbwetu wamwenemwene wa zango, iye te wa yenu. O kumakanulweza yuma yeswe ya kuno.

¹⁰ Aristarku, funge-ni-mukwetu kananumeneka, ni Marku, musonyi wa Mbarnavwe, (ha kutwala kuli iye nwatambwile maliji a shimbi; kachi meza kuli yenu, nukamutambule),

¹¹ ni Yesu, yoze anamuvuluka ngwo, Justo, wano a ku ungalami; wano wika akwa milimo-ni-akwetu ha wanangana wa Zambi, hanapu akwa kungulembejeka.

¹² Mukwenu Epafwa, ndungo ya Kristu Yesu, kananumeneka, matangwa eswe nikulitachika chikolo hali yenu mu yilemba yenyi, hanga nukamane ngú, angunu, akwa kulisela chinyingi liakulu mu upale wa Zambi.

¹³ Ngunashindakenya hali iye, ngwami, Kakukilikita chikolo hali yenu, ni hali waze ali mu Laotisea, ni hali waze ali mu Hierapoli.

¹⁴ Luka, mbuki wa zango, ni Ndima kananumeneka.

¹⁵ Menekenu mandumbu waze ali mu Laotisea, ni Nimifwa, ni chikungulwila chize chili mu zuwo lienyi.

¹⁶ Muze mukanda uno hautanga hakachi kenu, nukautangise nawa mu chikungulwila cha A-Laotisea, ni yenu nawa nukatange uze wa ku Laotisea.

¹⁷ Nukambe kuli Arkipu ngwenu. Kanyama ha uvumbiko uze hiunatambula muli Mwene, hanga ukaumanunune.

¹⁸ Kumeneka cha yami Paulu, ni kwoko lia yami mwene. Iwulukenu makana jami. Vumbi likapwe ni yenu.