Kolosu 3 - MUKANDA USANDU WA ZAMBI 1975

¹ Kashika nyi hananuhindwisa hamwe ni Kristu, fupenu yuma yize yili kwilu, kuze Kristu ali, kanatwama ku chindume cha Zambi.

² Nyongenu yuma yize yili kwilu, hi yuma yize yili hano hashi ko.

³ Mumu hinunafu, ni mwono wenu kuwaswama hamwe ni Kristu muli Zambi.

⁴ Muze makasolola Kristu, iye mwono wetu, hohene ni yenu nawa makanusolola hamwe nenyi mu uhenya.

⁵ Kashika shihenu yihanda yenu yize yili hano hashi; ni utanji, ni luchisa, ni kusasaminya, ni usolo upi, ni kuzo, yenayo kukombelela mahamba;

⁶ mumu ha yuma yino utenu wa Zambi kumuwiza hali akwa uhulia.

⁷ Muze mwene ni yenu nawa ha miaka ya kunyima nwendele, muze nwatwamine mu yino yuma.

⁸ Alioze haliapwila mbilenu yino yuma yeswe; ni utenu, ni ufwatulo, ni uhuka, ni kushililika, ni kuhanjika cha sonyi mu makanwa jenu.

⁹ Kanda nuhanjika mahuza umwe kuli mukwo; se hinunazula mutu mukulu hamwe ni yilinga yenyi,

¹⁰ nunazala mutu mwaha, yoze kanamupwisa mwaha ha yinyingi yeswe, nikulita ni kulifwa cha yoze wamutangile:

¹¹ muze kumushi Ka-Ngresia ni Ka-Yunda, ngalami ni chilima, kandaka ni Ka-Seteya, ndungo ni mwenya chifuchi; alioze Kristu iye yuma yeswe, muli eswe.

¹² Kashika ngwe ana aze hanaatongola Zambi, asandu, waze kanaazange chikolo, zalenu mbunge ja keke, ni utu, ni mbunge ja kulikehesa, ni kushimbika, ni uhomboloji;

¹³ nikulihumikiza umwe ni mukwo, nikulikonekena umwe ni mukwo, kachi umwe munengo a muli nawo mukwo, chizechene ngwe Kristu hananukonekena, chocho ni yenu nawa nulikonekene.

¹⁴ Helu lia yino yuma yeswe zalenu zango, lize liapwa muya wa ungunu.

¹⁵ Sambukila ya Kristu yikayule mu mbunge jenu, ku yenayo hananutambika mu mujimba umuwika; pwenu nikusakwila.

¹⁶ Liji lia Kristu Ukatwame muli yenu lia kulumbama ni mana eswe; nikulilongesa nikulikanyamisa umwe ni mukwo, ni masamu ni miaso ni mimbo ya uspiritu, imbenu ni vumbi mu mbunge jenu kuli Zambi.

¹⁷ Cheswacho munulinga, chipwe ha liji, chipwe ha chitanga, lingenu yuma yeswe mu jina lia Mwene Yesu, muli iye Sakwilenu kuli Zambi kanda mwe Tata.

¹⁸ Yenu mapwo, zeyelenu kuli akwenumalunga ngwe chinatambe muli Mwene.

¹⁹ Yenu malunga, zangenu akwenu-mapwo, kanda nupwa asasu kulimika no.

²⁰ Yenu ana, Ononokenu kuli yisemi jenu ha yuma yeswe, mumu chino chinapemena chikolo kuli Mwene.

²¹ Yenu atato, kanda nukehia ana jenu kuchina mahonga ku mbunge.

²² Yenu ndungo, Ononokenu ha yuma yeswe kuli waze apwa akakenu nikulita ni musunya; kanda nulingila ku meso wika, ngwe akwa kupemena kuli atu, alioze ni kutuwika cha mbunge, nikwivwa woma wa Mwene.

²³ Cheswacho munulinga, chilingenu ni mbunge, chizechene ngwe kuli Mwene, hi kuli atu ko.

²⁴ Nyingikenu ngwenu, Kuli Mwene mutukatambula chihinga ha kwononona, mumu twakulingila Mwene Kristu.

²⁵ Mumu yoze malinga yipi kumakatambula nawa yipi yize hanalingi: ni katonde wakuhi niumwe.