Joele 3 - MUKANDA USANDU WA ZAMBI 1975

¹ Mumu ha matangwa aze ni miaka yize muze mungukuhilwisa kuwaha cha Yunda ni Yerusaleme,

² mungukakungulula mavungu eswe, mungukaapalumwisa ku chana cha Yehosofate. Kuze mungukasopa no hali atu jami ni ha chihinga chami Izalele, waze hanaamwange hakachi ka mavungu nikulitetiela chifuchi chami.

³ Hanatela chela atu jami. Hanalande chikoi ni mwanalunga; hanalande vinyu ni mwana-pwo hanga akanwe.

⁴ Enu, Teru ni Sendone ni yifuchi yeswe ya Filistea, kuchi nwapwa kuli yami? Nunangukundulula chimwe chuma, nyi? Nyi munungukundulula chimwe chuma, ni yami fuji-fuji munguchihilwisa ha mitwe yenu.

⁵ Se hinweya prata yami ni oru yami, hinwatwala ku tembele jenu yuma yami yilemu yipema,

⁶ ni ana ja Yunda ni ana ja Yerusaleme hinwaalanjisa kuli A-Ngresia hanga nukaatwale kusuku ni chifuchi cho;

⁷ kashika mungwakatwisa kuze nwaalanjishile ngukahilwise chitanga chenu ha mitwe yenu.

⁸ Mungulanjisa anenu a malunga ni a mapwo kuli A-Yunda, mba o maalanjisa kuli akwa Shipa, ku vungu limwe liatwama kusuku. Mumu Yehova hanachambe, kashika.

⁹ Ambululenu chino hakachi ka mavungu ngwenu, Lulikenu jita! Sungenu malunga a ndundo! Malunga eswe a jita eze, akanduke ku kuno.

¹⁰ Fulenu yikungo ya sharua yikapwe tutana; poko jenu ja kululika mitondo ya mihuko jikapwe makunga. Alelu ambe ngwo, Tuli yitakame.

¹¹ Tambukenu nwize nukunguluke, enu mavungu eswe nwajingilika. Ena Yehova, tumako akwa ndundo je.

¹² Mavungu alisunge, akanduke ku chana cha Yehosofate, mumu kwenako mungutwama ni kusopesa mavungu eswe a kujingilika.

¹³ Senu kwengo mumu mbuto hiyahia. Tweyenu, nuliate mumu ukamino wa uva hiwazala, yikwachilo yinasupwoka, mumu ungulungulu wo woka.

¹⁴ Yihuji ni yihuji mu chana cha upatwilo, mumu tangwa lia Yehova hiliakundama mu chana cha upatwilo.

¹⁵ Tangwa ni kakweji kakulá, ni matongonoshi kakulitwamina kutemuka.

¹⁶ Yehova makakulunguza ku Zaione, makahiohiesa liji lienyi ku Yerusaleme. Yuma ya mwilu ni hashi muyikanyika, alioze Yehova makapwa chiswamo kuli atu jenyi, makapwa pembo kuli A-Izalele.

¹⁷ Chocho munukanyingika ngwenu, Yehova iye Zambi yetu katwama ha mulundu wenyi usandu wa Zaione. Mba Yerusaleme muyikapwa yisandu, ni yilambala kechi kupalikako nawa.

¹⁸ Ha tangwa lize milundu muyikasutwoka vinyu yipema, ni mindundena muyikapukumuna yamwa. Yitwetwe yeswe ya Yunda muyikazala ni meya. Mba fuji limwe mulikapukukila mu zuwo lia Yehova nikutuchikisa chana cha Shitime.

¹⁹ Engitu muyikapwa ya hululu, ni Endome muyikapwa puya ya hululu mumu ha upupilo uze alingile kuli A-Yunda, mumu mu chifuchi cho hamwanga manyinga a kusamba.

²⁰ Alioze Yunda kumakatwama ku miaka ya mutolo. Yerusaleme kumuyikatwama chize ku yisemuko ndo ku yisemuko.

²¹ Kumungukakala manyinga jo aze te chaakalile; mumu Yehova katwama mu Zaione.