Joele 1 - MUKANDA USANDU WA ZAMBI 1975

¹ Liji lia Yehova liejile kuli Joele mwana wa Petuele ngwo,

² Panjikenu enu makulwana a malunga, ivwenu enu akwa chifuchi. Chuma chino te hichasoloka kama ha matangwa jenu, chipwe ha matangwa ja atatenu nyi?

³ Ambulwilenu ana jenu hanga o akambulwile ana jo, ni ana jo akambulwile chisemuko chikwo.

⁴ Chize mapasu hahichika, makumbi halia. Chize makumbi hahichika, tuzeze halia. Chize tuzeze hahichika yambi halia.

⁵ Enu akwa kuzengewa, laulenu nulile. Lilenu mbimbi enu eswe nwakunwanwa vinyu, mumu ha vinyu yize yipema hanayipatula ku makanwa jenu.

⁶ Mumu vungu limwe hilieza mu chifuchi chami; vungu limwe lia tachi, chipwe kwaalulla kutuchi kuhasa. Mazo jo kapwa ngwe mazo a ndumba; yiwunji yo kuyapwa ngwe ya ndumba munene.

⁷ O hanenyeka mutondo wami wa uva. Hanamakuna mukuyu wami; hanauhulula nikuumbila; mitango yawo hanayitomesa tó.

⁸ Lilenu ngwe *virgem unazala chikeleyi mumu hali lunga lia wanuke wenyi.

⁹ Mulambu wa wunga ni mulambu wa kunwa hiyinapatuka mu zuwo lia Yehova. Asasendote, tuvumbi twa Yehova, kanalili.

¹⁰ Minda hanayenyeka. Chifuchi chinalili, mumu mbuto hanayenyeka. Vinyu yaha hiyinomu, ni maji hanatepuluka.

¹¹ Enu njimi, ivwenu sonyi; enu akwa kululika miuva, lilenu mbimbi mumu ha tiliku ni ha sevada. Mumu mbuto ya mu minda hiyafuwa.

¹² Mutondo wa uva hiunomu; mukuyu unalele. Chipwe mitondo ya romana, ni ya mingaji, ni ya masá, ewa, mitondo yeswe ya kutumba hiyinomu. Ni chiseke cha ana ja atu hichinomu nawa.

¹³ Enu asasendote, lijikenu yikeleyi nukalinyenge. Enu tuvumbi twa chilumbilo, lilenu mbimbi. Enu tuvumbi twa Zambi yami, tweyenu nukapombe ufuku weswe mu yikeleyi, mumu mulambu wa wunga ni mulambu wa kunwa hanayimina mu zuwo lia Zambi yenu.

¹⁴ Liselenu tangwa lisandu lia kulitwamina kulia. Tambikenu chikungulwila chilemu. Kungululenu makulwana ni akwa chifuchi eswe ku zuwo lia Yehova Zambi yenu, nukatete kuli Yehova.

¹⁵ Mama yami! Lie tangwa! Lie tangwa lia Yehova hiliakundama. Muliza ngwe kwonwona cha kuli Mukwa-Ndundo-Jeswe.

¹⁶ Yifwo hanayitete kumeso jetu. Chiseke ni uwahililo hanayitete ku zuwo lia Zambi yetu.

¹⁷ Mbuto kuyinapolo mu mavu; machila hanawondeka; mazuwo a kuswekela kulia hanapuzuka; mbuto hiyafuwa.

¹⁸ Yimuna anatu mikuma Chichize! Matanga a yimuna kanapinji mumu kelo jakuhi. Chipwe yendo ya mapanga kanamono lamba.

¹⁹ Yehova! Kuli yena ngunatete, mumu kahia hikalalisa ku ulilo wa mu puya; milengi hiyocha mitondo yeswe ya kutumba.

²⁰ Chipwe tushitu a mu yambu kanahwimashana kuli yena, mumu meya a mu yitwetwe hanomu, ni kahia hikalalisa ku ulilo wa mu puya.