Jobe 9 - MUKANDA USANDU WA ZAMBI 1975

¹ Jo yakumbulula ngwenyi,

² Ngunachinyingika; chochene pundu. Alioze mutu kuchi masamba kumeso ja Zambi?

³ Nyi umwe mazanga kuhamika nenyi, kechi kuhasa kumukumbulula kamuwika mu kanunu.

⁴ Iye mukwa mbunge ya mana, mukwa kutakana ni ndundo. Yoze wakwata nenyi pami mba yatwama kanawa, iya?

⁵ Aye matutulula milundu kachinyingikine muze mayichilumuna ha utenu wenyi.

⁶ Manyikisa hashi ndo hihalisekula ni manguji jaho machikima.

⁷ Mámbila tangwa mba kulichi kuvumbuka; mayika matongonoshi.

⁸ Ukawenyi yazazulula malilu; yaliata ha mikanya yisuku ya kalunga-lwiji.

⁹ Yatanga matongonoshi a Ursa, ni Muta-ni-kawa ni Kungulwila ni yipatulo ya ku Sule.

¹⁰ Mukwa kulinga yuma yinene kuhiana manyonga jetu; yikomokeso keshi kuhasa kuyalula.

¹¹ Mangupalika chichi kumumona; maya lume, chamusele chinyingi.

¹² Machangumuna, iya mamukwika? Iya manwamba ngwenyi, Yika unalingi?

¹³ Zambi kechi kuholesa utenu wenyi. Chipwe yikwashi ja Rahape ahetamine kumeso jenyi.

¹⁴ Mba yami kuchi munguhasa kumukumbulula nikuwana maliji a kulimika nenyi?

¹⁵ Chipwe chishi mulonga hindu Chahashile kumukumbulula; changutamba kulembela keke kuli mukwa kungusuma.

¹⁶ Nyi namusanyika mba iye yatá, chichi kuhasa kufuliela ngwami liji liami anapanjika.

¹⁷ Mumu kakungufwenya ni kangonga; Kakwokesa mbandu jami chitela chakuhi.

¹⁸ Keshi kungwecha ngukahwime; kakunguzalisa ni usasu.

¹⁹ Nyi chuma cha tachi; mukwa tachi iye. Nyi chuma cha upatwilo, iya mamusanyika ha lwaza?

²⁰ Chipwe chishi mulonga hindu kanwa liami mwene mulinguhisa. Chipwe chishi kapalia hindu kuli iye munguhila ngwe napiya.

²¹ Chipwe chishi chitela hindu Chanyingikine mbunge yami, chapalile mwono wami.

²² Cheswe chimuwika, kashika ngunambe ngwami, Kakunongesa mukwa kusamba ni mukwa kuhia.

²³ Nyi matulaswola ni kufwa cha ngambu, maseha lamba lia yoze keshi mulonga.

²⁴ Hakunjika hashi mu chiyulo cha yingulungulu. Kakufuka meso ja yipatula-milonga. Nyi hi iye ko, mba iya?

²⁵ Matangwa jami kakutambuka kuhiana mukwa kuzomboka; kakungupalika ni chipema chakuhi.

²⁶ Kakuya ngwe mato a mbungu; ngwe pupa kakuhulumukina ha kulia chenyi.

²⁷ Nyi mungwamba ngwami, Munguvulama musongo wami; mungulitwamina kupiha ku meso, munguwahilila,

²⁸ woma wa yikola yami yakungukwata, mumu ngunanyingika kuchi kungusambisa.

²⁹ Mukanguhisa, kashika kuchi te mungulifwita mokomoko?

³⁰ Chipwe mungusana mu meya a neve, ni kupemesa moko jami ni sabau,

³¹ hindu mukangunungwina mu malowa, chipwe mazalo jami makanguvwila lwaji.

³² Mumu iye hi mutu ko ngwe yami ngumukumbulule, hanga tukasoloke hamuwika ha lwaza.

³³ Kachi, mama yami! kachi kwapwile umwe chitakanyishi, akase kwoko hali iye kwoko hali yami!

³⁴ Achize kama mbwechi yenyi kuli yami; woma wenyi kanda unguchikimisa.

³⁵ Nyi chocho kachi munguhanjika; chichi kumuvwila woma. Alioze kuli yami kuchapwile chocho.