Jobe 8 - MUKANDA USANDU WA ZAMBI 1975

¹ Mba Bilidade Ka-Shuha yakumbulula ngwenyi,

² Ndo mwiji muka muwamba yino yuma? Ndo tangwa lika maliji a mu kanwa lie mapwa ngwe kangonga?

³ Zambi te kakupatula ni uhenge? Mukwa-Ndundo-Jeswe kakupatula ni uhenge?

⁴ Nyi ana je amuvulumwine, iye hanaakunjika ku tachi ja uvulumunyi wo.

⁵ Nyi mufupa Zambi, ni kulembelela Mukwa-Ndundo-Jeswe,

⁶ kumakukumbulula wate, ni kuwahisa zuwo lie lia ululi, nyi uli mupema, mukwa ululi.

⁷ Chipwe wapwile mukepe ha uputukilo, makapwisa matangwa je a ku songo anene chikolo.

⁸ Hula kama ha kutwala ku miaka ye kushi; Zewula chize tulamba lianalilongesa.

⁹ Etu tuli a zau, kutwanyingikine nichimwe. Matangwa jetu muno-muze kapwa ngwe Chizulie.

¹⁰ Kechi kukulongesa? Kechi kukulumbunwina ni kukwaha maliji a ku yinyingi yo?

¹¹ Mushiji wakusoka kuze tenga liakuhi? Mbungu jakusuha kuze kukushi meya?

¹² Shimbu kanda jichitemuna yitemo chipwe kujiteta, jene jakuma washiwashi kuhiana yiputa yikwo yeswe.

¹³ Chocho apwa majila ja waze eswe akavulama Zambi; kutalatala cha chitanganyanyi kumuchlkajimuka.

¹⁴ Kufuliela chenyi kuchakumakwoka; kujikijila chenyi chapwa chilelu ngwe wandajili.

¹⁵ Malishachila ha zuwo lienyi, kuliakolele; malikwata, kulialindulukile.

¹⁶ Kakutatuka mu mwalwa; kakutanda mitango kweswe ku munda wenyi.

¹⁷ Miji yenyi kuyakutanda ndo ku milumba ya mawe; kuyakutwama kwe ku yimawe.

¹⁸ Alioze nyi mamwenyeka ku chihela chenyi, muchilikalaye ngwo, Chakunyingikine.

¹⁹ Che kuwaha cha jila yenyi chenacho; mba akwo kumasoka ku mavu kumusalakana.

²⁰ Zambi kechi kumbila yoze keshi mulonga; kechi kukwata kwoko lia yingulungulu.

²¹ Kumakazalisa kanwa lie ni maseho, kumakasa kulikwiza ku mivumbo ye.

²² Akwa kole je makaafuka ni sonyi, ni mazuwo ja yingulungulu kumakajimuka.