Jobe 7 - MUKANDA USANDU WA ZAMBI 1975

¹ Milimo ya mutu hano hashi te hi yikalu ko? Matangwa jenyi kapwile ngwe matangwa ja ngamba?

² Aye kapwa ngwe ndungo yoze kanatalatala chihuhumuke, ngwe ngamba yoze unatalatala fweto yenyi.

³ Chocho ni yami hanangusela tukweji keshi chinyingi; ufuku wa huli hanangufunjikila.

⁴ Ha kupomba nakwamba ngwami, Hahi munguhindukila? Alioze ufuku wasuha, nakulilangumiona ndo kucha.

⁵ Musunya wami wafukiwa ni mavuno ni majilo. Kowa liami Hakukala, mba mulilokoka nawa.

⁶ Matangwa jami kakutambuka kuhiana ndongo ya mukwa kuseleka. Kakusula ni kutalatala chakuhi.

⁷ Nyongenu, mwono wami wapwa ngwe mwiku umuwika; liso liami kulichi kumona yipema nilimwe tangwa nawa.

⁸ Liso lia yoze kanangumona kechi kangutala nawa; shimbu muchingutala hinaya.

⁹ Ngwe lelwa kuliakwanduka ndo kulishiko nawa, chocho yoze maya ku Shiole kechi kahiluka nawa.

¹⁰ Kechi kwiza nawa ku zuwo lienyi, ni chihela chenyi kuchichi kumunyingika nawa.

¹¹ Kashika chichi kuholesa kanwa liami; munguhanjika mu kupinda cha Spiritu yami, mungunenganyana ha kusasaminya cha mbunge yami.

¹² Te nguli kalunga-lwiji hanji umwe kashitu wamo, kashika wakungusela kalayi?

¹³ Ha kwamba ngwami, Muhela wami muunguhwimisa; muu wami muungutepulula misongo,

¹⁴ ena wakungukolesa woma ni yilota, wakungupinjisa ni usolwelo,

¹⁵ ndo nakuzanga Shinaho kufwa cha kunguhonda, chazangile chocho yifwaha yami.

¹⁶ Mwono wami wangupihila; chazangile kutwama ni mwono ndo ku miaka. Ngweche mumu matangwa jami kapwa ngwe mwiku umuwika.

¹⁷ Mutu kuchi apwa, wakumulemesa, wakumunyonga?

¹⁸ Wakumunangisa tangwa ha tangwa ha chimene, wakumweseka ha kashimbu ha kashimbu.

¹⁹ Ndo mwiji muka kuchi kunguchiza meso je? Kuchi kungwecha ngukamine mate?

²⁰ Nyi ngunavulumuna, chipi chika ngunakulingi ena mukwa kutala atu? Kuchi te wakungukongakonga uta we? Kuchi te napwa ngwe chiteli kuli yena?

²¹ Kuchi te kuchi kukonekena mutonga wami, kuchi kuchiza uhenge wami? Mumu haliapwila mungupomba mu mavu; mukangufupa, ami chishiko.