Jobe 6 - MUKANDA USANDU WA ZAMBI 1975

¹ Jo yakumbulula ngwenyi,

² Nyi kachi mahasa kupezalisa kama kulifwita chami; nyi mahasa kusa huli liami lieswe ha mbalansa!

³ Kachi muyilema kuhiana masekeseke eswe a mu kalunga-lwiji. Kashika maliji jami hapwa a kulipupula.

⁴ Mumu mivu ya Mukwa-Ndundo-Jeswe hiyangutwa; mbunge yami kuyinanu utende wayo; yuma ya Zambi ya kukolesa mwongo yeswe yalilonga kulimika ni yami.

⁵ Chimbulu wa mu yambu, nyi kali ni kalo kakulila? Ngombe kakuteta nyi kanali?

⁶ Chuma chasamuka mahasa kuchilia mungwa wakuhi? Leji lia lionda te linayeme?

⁷ Ngwe yuma yino ya kulia kuyakuzelwokesa chocho nawa ni mbunge yami yinayivwila lwaji.

⁸ Nyi kachi mangwaha chize ngunechi! Nyi kachi Zambi mangwaha chize ngunazange!

⁹ Zambi achitayize kama kungufwenya; akatusule kwoko lienyi ngusutuke.

¹⁰ Chenacho te muchipwa cha kunguhwimisa mbunge. Chipwe mu yikola yahiana kachi munguwahilila ngwami, Chalikalile maliji ja mwe Musandu.

¹¹ Tachi jami kuchi japwa mba ngushimbule nawa? Songo liami kuchi Hapwa ngukalihumikize?

¹² Te tachi jami japwa jimuwika ni ja mawe? Musunya wami unakolo ngwe unengu?

¹³ Muli yami chishi ni chize muchingukwasa, yize yeswe te ya kungukwasa hanguhumayo.

¹⁴ Chatamba mutu kupwa ni utu kuli sepa lienyi yoze kanalezumuka; nyi ka kanambila woma wa Mukwa-Ndundo-Jeswe.

¹⁵ Enu akwetu nwangwonga ngwe mingulunga kuyishi meya, ngwe tupila aze akuma.

¹⁶ Mapwa ni meya anji mumu ha jelu; kuze kwakuswama neve.

¹⁷ Alioze ha changa kakuma; ha chivukuminya keshi kusoloka kuma kwo.

¹⁸ Yendo ya ngeji makondoloka ku jila yo; manjila mu puya, mafwa.

¹⁹ Yendo ya ku Tema kakutala; ngeji a ku Shipa kakutalatala.

²⁰ Hanaakolesa sonyi mumu hafulielako; kakuhetako nikulishimwoka.

²¹ Chocho yenu hinwapwa kuli yami. Hinwamona kuji-ni-tomo liami mba woma nunevu.

²² Te hinamba ngwami, Penu chawana? Hanji, Ngufwetelenu ku upite wenu?

²³ Hanji namba ngwami, Ngupululenu kuli mukwa kole wami? Hanji, Ngukulenu ku tachi ja mukwa kungupinjisa?

²⁴ Ngulongesenu mba munguhola. Lumbununenu haze hinahengela kama.

²⁵ Kwambila mutu ni umwenemwene, kupemacho, alioze kwambamba cha yenu, kuchi chinalumbunuka?

²⁶ Te maliji wika malulamisa mutu? Kuhanjika cha mukwa kuhuza-chamwe-nemwene fuji.

²⁷ Enu nunazange kutela chela waze keshi ni tato; nunazange kusepa sepa lienu.

²⁸ Haliapwila ngutalenu kama mwe mu meso; chichi kuhanjika ni yenu mahuza.

²⁹ Litwaminenu kupatula ni uhenge. Litwaminenu, ululi wami nunasopesa.

³⁰ Ha limi liami uhenge uliho? Te Chahashile kupanjika che chipi?